Azər Allahverənov: “Hesab edirəm ki, sözügedən qanundan irəli gələn məsələlərin həlli bu kimi problemləri yoluna qoya bilər”
Azərbaycanda şəhərsalma və tikinti sahəsində fəaliyyət yol hərəkətinin təhlükəsizliyi tələblərinə uyğunlaşdırılacaq. Bu barədə Prezident İlham Əliyevin 27 dekabr 2018-ci il tarixli Sərəncamı ilə təsdiq edilmiş "Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı"nda deyilir.
Sənəddə qeyd olunur ki, 2019-2023-ci illərdə tikinti obyektlərinin layihələndirilməsi, tikintisi, yenidən qurulması və digər şəhərsalma və tikinti fəaliyyətinin planlaşdırıldığı ərazinin yol-nəqliyyat infrastrukturuna uyğunluğu meyarlarını və tələblərini tənzimləyən normativ-hüquqi və normativ xarakterli aktlar yol hərəkətinin təhlükəsizliyi tələblərinə uyğun olaraq təkmilləşdiriləcək.
Ərazinin yol-nəqliyyat infrastrukturuna uyğunluğu meyarları və tələbləri şəhərsalma və tikinti fəaliyyətini tənzimləyən normativ-hüquqi və normativ xarakterli aktlara daxil ediləcək.
O da məlumdur ki, zaman-zaman müxtəlif tikinti şirkətlərinin fəaliyyəti yol hərəkətinin təhlükəsizliyi tələblərinə uyğun olmayıb. Tikinti zamanı bu kimi məqamlar ya nəzərə alınmayıb, ya da qanundakı boşluqlardan istifadə edərək bunu görməzdən gəliblər. Bu da, nəticə etibarilə, yol hərəkətinin təhlükəsizliyinə mənfi təsir göstərib. Xüsusən də piyadaların təhlükəsizliyi üçün bir sıra risqlər yaradır. Məsələn, görürsən ki, böyük bir tikinti aparılıb, amma piyadaların hərəkəti üçün səki yoxdur.
Bütün bunlardan çıxış edərək şəhərsalma və tikinti sahəsində fəaliyyətin yol hərəkətinin təhlükəsizliyi tələblərinə uyğunlaşdırılmasının əhəmiyyətini ekspertlər necə dəyərləndirirlər?
Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, yeniliyin müsbət əhəmiyyəti olacaq: “İnzibati Xətalar Məcəlləsi və “Yol hərəkəti haqqında” Qanuna nəzər salsaq görərik ki, orada piyadalar üçün nəzərdə tutulan səkilərin tutulması inzibati xəta hesab olunur. Eyni zamanda, bunu pozan tərəf inzibati məsuliyyətə cəlb olunur. Dəfələrlə şahidi oluruq ki, tikinti şirkətləri tikinti meydançasının sahəsini genişləndirmək üçün bir sıra hallarda səkiləri zəbt edirlər. Hasarlama işlərini düz yolun üstündə aparırlar. Nəticə etibarilə tikinti meydançasının ərazisini böyütmüş olurlar, amma səkilər olmadığı üçün, piyadaların yolu bağlanır. Piyadalar da məhz nəqliyyat vasitələri üçün nəzərdə tutulan yollardan istifadə etməli olurlar. Bu da onların həyatını təhlükəyə atmış olur. Eyni zamanda, yollarda sıxlıq və gərginlik artır. Digər tərəfdən, piyada yolun qırağı ilə hərəkət edir. Bu zaman binanın üzərindən tikinti materialı piyadanın üzərinə düşə bilər. Gecə saatlarında bu kimi təhlükə dərəcəsi ikiqat artır. Ona görə də hesab edirəm ki, bu çox ciddi məqamdır. Müvafiq qurumlar bu kimi məsələlərə xüsusi diqqət yetirməlidirlər. Söhbət yol hərəkətinin təhlükəsizliyinin təmin olunmasından gedirsə, aparılan inşaat işləri buna uyğun olmalıdır. Yol hərəkəti təhlükəsizliyinin pozulmasına xidmət etməməlidir. Buna cavabdeh olan qurumlar var və "Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı"nda həmin qurumların adları sadalanıb. Burada hər bir qurum öz missiyasına və əsasnaməsinə uyğun olaraq bu kimi məqamlara diqqət etməlidir. Söhbət təkcə piyada səkilərinin tutulmasından getmir. Bəzi hallarda səki yerində qalır, amma qoruyucu vasitələr tikintinin yanında inşa olunmur. Belə hallar da var. Bütün hallarda, söhbət insan həyatından gedir. Hesab edirəm ki, sözügedən qanundan irəli gələn məsələlərin həlli bu kimi problemləri yoluna qoya bilər”.
Vidadi ORDAHALLI
