Bakının müxtəlif yerlərində sıx-sıx küçə reklamlarına rast gəlirik. Ayrı-ayrı şirkətlərin istehsal etdiyi məhsullardan tutmuş, sosial çarxlara, eləcə də müğənnilərin şəkillərinin, görüntülərinin yer aldığı reklam lövhələrinə qədər Bakı küçələrində qarşılaşırıq. Bir-iki kiçik istisnanı nəzərə almasaq, demək olar ki, milli qəhrəmanlarımızın, torpaqlarımızın bütövlüyü uğrunda şücaət göstərən insanların şəkilləri əks olunan görmürük. Halbuki, onların şəkillərinə, qəhrəmanlıqlarını göstərən örnəklərə daha tez-tez rast gəlməliyik.
Sovet dövründə plakatçı rəssamlar dövrün tələblərinə uyğun təşviqat materialları hazırlayar və həmin nümunələr şəhərin müxtəlif yerlərinə vurulardı. Heç şübhəsiz ki, həmin dövrdə qəhrəmanlığı tərənnüm edən lövhələr həddindən artıq çox idi. Çoxları hələ də xatırlayar, küçələrdə, məktəblərdə “Hər şey cəbhə üçün, hər şey qələbə üçün” plakatını. Bu şüarlar gənc nəslin vətənpərvərlik hisslərinin formalaşmasında müstəsna rol oynayırdı.
Hazırda şəhərimizdə milli qəhrəmanların, tarixi qəhrəmanlarımızın fotoları əks olunan təşviqat löhvələri, demək olar ki, gözə dəymir. Müharibə şəraitində yaşadığımızı və torpaqlarımızın 20 faizinin yağı tapdağında olduğunu nəzərə alsaq, belə təşviqat lövhələrinin Azərbaycanın hər yerində olmasına ciddi ehtiyac var.
Oqtay Əliyev: “Müharibə vəziyyətində yaşayan ölkədə milli qəhrəmanlara, qəhrəmanlığa, vətənpərvərliyə dair təşviqat lövhələri daha çox olmaldır”
Azərbaycan Reklamçılar İttifaqının idarə heyətinin üzvü, rəssam-dizayner, reklamçı rəssam, reklam üzrə ekspert Oqtay Əliyev “Bakı-Xəbər”ə bildirdi ki, bu gün Azərbaycanın hər yerində milli qəhrəmanların, igid Azərbaycan əsgərlərinin, aprel cəngavərlərinin fotolarından ibarət təşviqat löhvələri yer almalıdır. O hesab edir ki, hazırda buna çox böyük zərurət var. “Sovet dövründə reklamların əsasını siyasi reklamlar təşkil edirdi. Reklam yayımının bir neçə növü var. Bundan əlavə, sosial reklamlar da var ki, o da reklamın bir qoludur. Milli qəhrəmanların fotolarından ibarət təşviqat lövhələrinin hazırlanması sosial reklama aiddir. Sovet dövründə sosial reklamlara o qədər geniş yer verilmirdi. Deməzdim ki, hazırda vətənpərvərlik reklamları yoxdur, bu reklamlar az da olsa var. Bəzən yol kənarlarında bu kimi təşviqat löhvələrinə rast gəlinir. Bunlara da Bakı Şəhəri Reklam və Tərtibat İdarəsi nəzarət edir. Bu gün Azərbaycan Dövlət Reklam Agentliyi var, yeni yaradılmış qurumdur, bu işlər həmin qurumun da diqqətindədir. Qəhrəmanlıq təbliğ edən lövhələrin yayıldığı yerlərdən biri əsasən Bakı Metropoliteninin ərazisidir. Stansiyaların içində, çıxışında yer alır. Ancaq qəhrəmanlıq mövzusunda olan təşviqat lövhələrinin sayı qənaətbəxş deyil. Reklam üzrə ekspert kimi bu məni qane etmir. Müharibə vəziyyətində yaşayan ölkədə milli qəhrəmanlara, qəhrəmanlığa, vətənpərvərliyə dair təbliğat lövhələri daha çox olmaldır. Bunun sayının çox olması maarifçilik baxımından çox əhəmiyyətli olardı”.
Tərlan Eyvazov: “Bu gün təəssüf ki, şəhərimizdə milli qəhrəmanların, torpaq uğrunda həlak olan insanların şəkillərinin əks olunduğu lövhələri görə bilmirik”
Hərbi ekspert Tərlan Eyvazov bizimlə söhbətində bildirdi ki, müharibə vəziyyətdə olan bir ölkədə qəhrəmanlıq, vətənpərvərlik təbliğ edən lövhələrin olması olduqca vacibdir. T.Eyvazovun sözlərinə görə, bu gün aidiyyəti qurumlar bu işlə məşğul olmaldırlar. “Əlbəttə, Bakı küçələrində, eləcə də respublikamızın digər yerlərində qəhrəmanlığı təbliğ edən lövhələr, demək olar ki, yoxdur. Halbuki, müharibə şəraitində yaşadığımız bir dövrdə bu olduqca vacibdir. Bu gün təəssüf ki, şəhərimizdə milli qəhrəmanların, torpaq uğrunda həlak olan insanların şəkillərinin əks olunduğu lövhələri görə bilmirik. Biz bununla bağlı müraciət edəndə də deyirlər ki, beynəlxalq təşkilatlar müharibə təbliğ edən lövhələri bəyənmirlər. Biz müharibə təbliğ etmirik, öz qəhrəmanlarımızı tanıtmaq istəyirik. Ümumiyyətlə, şəhərimizdə reklam sahəsində, bir növ, qarışıqlıqdır. Demək olar ki, reklamlar bir-birinə qarışıb. Hazırda daha çox hansı şirkətlər reklam işi ilə məşğul olan qurumlara vəsait ödəyirsə, həmin təşkilatların da reklamları şəhərin müxtəlif yerlərinə vurulur. Çox arzu edərdim ki, Azərbaycanın hər yerində qəhrəmanlarımızın fotolarının əks olunduğu lövhələr olsun. İran-İraq müharibəsindən 30 ildən çox vaxt keçib, ancaq İranın bütün kəndlərində, şəhərlərində bu müharibə zamanı həlak olan insanların fotolarından ibarət lövhələr var. Onlar vaxtaşırı olaraq bu lövhələrdəki şəkilləri yeniləyirlər. Bizdə isə təəssüf ki, hələ də dünyada hər şeydən əziz olan canından keçən insanlar bu şəkildə tanıdılmır” - deyə T.Eyvazov qeyd etdi.
İradə SARIYEVA
