Pərvanə Mustafayeva: “Trendlərin yaranması və yayılması insanların təqlid etmə həvəsindən qaynaqlanır”
Son zamanlar sosial şəbəkədə yeni trend yayılıb. Belə ki, gənclər arasında yayılan bu trenddə bəzi yeniyetmələr qol nahiyələrində aerozol tipli dezodorantlardan istifadə etməklə bilərəkdən qəribə izlər yaradırlar.
Onu da bildirək ki, bu trend tək Azərbaycanda deyil, xarici ölkələrdə də geniş yayılıb. Hətta buna “Deodorant Challenge” (dezodorant çağırışı) deyə ad belə verilib.
Belə ki, yeniyetmələr dezodorantı dəriyə çox yaxın məsafədən uzun müddət sıxaraq saxlayır, nəticədə qol nahiyəsində yumru formalı, yanıqlara bənzər izlər əmələ gəlir. Ancaq ekspertlər bu cür hərəkətin düzgün olmadığını, dəri yanığına səbəb olacağını iddia edir.
“Dezodorant uzun müddət dəri ilə təmasda olduqda yaxşı halda dəri yanığı, dəri zədələnməsi baş verə bilər”
Həkim Pərvanə Mustafayeva “Bakı-Xəbər”ə şərhində bildirdi ki, valideynlər övladının sosial şəbəkədə nəyə baxdığını, nələrə maraq göstərdiyini diqqətdə saxlamalıdır: “Son zamanlar sosial şəbəkədə müxtəlif trendlər yayılır. Gənclər də maraqla həmin trendlərə qoşulur. Bu günlərdə dezodorant çağırışı adlı yeni trend yayılıb. Ancaq bunu edənlər bilmir ki, dezodarant uzun müddət dəri ilə təmasda olduqda yaxşı halda dəri yanığı, dəri zədələnməsi baş verə bilər. Məlumat üçün bildirim ki, dezodorantların tərkibində olan metil, etil, propil, benzil, butil kimi kimyəvi maddələr olduqca təhlükəlidir. Dəriyə tətbiq edilən bəzi məhsullar birbaşa bədənə daxil olaraq kapilyar damarların yolu ilə qan dövranına qarışa bilir. Nəticədə xoşagəlməz hallar yarana bilər”.
Həmsöhbətimiz onu da əlavə etdi ki, trendlərin yaranması və yayılması insanların təqlid etmə həvəsindən qaynaqlanır: “Trendin yaranması və bütün cəmiyyətlərdə təkrarlanması sadəcə insanların təqlid etmə meyli ilə bağlıdır. Bəzən isə belə trendlər cəmiyyətin müəyyən qruplarının reputasiyasına təsir edir. Məsələn, gənclərin dezodorantla bədənin müəyyən hissəsini yandırması, yeyiləsi mümkün olmayan nəsnələrin yeyilməsi kimi videolar trend olub. Ancaq bu kimi trendlərin heç bir sosial-ictimai faydası yoxdur”.
Günel CƏLİLOVA
