Britaniya parlamenti 2011-ci ildə Müəmmar Qəddafinin hakimiyyətdən devrilməsi ilə nəticələnmiş Britaniya və Fransa müdaxiləsini sərt tənqid edən hesabat hazırlayıb.
Baki-xeber.com xəbər verir ki, hesabat müəllifləri həmin vaxt baş nazir olmuş Devid Kemeronu hava əməliyyatlarını həyata keçirmək üçün düzgün planın olmamasında ittiham edib.
Hesabatda deyilir ki, müdaxilə "düzgün kəşfiyyat məlumatları alınmadan" həyata keçirilib və Şimali Afrikada özünü İslam Dövləti (İŞİD) adlandıran qruplaşmanın baş qaldırmasına səbəb olub.
Vəkillər 2011-ci ildə Kemeronun səhv kəşfiyyat planları ilə yola çıxıb Liviyaya hərbi müdaxilə etməkdə günahlandırır.
İngilis Parlamentinin Xarici işlər komitəsinin hazırladığı “Liviya: Hərbi müdaxilənin, ölkənin dağılması və İngiltərənin gələcəkdəki siyasi variantlarının araşdırılması” başlıqlı hesabatda İngiltərənin Liviyaya hərbi müdaxiləsində səhv kəşfiyyat məlumatlarına istinad edildiyi və Kemeronun müdaxiləyə uyğun bir strategiyasının olmadığı vurğulanır.
"Hökumət xüsusilə bölgədə mülki vətəndaşlara qarşı təhdidin şişirdildiyini aşkar edə bilmədi. Qəddafinin açıqlamalarının bəzi qisimləri seçilərək, dedikləri reallıq kimi qəbul edildi. Hadisələrdə radikal qrupların rolunu da görə bilmədilər" – deyə hesabatda bildirilir.
İngiltərənin Liviyaya müdaxiləsinin mülki vətəndaşları qorumaq məqsədi daşıdığı, ancaq bunun rejim dəyişikliyinə çevrildiyi qeyd edilən hesabatda, Qəddafidən sonrakı dövrü üçün hökumətin hər hansı bir strategiyasının olmadığı qeyd edilir: "Bunlar isə siyasi və iqtisadi çöküş, qruplar arası və tayfalar arası müharibə, humanitar böhran və miqrant böhranı, çoxsaylı insan hüquqlarının pozulması, Qəddafi rejiminin əlindəki silahların bölgəyə yayılması və İŞİD-in Şimali Afrikada yayılmasına səbəb oldu. Devid Kemeron İngiltərə Milli Təhlükəsizlik Şurasında verdiyi qərarlarla və uyğun bir Liviya strategiyası ortaya qoya bilmədiyinə görə, məsuliyyət daşıyır".
Britaniya hökuməti isə bildirir ki, müdaxilə ilə bağlı beynəlxalq qərar olub. Müdaxilə ilə bağlı Ərəb Liqası çağırış edib və BMT Təhlükəsizlik Şurası tərəfindən icazə verilib, Britaniya Xarici İşlər Nazirliyi bildirib.
Kemeron müdaxiləni müdafiə edərək bildirib ki, Qəddafi "Benqazi şəhərində insanlara hücum edir və öz xalqını siçan kimi qırmaqda hədələyirdi". Lakin xarici işlər komitəsi bildirib ki, hökumət "dinc sakinlərə qarşı təhlükənin şişirdilməsini müəyyənləşdirə və eyni zamanda "üsyançıların arasında silahlı islamçı ekstremistləri" aşkar edə bilməyib.
Qeyd edək ki, Britaniya və Fransanın rəhbərlik etdiyi beynəlxalq koalisiya 2011-ci ilin mart ayında Müəmmar Qəddafiyə qarşı hava və raket atəşi kampaniyasına başlayıb.
Lakin Qəddafinin devrilməsindən sonra Liviyada zorakılıq hökm sürüb, bir-birinə müttəfiq olan hökumətlər və özünü İslam Dövləti adlandıran qruplaşma da daxil olmaqla yüzlərlə silahlı qruplaşma formalaşıb.
