İsa Əsgərov: “2 il 8 aydan sonra nəhayət bu gün Binəqədi Məhkəməsi oğlum Cavidin işinə bəraət verdi”
Bu ilin fevral ayında Bakı şəhəri, Binəqədi rayonu, Ə.Naxçıvani küçəsi, ev 6, mənzil 65 ünvanda yaşayan fizika-riyaziyyat elmləri namizədi, AMEA-nın elmi işçisi Əsgərov İsa Mirzə oğlu övladı Əsgərov Cavid İsa oğlunun 02 aprel 2023-cü il tarixdə təqsiri olmadan yol nəqliyyat hadisəsi törətməsi, nəticədə bir nəfər piyadanın həyatını itirməsi məsələsinə görə Bakı Şəhər Binəqədi Rayon Məhkəməsində proses getdiyini və məsələnin obyektiv araşdırılmasına Respublika Ekspertiza Mərkəzinin rəhbərliyinin maneçilik törətdiyini bildirmiş, “Bakı-Xəbər” vasitəsilə kömək üçün Prezident İlham Əliyevə, I vitce-prezident Mehriban Əliyevaya, MM-nın sədri Sahibə Qafarovaya, Ali Məhkəmə sədri İnam Kərimova, Bakı şəhər Binəqədi Rayon Məhkəməsinin sədr əvəzi Abbas Rzayevə, Bakı şəhər Binəqədi Rayon Məhkəməsinin hakimi Aynurə Sadıqovaya müraciət etmişdi.
“Bakı-Xəbər”ə vətəndaşın müraciətindən sonra məsələyə yenidən baxılıb.
“Heç bir qəzet əhlinin eləmədiyi yaxşılığı siz şəxsən etdiniz, bizim çətin anımızda öz yardım əlinizi uzatdınız”
İsa Əsgərov bizimlə əlaqə saxlayaraq, Binəqədi Rayon Məhkəməsi tərəfindən oğlu Cavidə bəraət verildiyini bildirdi: “Sizə baş vermiş xoş xəbəri çatdırmaq istəyirəm. 2 il 8 aydan sonra nəhayət bu gün (dekabrın 5-də) Binəqədi Məhkəməsi oğlum Cavidin işinə bəraət verdi. Bu qərarın verilməsində təmmənasız olaraq göstərdiyi köməyə görə, başda Aydın Quliyev olmaqla, "Bakı-Xəbər"in bütün kollektivinə minnətdarlığımı bildirirəm. Heç bir qəzet əhlinin eləmədiyi yaxşılığı siz şəxsən etdiniz, bizim çətin anımızda öz yardım əlinizi uzatdınız. Sizin qəzetdə çıxan material böyük səs-küy qaldırdı. İctimaiyyət bu problemə biganə qalmadı. Bütün bunların sayəsində bugünkü BƏRAƏT hökmü verildi. Ömrüm boyu bunu unutmaram. Çox sağ olun!!!”
Qeyd edək ki, bu, “Bakı-Xəbər”in öz missiyasını yerinə yetirdiyi illər ərzində haqqın yerini tapması kimi nəticənin əldə olunması baxımından ilk hadisə deyil və bu bizi çox sevindirir. “Bakı-Xəbər”ailəsi olaraq biz də ailənin sevincinə şərik olur, onlara gözaydınlığı veririk.
İradə SARIYEVA
