Açıqlanan statistik rəqəmlərə əsasən, bu ilin yanvar-avqust ayları ərzində Azərbaycana xaricdən 95 milyon 686 min 701 ədəd tibbi maska gətirilib. İdxal olunan tibbi maskanın ümumi dəyəri 3 milyon 554,39 min dollar (6 milyon 42,5 min manat) olub.
Bu ilin ilk 8 ayında ölkəyə gətirilən tibbi maskanın bir ədədinin orta gömrük dəyəri 3,7 sent və ya mövcud məzənnə ilə 6,3 qəpik olub.
Avqust ayında idxal olunan tibbi maskanın bir ədədinin orta gömrük dəyəri isə 3 sent və ya mövcud məzənnə ilə 5,1 qəpik olub.
Onu da bildirək ki, son bir neçə aydır apteklərdə tibbi maskaların bir ədədi 20 qəpiyə satılır.
Məlumat üçün bildirək ki, aylar üzrə ən çox maska yanvar ayında, ən az maska isə aprel ayında gətirilib.
Qeyd etdiyimiz kimi, xaricdən 5 qəpiyə alınan tibbi maska ölkənin apteklərində 4 dəfə baha satılır.
“Bu sahədə yaşanan problemi həl etmək üçün yerli istehsalın inkişaf etdirilməsinə xüsusi diqqət edilməlidir”
Məsələ ilə bağlı fikir bildirən iqtisadçı ekspert Natiq Cəfərli qeyd etdi ki, ölkədə tibbi maska istehsalı nəzərdə tutulsa da, təəssüf ki, yerli istehsal istənilən effekti vermədi: “Qiymətlərin tənzimlənməsi ilə bağlı yerli istehsalın heç bir nəticəsi olmadı. Bunun səbəbi xammalın xaricdən alınmasıdır. Digər səbəb isə keyfiyyətlə bağlı problemin yaşanmasıdır. Bu səbəbdən də tibbi maskaların xaricdən gətirilməsinin daha çox şahidi oluruq”.
Həmsöhbətimiz hesab edir ki, xaricdən gətirilən maskanın ilkin qiymətinin 5 qəpik olması onun rüsum hesablanmadan öncəki qiymətidir: “Məlumdur ki, gömrük rüsumları kifayət qədər yüksəkdir. 15 faiz gömrük, 18 faiz isə əlavə dəyər vergisi hesablanır. Nəticə etibarı ilə bu halın çətinliyi alıcının çiyninə düşür. Bundan başqa, topdansatış məntəqələri aptekə maska verərkən üstünə qiymət əlavə edirlər. Belə olduğu üçün bu gün ölkədə tibbi maskanın qiyməti yüksəkdir. Bu sahədə yaşanan problemi həll etmək üçün yerli istehsalın inkşaf etdirilməsinə xüsusi diqqət edilməlidir”.
Günel CƏLİLOVA
