İlqar Hüseynli: “Turizm məqsədilə torpaqların, mülkiyyətin icarəyə götürülməsi mexanizmi asanlaşdırılmalıdır”
Dövlət Turizm Agentliyi Azərbaycanın turizm sektoruna xarici sərmayələrin cəlb olunmasına dair sənəd üzərində işləyir. Bunu mətbuata açıqlamasında Dövlət Turizm Agentliyinin İctimaiyyətlə əlaqələr şöbəsinin rəhbəri Kənan Quluzadə deyib.
O bununla bağlı açıqlamasında bir sıra məqamlara toxunub: “Sənəd özündə aqroturizmə sərmayələrin cəlb edilməsi konsepsiyasını əks etdirir. Turizmin bu istiqaməti perspektivli və gəlirli hesab edilir. Yaxın illərdə Azərbaycanda turizmin bu növünü xarici turistləri cəlb etməklə populyarlaşdırmağı planlaşdırırıq. Turistlər regionlarda kəndlərə səfər edərək, kənd həyat tərzi sürəcəklər, yerli adətlərlə tanış olacaqlar və hətta kənd işlərinə qatılacaqlar”.
Şöbə rəhbəri onu da bildirib ki, turizmin bu sahəsi Avropa ölkələri, xüsusən də İtaliyada geniş tətbiq olunur.
O da məlumdur ki, Azərbaycan artıq dünyada yeni bir turizm məkanı kimi tanınır. Bu sahədə geniş potensiala malik olan ölkəmizdə turizmin inkişafı və turizm sektorunun ölkə iqtisadiyyatının aparıcı sahələrindən birinə çevrilməsi dövlətin də prioritet məqsədlərindən biridir. Son illər əldə olunan sosial-iqtisadi irəliləyiş bu vəzifənin adekvat səviyyədə həllinə şərait yaradır. Bütün sahələrdəki dinamik inkişaf turizm sahəsində də özünü göstərir. Dünyanın hər bir ölkəsindən səfər edən turistlərin, cəlbedici məkan olaraq, Azərbaycanı seçmələri bir sıra amillərə söykənir. Bir sıra yeni müasir otellərin inşası, eləcə də yay turizmi ilə yanaşı, qış turizminin yaradılması turistlərin Azərbaycana cəlb olunmasında daha bir addım oldu.
Turizmin inkişafı ilə bağlı vacib məsələlərdən biri də bu sahəyə xarici sərmayələrin cəlbidir. Çünki yerli sərmayə ilə yanaşı, xarici kapitalın da turizm sektoruna cəlb edilməsi bu sahənin inkişafına ciddi təkan verə bilər.
Maraqlıdır, ekspertlər turizm sektoruna xarici sərmayələrin cəlb olunması ilə bağlı konsepsiyanın hazırlanmasını necə dəyərləndirirlər?
Məsələyə münasibət bildirən ekspert İlqar Hüseynlinin sözlərinə görə, xarici sərmayənin turizm sektoruna cəlb olunması üçün bir sıra məqamlara diqqət etmək lazımdır: “Ümumilikdə, istənilən ölkənin inkişafında xarici sərmayə əhəmiyyətli rol oynayır. Real iqtisadiyyatı özündə ehtiva edən sahələrdən biri də turizm sektorudur. Turizm sektoruna sərmayənin cəlbi bununla bağlı yaradılan şəraitdən çox asılıdır. Bunun üçün maksimum münbit şərait yaradılmalıdır ki, xarici sərmayədar bu sahəyə kapital qoymaqda maraqlı olsun. Xarici sərmayədar bilməlidir ki, bununla bağlı ilkin imtiyazlardan necə istifadə edəcək. Hesab edirəm ki, bununla bağlı xarici kapitalı stimullaşdırmaq üçün vergi yükü yüngülləşdirilməlidir. Bu səbəbdən Vergi Məcəlləsində sözügedən məsələ ilə əlaqədar güzəştli imkanlar yaradılmalıdır. Fikrimcə, bununla bağlı müddətli vergi güzəştləri tətbiq oluna bilər. Necə ki aqrar sektorda belə güzəştlər var, analoji güzəştlər turizm sektoruna da şamil olunmalıdır. İkincisi, xarici sərmayədarların Azərbaycan Respublikası ərazisindəki torpaqlardan istifadə hüquqları ilə bağlı müəyyən güzəştlərin olması çox vacibdir. Məsələn, turizm məqsədilə torpaqların, mülkiyyətin icarəyə götürülməsi mexanizmi asanlaşdırılmalıdır. Bu sahədə yeni, işlək və güzəştli mexanizmlərin tətbiq olunmasına ehtiyac var. Belə olarsa, xarici sərmayədarlar nəinki aqroturizmə, o cümlədən turizmin digər sektorlarına kapital qoymaqda maraqlı olacaqlar. Ən nəhayət, gəlir və xərclərin bölünməsində sərmayədarlara əlverişli şərait yaradılmalıdır. Yəni bütün bunların kompleks şəkildə həyata keçirilməsi turizm sektorunun inkişafında ciddi nəticələrin əldə olunmasına gətirib çıxara bilər”.
Vidadi ORDAHALLI
