Məktəblərdə fizika fənni üzrə dərs saatları yetərlidirmi?
Orta təhsil sistemində tədris edilən bütün fənlər şagirdlərin bilik və bacarıqlarının artmasında, formalaşmasında müstəsna rol oynayır. Elə fənlər də var ki, onlara xüsusi münasibət olmalı və tədrisinə xüsusi əhəmiyyət verilməlidir.
Elə orta məktəblər var ki, orada sosial-humanitar yönümlü dərslərin saatı daha çox olur, nəinki texniki fənlərin. Son zamanlar müəllimlərlə söhbətlərimiz zamanı onlar bildirirlər ki, məktəblərdə fizika, kimya, biologiya, coğrafiya kimi fənlərin tədris saatı qənaətbəxş deyil. Yəni həmin fənlərin tədrisinə az saat ayrılır. Bu da, sözsüz ki, həmin fənlərdən dərs deyən müəllimlərin dərs yükünün az olması ilə nəticələnir, həm də onların əməkhaqqına təsir göstərir.
Orta ümumtəhsil məktəblərində texniki fənlərə, xüsusən də fizika fənninə az tədris saatı ayrılması nə ilə bağlı ola bilər?
- Məlahət Mürşüdlü: “Təkcə fizika deyil, coğrafiya, kimya, biologiya kimi fənlərin də tədrisinə ayrılan dərs saatı əvvəlki illərlə müqayisədə çox azdır”
Tanınmış təhsil eksperti Məlahət Mürşüdlü mövzunu “Bakı-Xəbər”ə şərh edərkən bildirdi ki, həqiqətən də bu gün sözügedən fənnə və digər texniki fənlərə ayrılan dərs saatı çox azdır. “Həqiqətən də orta məktəblərdə bu proses gedir. Təkcə fizika deyil, coğrafiya, kimya, biologiya kimi fənlərin də tədrisinə ayrılan dərs saatı əvvəlki illərlə müqayisədə çox azdır. Bu həm də müəllimlərin fəaliyyətinin tam təmin olunmamasına, eləcə də o fənlərin orta məktəblərdə tam mənimsənilməməsinə səbəb olur. Bu fənlərə tədris saatının az ayrılması düşünürəm ki, həftəlik dərs yükünün azaldılması ilə bağlıdır. Digər tərəfdən də artıq orta məktəblərdə təmayülləşmə gedir. Hansı siniflər ki, texniki fənlər üzrə təmayülləşib, orada həmin fənlərin dərs saatı yüksəkdir, nəinki humanitar siniflərdə. Ancaq fizika, kimya, biologiya və coğrafiya fənlərinin tədris saatının azaldılması prosesi təmayülləşmədən əvvəl başlanıb. Düşünürəm ki, araşdırma aparılmadan belə bir addımın atılması düzgün deyildi”.
M.Mürşüdlü qeyd etdi ki, artıq 3 ildir siniflərin marağına uyğun olaraq təmayülləşmə gedir və bu proses nəticəsində həmin fənlərlə bağlı problemlər aradan qaldırılır. O, həmçinin, vurğuladı ki, bütün məktəblər hələ təmayülləşməyib. Ekspert ümid edir ki, təmayülləşmə prosesi başa çatdıqdan sonra sözügedən fənlərin də tədris saatı normallaşacaq.
- İlqar Orucov: “Fizika, kimya, biologiya fənlərinə ayrılan dərs saatı az olduğu üçün, şagirdlər proqramı tam mənimsəyə bilmirlər”
Fizika-riyaziyyat üzrə fəlsəfə doktoru İlqar Orucov bildirdi ki, orta məktəblərdə dərs proqramlarının ağır olması gizlin deyil. O qeyd etdi ki, Azərbaycanda riyaziyyat, kimya, fizika kimi fənlər üzrə yazılan dərsliklər kifayət qədər yüklənib. “Dərsliklərdə yer alan mövzular xeyli çətin mövzulardır. Müqayisə üçün deyim ki, Almaniyada olarkən fizika, riyaziyyat, kimya dərslikləri ilə tanış oldum. Gördüm ki, o dərsliklər bizdəki qədər ağır deyil. Nəyə görə proqram belə ağırdır, anlamaq çətindir. Bunun müqabilində texniki fənlərin tədrisinə az saat ayrıldığı reallıqdır. Burada zərərli tərəf odur ki, texniki fənləri şagirdlər lazımi səviyyədə mənimsəyə bilmirlər. Fizika, kimya, biologiya fənlərinə ayrılan dərs saatı az olduğu üçün, şagirdlər proqramı tam mənimsəyə bilmir və repititor yanına üz tuturlar. Repititorluğu da şərtləndirən amillərdən biri elə dərs proqramının ağır olmasıdır”- deyə İ.Orucov qeyd etdi.
İradə SARIYEVA
