İlham Əhmədov: "DİM sədrinin marker müəllimlərlə bağlı şikayətinin əsası var, ancaq.."
"Müəyyən sahələrdə marker müəllimlərin çatışmazlığı var". Bunu müsahibəsində Dövlət İmtahan Mərkəzinin sədri Məleykə Abbaszadə bildirib. O deyib ki, müəllimlər bu prosesə qoşulsalar, marker müəllim sayı on minə çatsa, yoxlama prosesləri də sürətlənər:
"Təbii ki, burada təkcə say yox, həm də bu işlə məşğul ola biləcək müəllimlərin bilik və bacarıqları əhəmiyyətlidir. Biz davamlı olaraq müəllimlər üçün imtahanlar təşkil edirik. Müəllimlər imtahandan keçərək marker olmaq səlahiyyəti əldə edə bilərlər. Hər bir fənn üzrə on min marker müəllim olsa, buraxılış imtahanlarını martda yox, apreldə keçirmək olar. Amma hələ ki, bu yoxdur. Yenə də müəllimlərə müraciət edirik: gəlin, kurslara yazılın".
M.Abbaszadə markerlərin sayının artırılması üçün onları kursa, təlimə dəvət edir. Ancaq etiraf etmək lazımdır ki, müəllimlər bu gün mütəmadi olaraq imtahanlar, sınaqlardan keçir, Maraqlıdır, sertifikasiya imtahanından keçən müəllimlərdən niyə marker kimi istifadə olunmur? Bəlkə, DİM marker müəllim hazırlamaq üçün ayrıca kursları ona görə keçirir ki, əlavə gəlir əldə etmək imkanı yaransın? Ümumiyyətlə, marker müəllimlər hazırlamaq üçün M.Abbaszadənin dediyi kimi əlavə kurslara ehtiyac varmı?
"Marker müəllim olmaq üçün müəllimlərin bir qisiminin peşəkarlığı lazımi səviyyədə deyil, bəziləri isə..."
Təhsil eksperti İlham Əhmədov "Bakı-Xəbər"ə şərhində bildirdi ki, DİM sədrinin marker müəllimlərlə bağlı şikayətinin əsası var: "Belə ki, marker müəllimlərin işi normadan çoxdur, hər fənn üzrə 10 min marker müəllimə ehtiyac var. Məlumat üçün deyim ki, ölkə üzrə hər fənn üzrə müəllimlərin sayı təxminən 20 mindir. Belə olan halda Azərbaycan reallığında hər fənn üzrə 10 min marker müəllimin olması inandırıcı görünmür. Onu da deyim ki, marker müəllim olmaq üçün müəllimlərin bir qisminin peşəkarlığı lazımi səviyyədə deyil, bəziləri isə repetitorluqla və məktəbdə dərs deməklə məşğuldur. Bu müəllimlərin də marker olmağa vaxtı qalmayacaq".
Həmsöhbətimiz onu da qeyd etdi ki, sertifikasiya müəllimin pedaqoji biliyini deyil, onun hafizəsini yoxlayır: "Danılmaz faktdır ki, sertifikasiyada iştirak edənlər elə müəyyən kurslara gedir. Sertifikasiyadan keçmək onun pedaqoji səriştəsinin yüksək olması demək deyil".
Günel CƏLİLOVA
