Məlum olduğu kimi, Milli Məclisin Aqrar siyasət, İqtisadi siyasət, sənaye və sahibkarlıq, Əmək və sosial siyasət komitələrinin birgə iclasında müzakirəyə çıxarılan “Tütün və tütün məmulatı haqqında” qanuna dəyişiklik təklif edilib.
Dəyişikliyə əsasən, Azərbaycanda elektron siqaretlərin və onların komponentlərinin idxalı, ixracı, istehsalı, saxlanılması, topdan və pərakəndə satışı və istifadəsi qadağan edilir.
Bəllidir ki, elektron siqaretlərin istifadəsi olduqca zərərlidir. Bununla bağlı çoxlu sayda çağırışlar edilir, ancaq yenə də əldə etmək asandır. Bu baxımdan elektron siqaretlərin və onların komponentlərinin idxalı, ixracı, istehsalı, saxlanılması, topdan və pərakəndə satışı və istifadəsinin qadağan olunması təqdir olunur.
Xalid Kərimli: “Azərbaycanda elektron siqaretin qadağan olunmasının iqtisadiyyata heç bir ciddi təsiri ola bilməz”
İqtisadçı ekspert Xalid Kərimli “Bakı-Xəbər”ə şərhində bildirdi ki, elektron siqaretin və hansısa tütün məhsulunun qiymətinin artmasının Azərbaycan iqtisadiyyatı üçün heç bir ciddi təhdidi yoxdur: “Azərbaycanda elektron siqaretin qadağan olunmasının iqtisadiyyata heç bir ciddi təsiri ola bilməz. Çünki bu məhsulların istehsalı ölkəmizdə müşahidə edilmir. Düşünülsə ki, elektron siqaret qadağan olunsa iş yerləri bağlanar, insanlar işsiz qalar, belə bir hal da gözlənilmir. Sadəcə, ölkədə qeyd edilən məhsula tələbat azalacaq. Vətəndaş görəcək ki, bunu almaq olmur, alternativ məhsuldan yararlanacaq”
Adil Qeybulla: “Elektron siqareti qadağan etməklə məsələ bitməyəcək, artıq insanlar buna alışıb”
Professor, tibbi ekspert Adil Qeybulla “Bakı-Xəbər”ə şərhində bildirdi ki, müasir dövrdə elektron siqaretdən istifadə edənlərin sayı günü-gündən artır: “İstifadəçilər əsasən gənc və orta nəsildir. Onlar elektron siqaretin adi siqaretdən qurtulmaq üçün bir yol olduğunu düşünürlər. Elektron siqaretin zərərləri adi siqaretin zərərlərindən az deyil. Siqaretin zərəri, əsasən, onun tərkibində olan qətran maddələri, benzapirin törəmələridir ki, orqanizmə təsir edib xərçəng və qana keçərək digər xəstəlikləri törədir. Həmin siqaretlərdə istifadə olunan müxtəlif maddələrdən əmələ gələn kondensatlar nəfəs yoluna düşür, onların da kanserogen təsirləri var. Bu təsirlərlə xroniki bronxit kimi xəstəliklər yarana bilir. Elektron siqaretlərin orqanizmə heç bir faydası yoxdur. Sadəcə, insanlar arasında elektron siqaretin faydaları haqqında danışılır, istənilən halda elektron siqaretdən fayda görmək mümkün deyil”.
Həmsöhbətimiz onu da əlavə etdi ki, elektron siqareti qadağan etməklə məsələ bitməyəcək, artıq insanlar buna alışıb: “Dünyada bu istehsal olunursa, hansısa formada, qeyri-qanuni yolla ölkəyə daxil olacaq. Mən bu cür qadağaların effektli olacağını düşünmürəm. Siqaret əleyhinə maarifləndirmə gücləndirilməlidir. Hazırda siqaret çəkənlərin sayı qadınlar arasında sürətlə artmaqdadır. Əhalinin böyük əksəriyyəti siqaret çəkir, ictimai qınaq yoxdur”.
Günel CƏLİLOVA
