16/06/2019 17:36
728 x 90

Bakı apteklərində “Naftalan” məlhəmi problemi, “Bio oyl” müəmması…

Dərman istehsal edən şirkətlər də təmizlənmiş Naftalan neftini “gördüm” demir

img

Şirkətlərdən bildirdilər ki, vaxtilə “Bio oyl” tərəfindən istehsal edilən bu məhsula tələbat olsa da, xeyli vaxtdır yoxdur

 

Azərbaycanın təbii sərvətləri, müalicəvi Naftalan nefti nəinki regionda, hətta bütün dünyada populyardır. Uzun illərdir Naftalan neftinin sorağına dünyanın bir çox ölkəsindən xəstələr gəlir və burada sağlamlıqlarına qovuşurlar.

Bu gün təmizlənmiş Naftalan neftinin uzaq Çinə qədər gedib çıxdığı və burada müalicə üçün istifadə edildiyi haqqında informasiyalar var. Son dövrlərə qədər yerli aptektərdə sıx-sıx rast gəlinən təmizlənmiş Naftalan neftinə və ya ağ rəngli məlhəmə bu gün rast gəlinmir. Təmizlənmiş Naftalan neftinə bəzi apteklərdə təsadüfən rast gəlinsə də, 5-20 qram həcmində olan məhsul müxtəlif qiymətlərə satılır. Hazırda defisit olan təmizlənmiş Naftalan neftini tapsaq, 5 manat 20 qəpiyə, 6 manat 50 qəpiyə ala bilərik. Bu gün apteklərdə təmizlənməmiş Naftalan nefti satılır, ancaq təmizlənmiş neft isə satılmır. Dəri xəstəliklərinin, sümük, oynaq ağrılarının müalicəsində xüsusi əhəmiyyət kəsb edən təmizlənmiş Naftalan neftinin hazırla istehsal edilmədiyi bildirilir. Apteklərdən deyirlər ki, təmizlənmiş Naftalan neftinin istehsalı ilə Azərbaycanda məşğul olan “Bio oyl” şirkəti fəaliyyətini dayandırdığı üçün, hazırda bu məhsul istehsal olunmur, apteklərdə olan məhsul isə köhnədən qalandır.  

Bu gün Azərbaycanda təmizlənmiş Naftalan nefti niyə istehsal olunmur?

Əlaqə saxladığımız dərman şirkətlərindən bildirdilər ki, “Bio oyl” şirkəti fəaliyyətdə olduğu dövrdə əməkdaşlıq nəticəsində həmin məhsulu ala bilirdilər, bu gün isə o məhsulu tapmaq çətindir.

“Avromed” şirkətindən bildirdilər ki, hazırda sözügedən məhsulla bağlı onlara tez-tez müraciət edilir, lakin bütün müştərilərə “biz artıq o məhsulu almırıq, yoxdur” cavabını verirlər. Şirkət əməkdaşının sözlərinə görə, Naftalan yağları var, ancaq onlara da müştərilər elə də maraq göstərmirlər.

“Bioloji Təbabət” şirkətindən isə bildirdilər ki, onlarda yalnız təmizlənməmiş Naftalan nefti var və xəstələrə həmin məhsul tətbiq edilir.

“Alfamed” və “Aysimed” şirkətlərindən də “hazırda bizdə təmizlənmiş Naftalan nefti yoxdur. Vaxtilə var idi, indi isə gəlmir” cavabını verdilər.

  • Səfayə Əhmədova: “O şirkəti Səhiyyə Nazirliyi bağlamayıb”

Səhiyyə Nazirliyinin mətbuat xidmətinin əməkdaşı Səfayə Əhmədova isə “Bakı-Xəbər”ə bildirdi ki, “Bio oyl” şirkətinin hansı səbəbdən bağlanması haqqında məlumatsızdır. “O şirkəti Səhiyyə Nazirliyi bağlamayıb. Bu məsələ ilə bağlı siz Analitik Ekspertiza Mərkəzi ilə əlaqə saxlayın. Onlar bu məsələni araşdırıb sizə məlumat versin”.  

  • Esmira Əskərova: “Həmin şirkət haqqında sizə hər hansı bir məlumat verə bilmərəm, çünki...”

Səhiyyə Nazirliyi yanında Analitik Ekspertiza Mərkəzinin mətbuat xidmətinin rəhbəri Esmira Əskərova “Bakı-Xəbər”ə açıqlamasında bildirdi ki, ümumiyyətlə, onlarda bu şirkətlə bağlı hər hansı bir informasiya yoxdur. “Mən istehsalla bağlı sizə heç bir söz deyə bilmərəm. Həmin şirkət haqqında da sizə hər hansı bir məlumat verə bilmərəm, çünki informasiyam yoxdur. Ancaq bu məsələni araşdıracağam, hər hansı bir məlumat əldə etsəm, sizə məlumat verərəm. Biz istehsal məsələsini araşdırmırıq. Bizim sahəyə qeydiyyat, idxal, laboratoriya keyfiyyətinin yoxlanması daxildir. Biz dərman istehsal edən şirkətlərin fəaliyyətinə nəzarət etmirik” - deyə o bildirdi.

İradə SARIYEVA 

Son xəbərlər