“Yekaterinburq şəhərinin oliqarxının sifarişilə qoyulan “yanlış diaqnoz” oğlumuzun azadlıqdan məhrum edilməsilə nəticələndi...”
Bu sözlər Rusiya Federasiyasının Yekaterinburq şəhərində yaşayan azərbaycanlı Hüseynovlar ailəsinin qəzetimizin Baş redaktoruna ünvanlanmış məktubundandır. Prezident Putinə, Rusiyanın bir sıra mətbu orqanına ünvanladığı məktubun bir surətini də “Bakı-Xəbər” qəzetinin elektron poçtuna göndərən Hüseynovlar ailəsi daha sonra yazır:
“Sizdən artıq dərəcədə xahiş edirəm, soydaşınız Hüseynov Roman Fariz oğlunun ətrafında yaranan situasiyaya biganə qalmayın!!!
Axı Yekaterinburqda “oliqarxların sifarişilə” insan haqlarının pozulması və günahsız insanların azadlıqdan məhrum edilməsi hallarına nə zaman son veriləcək?
Biz Hüseynovlar, Yekaterinburq şəhər Xəstəxanasının həkimləri sayəsində günahsız olduğu halda həbsə atılan Hüseynov Roman Fariz oğlunun valideynləri bildiririk ki, məhz məhkəmə-tibb ekspertizasının kobud prosessual pozuntularla apardığı ekspertiza nəticəsində “günahkar” elan etdiyi oğlumuz həkimlərin, əgər onları həkim adlandırmaq mümkündürsə, yanlış diaqnozu üzündən azadlıqdan məhrum edilib. Əslində isə səbəb onun bilərəkdən sağlamlığa ağır xəsarət yetirmə maddəsilə mühakimə olunan 3 nəfər arasında yeganə AZƏRBAYCANLI olmasıdır ki, bu hadisədə də zərərçəkən şəhər oliqarxıdır.
Rusiya Federasiyasında hüquqi dövlət quruculuğu kursu elan olunub və Konstitusiyanın 2-ci maddəsi insan hüquq və azadlıqlarını ən ali dəyərlər kimi təsbit edir. Rusiya prezidenti deyir ki, hökmlər “dəmir sübutlar əsasında” çıxarılmalıdır, əslində isə Rusiya məhkəmələrində nələr baş verir?! Müdafiə prosesində qanuni prinsiplər çoxdan yerini məsuliyyətsizliyə verib.
Bizim ailə diletant həkimlərin, ekspertlərin zərərçəkən oliqarxa qoyduğu yanlış diaqnozun qurbanı olub ki, nəticədə oğlumuz həbsə atılıb. Halbuki, onun günahsız olmasına dair kifayət qədər sübutlar, həmçinin iki dövlət ekspertizası rəyi vardı ki, bu da istintaq dövründə verilən ekspert dəyərləndirmələrinin saxta olması barədə düşüncələrə əsas verir. Ekspertizalar kobud qanun, həmçinin cinayət-prosessual qanunveriiliyin və məhkəmə-ekspert fəaliyyətinin ciddi pozuntuları ilə keçirilib. Ekspertlər zərərçəkənin aldığı xəsarətlərin ağırlıq dərəcəsini dəyərləndirərkən zərərçəkənə deyil, yalnız tibbi sənədlərin surətlərinə istinad edib ki, bu da
saxtalaşdırmanın əsas göstəricisi sayıla bilər. Aşkar vəziyyət isə ondan xəbər verir ki:
* Sağdan hematoraks diaqnozu saxtadır;
* Sınan qabırğaların sayında yanlışlıq var.
Əslində göstərilən diaqnozlar yalnız aidiyyəti üzrə həkimin (pediatr, terapevt, pulmonoloq) hərtərəfli müayinəsi sonucunda qoyulur. Diaqnoz qoyulduqdan sonra pasiyent xüsusi tibbi yardım alması məqsədilə hər cür müalicə etmə vasitələrinə malik xəstəxanaya göndərilir.
Bu deyilənlər vəkil sorğusuna Sverdlovsk vilayətinin Səhiyyə idarəsi tərəfindən 12.10.2018 tarixində göndərilən Cavabla (№ 03-08-20/462) da təsdiq olunur. Xüsusilə diqqətə alınmalıdır ki, həmin tibbi arayışda qabırğa sınmaları, pnevmatik hidritoraks, hemotoraks və bu kimi patologiyalar yoxdur. Beləliklə, ekspert rəylərinin ziddiyyətli məqamlara əsaslandığı, normativ bazanın düzgün istifadə olunmadığı, zərərçəkənin hərtərəfli və önəmli müayinələrdən keçmədiyi aşkardır.
Hesab edirik ki, bu pozuntular ekspertlər tərəfindən bilərəkdən, oliqarxın sifarişi əsasında istintaqı yanıltmaq məqsədilə törədilib. “Bizim” Yekaterinburq həkimlərinin yazdıqları absurddur! Görəsən qoyduqları bu ağır diaqnozun qiyməti nə qədərdir? Məsələ burasındadır ki, bu adamlar qorxmur, çünki bilirlər ki, onları “sudan quru” çıxaran olacaq. Diaqnoz qoyarkən, ekspertiza apararkən “bir yığın” qanun pozublar və heç kəs onları məsuliyyətə cəlb etməyib. Dövlət tibb müəssisəsinin həkim və ekspertlərinin saxtakar fəaliyyəti oğlumuzun xüsusilə ağır cinayətdə suçlanması ilə nəticələnib. Səbəb isə sadədir: bu işdə zərərçəkən şəhər oliqarxının yaxın dostudur!
Həqiqəti heç kəs axtarmır, günahsızı həbsə atmaqdan isə vicdanları sızlamır. Halbuki, onun cəmi 25 yaşı var və həkim və ekspertlər bu gənc həyatı məhv etmək istəyirlər. Biz isə onlara qarşı yalqız mübarizə apara bilmirik, o üzdən jurnalistləri qanunsuzluğa biganə qalmamağa çağırmağa məcbur olduq.
Oğlumuz günahı boynuna almayıb, lakin savaşda iştirakını da inkar etməyib: könüllü olaraq baş verənləri danışıb, zərərçəkənə harada və hansı zərbəni vurduğunu göstərib və bildirib ki, bu zərbələr ekspert rəyində göstərilən xəsarətlərə səbəb ola bilməzdi. Üstəlik, savaşda bir çox tanımadığı şəxs də iştirak edib. Müdafiə tərəfi də hökmü əsassız sayıb, bildirib ki, işin materiallarına və ayrıntılarına cavab vermir. Birincisi, ilkin və məhkəmə istintaqı müəyyən edib ki, dava iştirakçılarından heç kəs, üstəlik zərərçəkən özü də görməyib ki, ona kim neçə dəfə və hansı zərbəni vurub.
İkincisi, kütləvi davada iştirak edənlərdən heç kim təsdiqləməyib ki, zərərçəkənə göstərilən xəsarətləri yetirə biləcək zərbələri məhz bizim oğlumuz vurub. Biz məcbur qalıb, ikinci bir vəkil də tutmalı olduq və o, tibbi sənədlərdə bir çox ziddiyyətlər aşkarladı ki, bu da əsaslı şübhələrə yol açdığından, o, müstəqil ekspertlərə - Yekaterinburq şəhər Ekspert təşkilatına müraciət etdi. Burada müstəqil ekspertlər vəkilimizin şübhələrini təsdiqlədilər. Beləliklə, komissiyanın qərarı gəlinən qənaətlə ziddiyyət təşkil edir və ağır xəsarətlərin meydana çıxmasını mümkünsüz sayır. Komissiya rəyində deyilir:”Xəsərətə səbəb ola biləcək elementlər aşkarlanmadı, pnevmotoraks yoxdur, döş qəfəsi orqanlarında patologiya aşkarlanmadı”. Belə olduğu halda sağlamlığa ağır xəsarət haradan çıxdı? Elə oğlumuzun azadlıqdan məhrum edilməsinə də bu yanlış diaqnoz səbəb oldu. Belə çıxır ki, vurulan xəsarətin ağırlıq dərəcəsi həm də sosial statusla müəyyən olunur? Dövlət ekspertizası heç onun da qeydinə qalmadı ki, diaqnoz laborator müayinələrin nəticələrindən sonra birgə həkim rəyi əsasında qoyulsun. Sadəcə kağız üzərində “dozanı artırdılar”.
Sizdən xahiş edirik, müraciətimizi öz saytınızda yerləşdirin, qoy xalq görsün ki, necə problemlərlə üzləşmək mümkündür və Yekaterinburq şəhərinin oliqarxının sifarişilə qoyulan yanlış diaqnoz üzündən insanları necə mühakimə edirlər.
Biz bu müraciəti RF prezidenti Vladimir Putinə və insan hüquqları üzrə müvəkkil Moskalkova Tatyana Nikolayevnaya da göndərmişik. Ümid edirik ki, bu müraciətin dərci ədalətin bərpasına kömək edəcək və millətlərarası konfliktin yaranmasının önünü kəsəcək. Biz öz vəkillərimizlə birgə dediyimiz hər bir sözü SƏNƏDLƏRLƏ sübut etməyə hazırıq və onların surətini redaksiyanıza təqdim edirik.
Rusiya – Azərbaycan münasibətləri strateji əməkdaşlıq xarakteri daşıyır. Onun əsasında dostluq ənənələri, mehriban qonşuluq, bir-birinin maraqlarına hörmət, ümumi tarix və mədəniyyət, milyonlarla insanın qaynayıb-qarışmış taleyi durur. Düşünürdük ki, uzun illərdir Rusiyada yaşayan biz azərbaycanlılar bu ölkədən özümüzə doğma münasibət gözləməkdə haqlıyıq. Lakin təəssüf, görünür biz yanışmışıq...
Hörmətlə: Hüseynovlar ailəsi
