Bu gün istənilən ölkədə olduğu kimi, Azərbaycanda da vəkilliyin müstəqilliyinin təşəkkül tapması yalnız Vəkillər Kollegiyasının əlində olan məsələ deyil. “Trend”in məlumatına görə, bu barədə Azərbaycan Vəkillər Kollegiyasının sədri Anar Bağırov “Vəkillərin rolu və müstəqilliyi: müqayisəli perspektivlər” mövzusunda keçirilən beynəlxalq konfransda deyib.
O bildirib ki, vəkilliyin müstəqilliyi məsələsinə kompleks yanaşılmalı və bu müstəqillikdə dövlətin özü bilavasitə maraqlı olmalıdır: "Əslində normal, demokratik və tarazlı dövlət idarəçiliyi, habelə cəmiyyətdə sivil hüquqi münasibətlərin bərqərar olmasında vəkil peşəsinin rolu əvəzsizdir. Bu mənada vəkillik ictimai münasibətlərin daha təkmil fazaya keçidində və onun təkamülündə faydalı institutdur, hətta antibiotikdir desəm, yanılmaram. Mənə görə vəkillik dövlət və cəmiyyət arasında münasibətlərin stabilizatorudur. Bu mənada, praqmatik idarəçiliyi olan ölkələrdə dövlət vəkilliyin inkişafında, şübhəsiz ki, maraqlı olacaq. Azərbaycan Prezidentinin “Azərbaycan Respublikasında vəkilliyin inkişafı ilə bağlı əlavə tədbirlər haqqında” 22 fevral 2018-ci il tarixli sərəncamı bizim institutun inkişafında dövlətin nə dərəcədə maraqlı olduğunu sübut edir və həm vəkilliyin, həm də insanlar üçün keyfiyyətli hüquqi yardımın əlçatan olması baxımıdan bu sənəd əvəzsizdir. Dövlət özü vətəndaşının hüquqlarının keyfiyyətli müdafiəsində maraqlı olmalıdır. Bu, onun ən azından konstitusion vəzifəsidir".
A.Bağırovun sözlərinə görə, bu gün Vəkillər Kollegiyası əlindən gələni edir ki, həm vəkillərin öz aralarında, həm vəkillərlə Vəkillər Kollegiyası arasında, həm də vəkillərlə üçüncü tərəflər arasında yaranan münasibətlər daha peşəkar və korporativləşmiş olsun: "Unutmayaq ki, bu gün vəkillər məhkəmə hakimiyyətinin özünü idarə etməsi işində - Məhkəmə Hüquq Şurasının və Hakimlərin Seçki Komitəsinin işində iştirak edir".
Azərbaycanda vəkillərin sayının hazırda 1500 nəfərdən çox olduğunu deyən Anar Bağırovun sözlərinə görə, artıq vəkillər sırasında gənclərin sayı artmaqdadır: "Biz 535 nəfəri vəkilliyə qəbul etmişik. Bunların əksəriyyəti 40 yaşına qədər olan gənclərdir. Biz sevinirik ki, cavanlar vəkilliyə üz tutur. Məhkəmələrdə, dövlət qurumlarında, polis və prokurorluqda işləyən hüquqşünaslar vəkilliyə üz tuturlar. Təbii ki, vəkillərin sayı daha da artacaq".
A.Bağırov vəkilliyə qəbul prosesinin asanlaşdırılmasına da münasibət bildirib. O, qeyd edib ki, bu prosesdə vəkillərin savadının artırılmasına da diqqət yetirilir: "Deyirlər ki, qəbul asanlaşdırılıb. Biz namizədlərin savadını artırmaq üçün təlimlər və kurslar təşkil edəcəyik ki, onlar vəkilliyə daha yaxşı hazırlaşsınlar. Hazırda sənəd qəbulu üzrə onlayn sistem yaratmışıq ki, rayonlarda olan insanlar əziyyət çəkməsin. Biz həmçinin işə qəbul üçün namizədlərin iş təcrübəsini azaltmışıq. Bu isə vəkilliyə qəbulda maneələri aradan qaldırır".
