İsrafil Kərimov: “Ötən illərə nisbətən bu il Şaxta baba və Qar qız olmaq üçün müraciət edənlərin sayı azalıb” Aynur Musayeva: “Yaxşı olar ki, Yeni ilin personajları seçilərkən onları psixoloji testdən keçirsinlər. Sinir sistemi həssas olan şəxsləri bu işə cəlb etməsinlər”
Dünyanın hər yerində bütün insanlar Yeni ili eyni ümidlərlə - yeni uğurlar, xoşbəxtlik arzusu ilə gözləyirlər. Elə biz azərbaycanlılar da təqvim dəyişikliyindən yeniliklər gözləyirik. Artıq 2019-cu ilə qədəm qoymuşuq. Yeni il münasibətilə paytaxtın mərkəzi meydanlarında yolkalar bəzədilib. Sözsüz ki, bu süni şam ağaclarının yanında Yeni ilin ölməz atributları olan Şaxta baba və Qar qız da fəxri qarovulda dayanır. Onların əsas işi böyük və balacalarla birgə foto çəkdirməkdir.
Paytaxtda Yeni ilin daha çox coşqu ilə qarşılandığı Fəvvarələr bağında çoxlu sayda yolka bəzədilib. Onların yanında dayanan Şaxta baba və Qar qızla şəkil çəkdirmək isə 2-3 manata başa gəlir. Yolkanın ətrafında olan nağıl qəhrəmanları ilə isə foto çəkdirmək üçün valideyn mütləq 1 manat verməlidir.
Məlumat üçün bildirək ki, əksər xarici ölkələrdə Santa Klaus balacaları sevindirmək üçün onlara simvolik hədiyyələr verir. Azərbaycanda isə əksinədir, uşaqlar Şaxta babaya pul verir ki, onunla şəkil çəkdirsinlər. Təəssüf ki, əksər hallarda şaxta babalar uşaqlarla foto çəkdirərkən onlarla sərt davranırlar. Uşaqlar yolkaya yaxınlaşan kimi Şaxta baba dərhal 2 və 3 manat verilməsini istəyir. Hətta bəzən uşağın yanındaca valideynlərə bildirir ki, pul verilməsə, onun yanında dayanıb foto çəkdirə bilməz. Təbii ki, bu hal uşaqların Şaxta baba və Qar qızla bağlı düşüncələrinə təsir edir. Onlar xəyal etdikləri səhnə ilə rastlaşmadıqları üçün, bu hal uşaqların psixologiyasına mənfi təsir edir.
Qeyd edək ki, Şaxta baba və Qar qız kimi fəaliyyət göstərmək üçün rüsum məbləği 60 manatdır. Bu rüsumu ödəyən cütlük Bakıda fəaliyyət göstərə bilər.
Maraqlıdır, Yeni ilin atributları sayılan Şaxta baba və Qar qız psixoloji testdən keçirilirmi?
Bakı Şəhər İcra Hakimiyyətinin Mətbuat xidmətinin rəhbəri İsrafil Kərimov “Bakı-Xəbər”ə açıqlamasında qeyd etdi ki, ötən illərə nisbətən bu il Şaxta baba və Qar qız olmaq üçün müraciət edənlərin sayı azalıb.
Şaxta baba və Qar qızın psixoloji testdən keçirilməsinə gəlincə, İ.Kərimov bildirdi ki, bununla bağlı hər hansı bir məlumat olmadığı üçün, bu barədə fikir deyə bilməyəcək.
“Jaləm” Uşaq İnkişaf Mərkəzinin direktoru, psixoloq Aynur Musayeva bizimlə söhbətində qeyd etdi ki, Yeni il bayramı ərəfəsində uşaqlar Şaxta baba, Qar qız və digər personajları görmək, onlarla şəkil çəkdirmək istəyirlər: “Uşaqlar yolkanın ətrafında dayanan Şaxta babaya yaxınlaşıb ona öz aləmlərində nəsə demək istəyirlər. Onun hədiyyə verməsini gözləyir və ya sevdiyi şeiri Şaxta babaya deməyi arzulayırlar. Təəssüf ki, Şaxta baba və digər personajlar uşaqları əyləndirməyi deyil, onlardan əldə edəcəyi qazancı düşünürlər. Əgər valideyn ona yaxınlaşmaq üçün müəyyən məbləğdə vəsait ödəməsə, uşaq Şaxta babaya kənardan baxmalı olacaq. Belə olan halda, uşaqlar sevimli personajlarının onlara qarşı kobud davranışını qəbul edə bilmirlər. Çünki onlar xəyal etdikləri səhnəni realda görmədikləri üçün təəssüflənirlər. Yolka ətrafında dayanan Şaxta babanın uşaq və ya valideyndən foto çəkdirmək üçün 2-3 manat tələb etməsi uşaqla yanaşı, valideynə də mənfi təsir edir. Yaxşı olar ki, Yeni ilin personajları seçilərkən onları psixoloji testdən keçirsinlər. Sinir sistemi həssas olan şəxsləri bu işə cəlb etməsinlər”.
Günel CƏLİLOVA
