Elşən Qafarov: “DİM-in texniki təhlükəsizlik qaydaları nəinki region, hətta inkişaf etmiş ölkələrlə eyni səviyyədədir”
Məlum olduğu kimi, təhsil eksperti Kamran Əsədov 2025-ci ildə keçirilən buraxılış və qəbul imtahanlarında 11 abituriyentə texniki vasitələrlə kömək olunması ilə bağlı açılan cinayət işi üzrə istintaqa cəlb olunub. İttihama görə, o, ekspert tanışı Gündüz Abbasovla cinayət əlaqəsinə girərək imtahanlarda kütləvi şəkildə köçürmə mexanizmi qurub. Kamran Əsədov Cinayət Məcəlləsinin 32.5, 302.3 və 308.1-ci maddələri ilə təqsirləndirilir.
Bu hadisə imtahan sistemində təhlükəsizlik və nəzarət mexanizmlərinin yetərli olub-olmaması məsələsini gündəmə gətirir. Belə çıxır ki, texniki detalları bilən şəxs imtahan prosesində istədiyini edə bilər. Maraqlıdır, Dövlət İmtahan Mərkəzində təhlükəsizlik qaydalarına nəzarət hansı səviyyədədir?
“…Keçmiş MDB, hətta inkişaf etmiş ölkələrin mexanizmləri ilə müqayisə olunacaq bir səviyyədədir”
Təhsil eksperti Elşən Qafarov “Bakı-Xəbər”ə şərhində bildirdi ki, məlum hadisə cəmiyyətdə böyük rezonans doğurub: “Kamran Əsədov təhsil sahəsində güclü analitik, araşdırma bacarığına malik mütəxəssis idi. Çox təəssüf edirəm ki, Kamran Əsədovun adı bu kimi məsələdə hallanır. Görünən odur ki, istintaq başa çatır və məhkəmə prosesi gedir. Təqsirsizlik prezumpsiyası var, yəni məhkəmə prosesi başa çatmadan kimisə ittiham etmək olmaz. Onu da deyim ki, imtahan məsələsi dövlətin prioritetlərindən biridir. Hər bir şəxs bilməlidir ki, Dövlət İmtahan Mərkəzinin imtahan mexanizmi keçmiş MDB, hətta inkişaf etmiş ölkələrin mexanizmləri ilə müqayisə olunacaq bir səviyyədədir. Bir sözlə, DİM-in imtahan mexanizmi olduqca yüksək səviyyədədir, texniki imkanlar mükəmməl şəkildə təşkil olunub. Ümumiyyətlə, heç kim dolayı yolla ali məktəbə qəbul olmağı düşünməməlidir”.
Həmsöhbətimiz təklif edir ki, Elm və Təhsil Mərkəzinin imtahanları DİM-in ixtiyarına verilsin: “Baş verən hadisəni təəssüflə izləyirəm. Təbii ki, günahı olanlar cəzalandırılacaq, çünki biz hüqudi dövlətdə yaşayırıq. Hazırda prosesin birinci mərhələsi keçirilir. Hadisələrin sonunu hər kəs kimi biz də təəssüflə gözləyirik”.
Ekspert xüsusi olaraq qeyd etdi ki, kimliyindən asılı olmayaraq, dövlətin strateji sahələrində hansısa yolla kənar addım atmaq düzgün deyil: “DİM-in qrup imtahanlarını biz ekspertlər də tənqid edirik. Ancaq DİM-in texniki tərəfdən təhlükəsizlik qaydaların nəinki regionda, hətta inkişaf etmiş ölkələrlə eyni səviyyədədir. DİM-də başda Məleykə xanım olmaqla peşəkarlar toplaşıb, orda böyük təcrübə var. Dövlətin bu sahəyə diqqəti, qayğısı yüksək səviyyədədir. Bu səbəbdən də mən hər zaman bütün imtahanların sırf DİM tərəfindən keçirilməsinin vacibliyi haqqında fikirlər səsləndirirəm. Məlumdur ki, bu gün tibb işçiləri sertifikasiyası DİM-ə tapşırılıb. Bununla yanaşı, taksi fəaliyyəti ilə məşğul olmaq istəyənlər də DİM-də imtahan verir. Hesab edirəm ki, bütün imtahan, qəbul prosesləri ancaq DİM-ə həvalə edilməlidir”
Leyla QARAXANLI
