Elçin Rüstəmov: “Rusiyalı turistlər daha çox çimərlik turizminə üstünlük verir, bu səbəbdən də onlar Azərbaycana üz tuturlar”
Hazırda dünya ölkələri arasında iqtisadi əlaqələrin sürətlə inkişaf etdiyi bir dövrdə beynəlxalq turizm xarici iqtisadi fəaliyyətin ən dinamik inkişaf edən sahələrindən birinə çevrilib. Ümumiyyətlə, turizm xidmətin xüsusi bir sahəsi olmaqla, insanların beynəlxalq hərəkəti və yaxud səyahəti ilə bağlıdır və bu sahənin inkişafı XX əsrin ikinci yarısından başlayaraq geniş vüsət alıb.
Bu bir həqiqətdir ki, müstəqilliyini bərpa etdikdən sonra yeni ictimai-iqtisadi inkişaf yoluna qədəm qoyan, açıq bazar iqtisadiyyatı sisteminin tələbləri əsasında inkişaf edən Azərbaycan beynəlxalq aləmə inteqrasiya prosesləri çərçivəsində dünya dövlətləri ilə iqtisadi əlaqələrini genişləndirib. Artıq xarici ölkə vətəndaşları istirahət üçün məhz ölkəmizi seçirlər. Onlar arasında Rusiya vətəndaşları üstünlük təşkil edirlər. Açıqlanan statistik rəqəmlər də bunu təsdiq edir.
Bu günlərdə “Rossiya-24” telekanalına müsahibə verən Azərbaycan Respublikasının Prezidenti İlham Əliyev adıçəkilən ölkədən ölkəmizə gələn turistlər haqqında danışıb. Prezident qeyd edib ki, bu il 800 mindən çox rusiyalı ölkəmizə gəlib və özlərini evdəki kimi çox rahat hiss edirlər: “Belə ki, bizim münasibətlərimiz çox zəngindir və düşünürəm ki, qonşuların öz münasibətlərini necə qurması üçün yaxşı nümunədir”.
Qeyd edək ki, Rusiya vətəndaşları hər zaman Azərbaycana gəlməyə maraq göstəriblər.
"New ERA Travel” şirkətinin direktoru, turizm eksperti Elçin Rüstəmov “Bakı-Xəbər”ə açıqlamasında qeyd etdi ki, son illər turizm sektorunun inkişafı istiqamətində görülən işlər səyahətçilərin ölkəmizə gəlməsinə səbəb olur: “İstənilən ölkənin vətəndaşı istirahət üçün ölkəmizə gəlir. Bu sevindirici haldır. Ölkəmizdə bir dəfə olmuş turist yenidən Bakıda gəlmək istəyir. Bunun əsas səbəbi ölkəmizdə sabitliyin hökm sürməsidir”.
E.Rüstəmov onu da qeyd etdi ki, ölkəmizə səyahət edənlər arasında rusiyalı vətəndaşların üstünlük təşkil etməsi gözlənilən haldır. Çünki tarixən qeyd olunan ölkənin vətəndaşları istirahət üçün məhz Azərbaycanı seçirlər: “Rusiyalı turistlər daha çox çimərlik turizminə üstünlük verirlər. Bu səbəbdən də onlar Azərbaycana üz tuturlar. Çimərlik turizmi istiqamətində turistlərin Azərbaycanı seçməsinin müəyyən səbəbləri var. Türkiyədə olan ruslar Azərbaycana gələndə qiymət fərqini hiss edirlər. Onlar Türkiyədə xərclədikləri vəsaitdən daha az məbləği Azərbaycanda sərf edirlər. Bu səbəbdən də ruslar ölkəmizə üstünlük verirlər. Həmçinin, məsafənin qısa olması Rusiya vətəndaşlarının ölkəmizi seçməsinə səbəb olur. Rus turistlərinin yola sərf etdikləri vəsait və çimərliklərdə xərclədiklərini toplayanda bu onlar üçün daha cəlbedici görünür”.
Həmsöhbətimizin sözlərinə görə, Rusiya ilə Azərbaycanın qonşu ölkə olması səfər edən turistlərin sayına təsir edir: “Nəzərə almaq lazımdır ki, qonşu ölkələrin vətəndaşlarının səfərlər etməsi üçün nəqliyyat xərci yüksək olmur. Bu baxımdan rusiyalı turistlər səyahət üçün ölkəmizə gəlirlər.
Həmçinin, dünyada analoqu olmayan Naftalan nefti də qonşu ölkənin turistlərinin marağındadır. Qış mövsümündə, yeni il ərəfəsində isə Rusiya vətəndaşları Bakıya gəlməyə, eləcə də “Şahdağ” Qış-Yay Turizm Kompleksinə getməyə üstünlük verirlər”.
Günel CƏLİLOVA
