Azər Allahverənov: “Tramvayın yenidən bərpa olunması tək iqtisadiyyata deyil, eyni zamanda, ekologiyaya da müsbət təsir edəcək”
2019-2023-cü illərdə Azərbaycanda mövcud ictimai nəqliyyat infrastrukturunun inkişaf etdirilməsi, habelə şəhərdaxili ictimai nəqliyyat növlərinin sayının artırılması, tramvay, kabotaj sərnişin və yük gəmiçiliyinin təşkili imkanlarının və iqtisadi səmərəliliyinin araşdırılması, bu sahədə təkliflər hazırlanması nəzərdə tutulub.
Bu, Prezident İlham Əliyevin 27 dekabr 2018-ci il tarixli Sərəncamı ilə təsdiq edilmiş “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nda nəzərdə tutulur. Qeyd edək ki, bu sahədə əsas icraçı qurum Nəqliyyat, Rabitə və Yüksək Texnologiyalar Nazirliyidir.
Bakı küçələrində yenidən tramvayların hərəkətinin bərpası sahəsində işlərin görülməsi ekspertlər tərəfindən müsbət qarşılanır. Onların fikrincə, tramvayların yenidən istifadəyə verilməsi şəhərdə nəqliyyat sıxlığının qarşısını alacaq.
Nəqliyyat eksperti Azər Allahverənov “Bakı-Xəbər”ə açıqlamasında qeyd etdi ki, Azərbaycanda yol hərəkətinin təhlükəsizliyi ilə bağlı 2019-2023-cü illər üçün Dövlət Proqramı qəbul olunub. Sevindirici haldır ki, Dövlət Proqramında tramvaylarla bağlı məsələ öz əksini tapıb: “Bu günə qədər Bakı küçələrində tramvayların yenidən hərəkətdə olmasına dair müxtəlif fikirlər səslənirdi. Tramvay hərəkəti yenidən bərpa olunmalıdır. Nəzərə almaq lazımdır ki, qeyd olunan nəqliyyat vasitəsinin hərəkətinin bərpa olunması tək iqtisadiyyata deyil, eyni zamanda, ekologiyaya da müsbət təsir edəcək. İlk olaraq bildirim ki, ətraf mühitin mühafizəsi baxımından çox sərfəli nəqliyyat vasitəsidir. Digər nəqliyyat vasitələrinin havaya buraxdıqları tullantıların zərəri kifayət qədər yüksəkdir. Amma tramvaylarda bu yoxdur.
Dünya təcrübəsinə nəzər salsaq görərik ki, tramvayların iştirakı ilə bağlı baş verən qəzalar yox səviyyəsindədir. Bu səbəbdən də tramvay təhlükəsiz nəqliyyat növü hesab olunur. Həmçinin, tramvay ucuz nəqliyyat vasitəsidir. Çünki bu nəqliyyat vasitəsi elektrik enerjisi ilə işləyir. Bəllidir ki, böyük tıxaclar olan şəhərlərdə xüsusilə tramvaylar tətbiq edilir. Çünki tramvaylar onlar üçün ayrılmış yollarla hərəkət edirlər və onların tıxacda qalması minimuma endirilir və beləliklə, mənzil başına vaxtında çatır. Bu da insanların vaxt itkisinin qarşısını alır".
A.Allahverənovun sözlərinə görə, tramvayların Bakı şəhərində istifadəyə verilməsi birmənalı qarşılanmır: "Müxtəlif dairələr bu ideyanı hətta mümkünsüz hesab edirlər. Bunu da onunla əlaqələndirirlər ki, yol infrastrukturu yeni tramvay xətlərinin salınmasına imkan vermir. Bəzi yollar isə, ümumiyyətlə, tramvayların istifadəsi üçün nəzərdə tutulmayıb. Təbii ki, Bakı şəhərinin bütün ərazilərində tramvay xətlərinin salınmasından söhbət gedə bilməz. Məsələn, bir sıra prospektlər var ki, kifayət qədər genişdir və bu yollarda tramvay xətlərinin salınması mümkündür. Aidiyyəti qurumlar bununla bağlı araşdırma aparmalı, rəylər verməlidirlər. Yeni yollar salınarkən adıçəkilən nəqliyyat növünün tətbiqi məsələsi nəzərə alınmalıdır. Bu gün “Ağ Şəhər” tikilir. Burada ictimai nəqliyyat kimi tramvaydan da istifadə oluna bilər. Ümumiyyətlə, yeni salınan yollarda tramvay yolu mütləq nəzərə alınmalıdır”.
Günel CƏLİLOVA
