Qış fəsli olmasına baxmayaraq, Bakının bir sıra rayonlarının sakinləri susuzluqdan əziyyət çəkir. Belə bir hal Xəzər rayonu, Şağan qəsəbəsində də müşahidə olunur.
Şağan qəsəbəsi, 4-cü Şağan küçəsi, giriş 177 ünvanında yaşayan sakinlər bildirir ki, uzun müddətdir həmin ərazidə su xətti çəkilib, sayğaclar quraşdırılıb, lakin buna baxmayaraq, evlərə suyun verilişi hələ də təmin olunmayıb. Sakinlər iddia edir ki, əraziyə suyun gəlməməsi onların gündəlik həyatını çətinləşdirir və gündəlik ehtiyaclarını ödəməkdə böyük maneələr yaradır: “Aidiyyəti qurumlarla dəfələrlə əlaqə saxlasaq da, hələ ki, konkret nəticə əldə edilməyib və su problemi davam etməkdədir. Susuz yaşayış yaşayış deyil”.
İri Şəhərlərin Birləşmiş Su Təchizatı Xidməti: “Xəttin qəzalı hissəsinin dəyişdirilməsi istiqamətində bərpa işləri icra edilir”
İri Şəhərlərin Birləşmiş Su Təchizatı Xidmətindən “Bakı-Xəbər”ə bildirildi ki, əraziyə baxış keçirilib: “Baxış zamanı şəbəkədə nasazlıq olduğu müəyyənləşdirilib. Hazırda xəttin qəzalı hissəsinin dəyişdirilməsi istiqamətində bərpa işləri icra edilir”.
Elxan Əliyev: “Əhalinin su təminatı ilə bağlı məsələlər Bakının köhnə problemidir”
Sosial sahə üzrə ekspert Elxan Əliyev “Bakı-Xəbər”ə şərhində bildirdi ki, əhalinin su təminatı ilə bağlı məsələlər Bakının köhnə problemidir: “Bakı çoxsaylı mənbələrdən su ilə təmin olunur və bu mənbələr ərazi üzrə paylanılır. Təəssüf ki, təmir işləri elektrik şəbəkəsi kimi deyil ki, tez mənbəni dəyişəsən. Kanalizasiya xətləri, su boruları əvvəlcədən planlaşdırılır və o üzrə də paylanılır. Paytaxtın su ehtiyacı ilbəil artır, kəmərlər və su şəbəkəsində gərginlik artır. Su təsərrüfatı rəsmiləri hər dəfə günahı əhalinin üstünə atmağa çalışsa da, problem təkcə su israfı ilə bağlı deyil. Daha doğrusu, əhalinin israfı ilə bağlı deyil. İçməli suyu, əsasən, müəssisələr və yaşıllıq təsərrüfatları daha çox istifadə edir. Əhali lazım olan qədər istifadə edir, çünki heç kim artıq su pulu ödəməyi xoşlamır”.
Günel CƏLİLOVA
