Kamran Əsədov: “Hesab edirəm ki, müəllimlərə dövlət qulluqçusu statusu verməklə, bundan sonra onları bütün kommunal və nəqliyyat xərclərindən azad etməklə maddi rifahının yaxşılaşdırılması istiqamətində mühüm addım atmış olarıq”
Dünyada müqəddəs sənət müəllimlik sənətidir desək yanılmarıq. Müəllim adına dünyanın dahi şəxsiyyətləri, dövlət xadimləri çox yüksək qiymət veriblər. Ölkəmizdə müəllim adını ləyaqətlə daşıyan, onu sevdirən pedaqoqlar az olmayıb.
Qarşıdan Azərbaycan müəllimlərinin qurultayı gəlir. Noyabrın 28-də Azərbaycan Müəllimlərinin XV qurultayı keçiriləcək. Respublika müəllimləri bu mühüm tədbirə hazırlaşır.
Xatırladaq ki, Azərbaycan Müəllimlərinin I Qurultayı 1906-cı il 15 avqust tarixində keçirilib.
Müasir Azərbaycan müəlliminin nə kimi problemləri var?
Tanınmış təhsil eksperti Kamran Əsədov “Bakı-Xəbər”ə bildirdi ki, Azərbaycan müəllimləri XV qurultaya qayğısız getmir, müəlimlərin kifayət qədər problemi var və onlar həll edilməlidir. “İlk növbədə qeyd edim ki, insanın şəxsiyyət kimi formalaşmasında, onun təhsil və inkişafında müəllimin rolu danılmazdır. Bütün dövrlərdə müəllim peşəsinin əhəmiyyəti, şərəfliliyi, yüksəkliyi barədə müdrik kəlamlar söyləyiblər. Dünyanın fatehi Makedoniyalı İsgəndər öz müəllimi Aristotel haqqında deyib: “Valideynlərim məni göydən yerə endirdi, müəllimim isə yerdən göyə qaldırdı”. Bu kimi kifayət qədər dahilərin sözləri var.
Çox vaxtı şikayət edirlər ki, əvvəllər təhsil yüksək səviyyədə idi, müəllim-şagird münasibətləri indiki dövrdən qat-qat yaxşı idi, müəllimlərin bilik səviyyəsi çox yüksək idi, cəmiyyətdə onlara münasibət tamam başqa idi, müəllim cəmiyyətdə daim öz nüfuz və statusunu qoruyub saxlamağa çalışırdı. Bəs nə oldu ki, indi vəziyyət dəyişdi? Müəllim tədricən öz nüfuzunu itirməyə başladı. Məktəbdə müəllim-şagird münasibətləri dəyişməyə başladı. Cəmiyyət yeni yola, bazar iqtisadiyyatına qədəm qoydu. Etiraf edək ki, bazar iqtisadiyyatının fəaliyyəti dövründə aşağı səviyyəli əməkhaqqı alan müəllim öz maddi vəziyyətini düzəltmək üçün əyri yola əl atdı. Təhsilin bəlası o vaxtdan başladı. Şagirddən hədiyyə, pay, aylıq və sair, nə adlandırırsan-adlandır, alan müəllim şagirdin gözünə dik baxa bilmir, mənəvi cəhətdən özünü saf hesab etmir. İş o yerə çatdı ki, cəmiyyətdə bu geniş yayılmağa başladı və gündəlik məişət hadisəsinə çevrildi. Hətta ictimaiyyətdə rəy sorğusu aparılan zaman korrupsiyanın səviyyəsinə görə müəllim yol polisi işçilərindən sonra ikinci yeri tutdu.
Amma etiraf edək ki, son illərdə müəllimlərin nüfuzu müəyyən qədər aşağı düşüb. Baxmayaraq ki, dövlət tərəfindən müəllimin nüfuzunun qaldırılması üçün mütəmadi addımlar atılır.
Məktəb son dərəcədə həssas təsisatdır. Burada çalışanlar maddi, mənəvi, psixoloji baxımdan tam təmin olunmalıdırlar ki, verdikləri təhsil keyfiyyətli olsun. Müəllimlik peşəsi şərəfli olduğu qədər də məsuliyyətli bir işdir. Amma təəssüf ki, bu vəzifəni yerinə yetirən, amma məsuliyyətini dərk etməyən müəllimlər də az deyil. Əlbəttdə ki, onların bütün ehtiyaclarının təmin olunması onda formalaşmış problemi həll etməyəcək.
Düşünürəm ki, bu gün müəllimlərin ən birinci problemi əməkhaqqı ilə bağlıdır. Hesab edirəm ki, müəllimlərə dövlət qulluqçusu statusu vermək, bundan sonra onları bütün kommunal və nəqliyyat xərclərindən azad etməklə maddi rifahının yaxşılaşdırılması istiqamətində mühüm addım atmış olarıq. Eyni zamanda, müəllimlərin hamısını tibbi sığortaya mütləq şəkildə cəlb etmək lazımdır.
Hazırda gənclərin müəllimlərin sayında payı azdır. Dövlət tərəfindən gənc müəllimlərin mənzil problemi həll olunarsa, onların müəllimlik peşəsinə cəlb olunması genişlənər. Düşünürəm ki, ən başda müəllimi dolandıra biləcək, onun minimum tələblərini ödəyə bilən əməkhaqqı vermək lazımdır” - deyə K.Əsədov bildirdi.
K.Əsədovun sözlərinə görə, müəllimlərin problemlərindən biri onların peşə səviyyəsinin aşağı olmasıdır. O təəssüflə bildirdi ki, peşəkar müəllim ordusunun sayı azdır. “Müəllimlərin digər bir problemi təhsildə yeniliyə, fəal təlim metodlarına münasibətidir. Mənə elə gəlir ki, indi də, gələcəkdə də ən böyük problem bu sahədə olacaq. Təəssüf ki, müəllimlərimiz yeniliyə maraqlı deyil və tətbiq etməkdə fəal deyillər. Müasir dövrün müəllimi yeniliyə meylli deyil. O, düşüncə tərzini, iş üsulunu dəyişmək fikrində deyil. Müəllimlərin ən böyük problemlərindən biri də müəllim-şagird münasibətləri problemidir. Təhsil müəssisəsində, demək olar ki, vaxtın çoxu bu problemin həllinə sərf olunur. Təəssüf ki, bu məsələdə də vəziyyət ürəkaçan deyil” - deyə K.Əsədov vurğuladı.
İradə SARIYEVA
