Kamran Əsədov: “Düşünürəm ki, imtahan prosesini daha da təkmilləşdirmək, müsabiqə və müsahibədən uğurla keçənləri təlimlərə cəlb etmək, ardınca peşəkar direktorların yanına müşavir kimi təyin etmək lazımdır”
Məlum olduğu kimi, 22 noyabrda dövlət ümumi təhsil müəssisələrinin direktoru vəzifəsinə işə qəbul üzrə müsabiqənin imtahan mərhələsinə start verilib. 24 noyabr tarixində başa çatacaq müsabiqənin keçirildiyi Azərbaycan Dövlət İqtisad Universitetinin (UNEC) 2 saylı tədris binasına mediatur təşkil olunub. Noyabrın 23-də bir sıra media və ictimai qurumların nümayəndələri direktorların işə qəbulu üzrə imtahanın gedişini yaxından izləyib, namizədlər üçün yaradılan şəraitlə tanış olublar.
2018-2019-cu tədris ili üçün dövlət ümumtəhsil müəssisələrinə direktor vəzifəsinə işə qəbul üzrə müsabiqənin imtahan mərhələsində 2000-dən artıq müəllimin iştirak etməsi məlumdur.
Qeyd edək ki, məktəb direktorlarının işə qəbulu üzrə müsabiqəyə ölkə üzrə 700-dək vakant yer çıxarılıb.
Müsabiqənin gedişinə münasibət bildirən tanınmış təhsil eksperti Kamran Əsədov “Bakı-Xəbər”ə bildirdi ki, məktəb direktoru vəzifəsinə iddialı olan şəxslərin bu sahəyə imtahanla qəbul edilməsi müsbət haldır. “Sözsüz ki, dövlət ümumtəhsil müəssisələrinə direktor vəzifəsinə işə qəbul üzrə müsabiqənin bu şəkildə keçməsi çox müsbətdir. Test imtahanlarında şəffaflıq, obyektivlik tam təmin olunur” - deyə bildirən K.Əsədovun sözlərinə görə, imtahan verərək məktəb direktoru vəzifəsini qazanan, lakin heç bir rəhbərlik təcrübəsi olmayan insanlar, mütləq mənada, təkmilləşdirməyə cəlb edilməlidirlər. İlk növbədə qeyd etmək istəyirəm ki, əlbəttə, Azərbaycan təhsilində 2014-cü ildən təşkilati məsələlərlə bağlı ciddi şəkildə müsbətə doğru irəliləyişlər baş verib. Konkret olaraq təhsildə rüşvətə son qoyulması kimi məsələ meydana çıxarıldı. Sözsüz ki, söhbət orta ümumtəhsil məktəblərindən gedir. Təəssüf ki, ali məktəblərdə bununla bağlı hər hansı bir addım, irəliləyiş yoxdur. Söhbət ondan gedir ki, orta məktəblərdə müəllimlərin, məktəb direktorlarının əsassız tələbləri müəyyən qədər azalıb. Təbii ki, bu halın tam başa çatması mümkün deyil. 2014-ci ildən etibarən Təhsil Nazirliyi orta ümumtəhsil məktəblərində işləmək üçün direktorları ilk dəfə olaraq bir neçə mərhələli müsabiqə ilə seçməyə başladı. Sözsüz, ümumilikdə, bu müsabiqənin özünü müsbət adlandırmaq olar. Ancaq seçim üçün 3 aylıq təlim, test və müsahibə kifayət deyil. Mən sizə statistik məlumatlar deyim. Bakı üzrə 317 məktəbdən 70-ə yaxınının direktoru müsabiqə yolu ilə seçilib. Azərbaycan üzrə isə 4500 məktəbdən cəmi 340-a yaxınının direktoru bu müsabiqə ilə təyin olunub. 4500 rəqəminin yanında bu, aşağı rəqəmdir. Təəssüflər olsun ki, hətta 10, 20, 25, 30 il direktor vəzifəsində çalışan şəxslər var ki, onlar bu müddət ərzində təhsilə yox, yalnız özlərinə xidmət edib, məktəblərdə qeyri-şəffaf mühit yaradıblar. Onların yerinə gələn təzə direktorlar isə bu mühitdə çalışa bilmirlər. Çünki məhz köhnə qaydalara öyrənən köhnə kollektiv yenilik gətirmək istəyən yeni şəxsi qəbul etmək istəmir. Ona görə ki, onlar da direktorla bərabər əməkhaqqından əlavə digər gəlirlər əldə edirdilər.
Hesab edirəm ki, məktəb direktorunun bu vəzifəni tutması üçün onun imtahandan keçməsi kifayət etmir. Test mərhələsində təqdim edilmiş test tapşırıqları tam şəkildə təhsilin miqyasını əhatə etmir. Orada təqdim edilmiş suallar iddiaçıların problemli situasiyadan çıxış imkanlarını yoxlaya bilmir, iddiaçıların psixoloji durumunu yoxlamağa imkan vermir. Düşünürəm ki, imtahan prosesini daha da təkmilləşdirmək, müsabiqə və müsahibədən uğurla keçənləri təlimlərə cəlb etmək, ardınca peşəkar direktorların yanına müşavir kimi təyin etmək lazımdır. Bundan sonra onların təyinatını həyata keçirmək olar. Çünki təcrübəsiz şəxslərin adi test yolu ilə qəbul edilməsi daha ciddi fəsadlara yol aça bilər” - deyə K.Əsədov vurğuladı.
İradə SARIYEVA
