Bakının 162 nömrəli məktəbində Elina Hacıyeva adlı şagirdin intihar etməsi bir neçə gündür ölkə gündəmini daha çox məşğul edən mövzu oldu. Hadisəyə müxtəlif aspektlərdən yanaşıldı, ətrafında qızğın polemikalar aparıldı. Hətta müzakirələrə millət vəkilləri, televizya kanalları, dövlət qurumlarının rəsmiləri belə qoşuldu.
Kifayət qədər ictimailəşən bu mövzuya Prezident İlham Əliyev və Birinci vitse-prezident Mehriban Əliyevanın səviyyəsində reaksiya verildi. Bildirildi ki, ölkə rəhbərliyi bununla bağlı bütün dövlət qurumlarına xüsusi tapşırıqlar verib ki, məsələ ciddi şəkildə araşdırılsın. Ancaq maraqlıdır ki, bundan sonra da bu mövzu ətrafında polemikalar aparılır. Hətta bəzi tanınmış şəxslərin, millət vəkillərinin öz mövqelərində israr nümayiş etdirdikləri ortadadır. Bu məsələdə birmənalı fikir və ya mövqe ortaya qoyulmur. Haçalanan mövqelərdə direktoru müdafiə edənlərdən tutmuş, intihar edən şagirdin valideynlərini tənqid edənlər, hətta bunu cəmiyyətdəki problemlərlə izah edənlər də tapılır. Artıq ortada elə bir mənzərə yaranıb ki, sanki hər bir şəxs cəmiyyəti narahat edən problemləri, olan neqativlikləri bu intihar üzərindən gündəmə gətirmək istəyir. Ölkə rəhbərliyi bu məsələni nəzarətə götürəndən sonra işlə bağlı istintaqın aparıldığı bir zamanda belə bir mövzu ətrafında yenidən qızğın fikir mübadiləsi aparmağa zərurət varmı?
Mehman Muradlı: “Bəzən müzakirələri elə şəxslər davam edirlər ki, bunu onların ranqına görə istintaqa təzyiq elementi kimi də dəyərləndirə bilərik”
Hüquqşünas Mehman Muradlı qəzetimizə bildirdi ki, cəmiyyət baş verən hadisəyə lazımi təpkisini göstərdi: “Bu məsələyə adi intihar kimi baxmaq da olmazdı. Təbii ki, azyaşlını buna vadar edən səbəblər ətrafında ciddi müzakirələr aparılmalı idi. Bunun xeyirli və ziyanlı tərəfləri də oldu. Xeyirli tərəfləri odur ki, əlaqədar qurumlar, məktəblər özlərində olan çatışmazlıqları dərk etdilər. Ziyanı isə bu oldu ki, həmin mövzu ətrafında bəzi saytlar özlərinə İP yığmaq yarışına girdilər. Hətta ölən körpənin adına nə bacardılarsa, onu da yaxdılar. Ən əsası isə budur ki, bu ciddi məsələyə ölkə rəhbərliyi səviyyəsində reaksiya verildi. Artıq bu mövzuda diskussiyaları dayandırmağın zamanıdır. Çünki istintaq gedir. Özü də ölkənin birinci şəxsinin birbaşa nəzarətində olan istintaqdan söz gedir. Yəni burada hansısa korporativ maraqlar güdülə bilməz. Kimin təqsiri varsa, mütləq cəzasını alacaq. Bu səbəbdən də əlavə müzakirələrin aparılması istintaqın gedişinə mane ola bilən faktordur. Hətta bəzən müzakirələri elə şəxslər davam edirlər ki, bunu onların ranqına görə istintaqa təzyiq elementi kimi də dəyərləndirə bilərik. İstintaqın nəticəsini gözləmək lazımdır. Kimin təqsirkar, kimin həbs edilməli olduğunu sosial şəbəkələr yox, istintaq müəyyən edir”
Məhəmmədəli QƏRİBLİ
