Aydın Mirzəzadə: “Azərbaycan dövlətinin qaçqınların və məcburi köçkünlərin sosial məsələlərinin həlli istiqamətində gördüyü tədbirlər dünyada çox nadir təcrübədir”
Qaçqın və məcburi köçkünlərin problemlərinin həlli Azərbaycan dövlətinin daim diqqət mərkəzindədir. Onların mənzil-məişət şəraitinin yaxşılaşdırılması üçün ardıcıl tədbirlər davam etdirilir. Məcburi köçkünlərin müvəqqəti yaşayış yerləri və çadırlardan müasir tələblər səviyyəsində inşa edilən qəsəbələrə köçürülməsi dövlətin bu insanlara göstərdiyi diqqətin təzahürüdür. Bu təbəqədən olan vətəndaşların maddi rifahının yaxşılaşdırılması üçün dövlət proqramları qəbul edilib, sosial müavinətlərin artırılması istiqamətində mühüm tədbirlər görülüb.
Məlumat üçün bildirək ki, indiyədək 53 mindən çox ailənin və ya 300 mindən çox qaçqın və məcburi köçkünün mənzil şəraiti yaxşılaşdırılıb. Darısqal və uçuq-sökük, yaşayış üçün heç bir şəraiti olmayan yataqxana binalarından yeni salınmış qəsəbələrdə geniş və yaraşıqlı mənzillərə köçürülmüş məcburi köçkünlər bu günün həsrətini çox çəkiblər. Onlar düz 25 il rahat və təmiz bir mənzildə yaşamağın xəyalını qurublar. Bu xəyallar artıq gerçəkləşib. Azərbaycan dövlətinin qayğısı, ölkə başçısının həssas münasibəti sayəsində hər il yüzlərlə məcburi köçkün ailəsi yaşayış üçün yararlı olmayan yataqxanalardan, zirzəmilərdən hər cür məişət şəraiti olan tam təmirli mənzillərə köçürülür. Bu, yurd həsrəti ilə yaşayan məcburi köçkün soydaşlarımızın işğal altındakı torpaqlarımıza qayıdacığı günün çox da uzaqda olmadığına inamını artırır.
Məcburi köçkünlər üçün yaşayış binaları ölkənin bütün bölgələrində inşa olunur. O cümlədən, işğaldan azad olunmuş ərazilərdə də hələlik bu yöndə iki nümunəni göstərə bilərik. İşğaldan azad edilmiş Cəbrayıl rayonunun Cocuq Mərcanlı kəndində 150 ev inşa olunaraq əhalinin istifadəsinə verilib. Eyni zamanda, Tərtər rayonunda işğaldan azad olunan ərazilərdə, o cümlədən Şıxarx qəsəbəsində məcburi köçkünlərin sosial şəraitinin yaxşılaşdırılması üçün ciddi addımlar atılıb.
İşğaldan azad olunmuş ərazilərdə məcburi köçkünlərin sosial həyatının yaxşılaşdırılması istiqamətində onlar üçün mənzillərin istifadəyə verilməsi dövlətin bu sahəyə diqqətinin bariz nümunəsidir. Heç şübhə yoxdur ki, ərazilər işğaldan azad edildikcə, belə qəsəbələr salınacaq.
Millət vəkili Aydın Mirzəzadə qeyd etdi ki, ölkə başçısı məcburi köçkünlərin mənzillə təmin edilməsi kimi olduqca məsuliyyətli bir işi üzərinə götürüb: “Dünyanın heç bir ölkəsində məcburi köçkünlərin sosial problemlərini bu cür yüksək səviyyədə həll etmirlər. Bu günə qədər təxminən 200 mindən çox məcburi köçkün dövlət hesabına mənzillə təmin edilib. Bu il isə onların sayı rekord dərəcədədir: 5800 ailə, yəni 20 min nəfər məcburi köçkünün mənzil şəraiti yaxşılaşdırılıb. Bunun özü bir daha göstərir ki, vətəndaşın sosial problemlərinin həll edilməsi dövlətimizin daim diqqətindədir”.
Millət vəkilinin sözlərinə görə, son illərdə qaçqınlar və məcburi köçkünlər üçün bütün zəruri infrastrukturla təchiz olunmuş qəsəbələr salınıb, çoxmərtəbəli binalar inşa olunub. Qaçqınların və məcburi köçkünlərin sağlamlıqlarının təmini, sosial durumlarının yaxşılaşdırılması, məşğulluqlarının artırılması və digər məsələlərlə bağlı bir sıra mühüm işlər görülüb: “Bu işlərə Heydər Əliyev Fondunun həyata keçirdiyi layihələr də töhfə verir. Ümumiyyətlə, Azərbaycan dövlətinin qaçqınların və məcburi köçkünlərin sosial məsələlərinin həlli istiqamətində gördüyü tədbirlər dünyada çox nadir təcrübədir. Bu təcrübə bütün beynəlxalq təşkilatlar tərəfindən çox yüksək qiymətləndirilir və ondan istifadə olunur.
İşğaldan azad edilmiş və ediləcək ərazilərdə dövlətimiz vətəndaşlarımız üçün bütün əlverişli şəraiti yaradır və yaradacaq”.
Günel CƏLİLOVA
