Tovuzun Şamlığında qaz yoxdur - odunun bir maşını 500 manata çıxdı...

Tovuz Rayon İcra Hakimiyyəti: “Kəndlərin qazlaşdırılması işləri davam edir”

img

“Ətraf kəndlərə qaz xətti çəkilib, mavi yanacaqla təmin olunub, baxmayaraq ki, o kəndlərə gedən ana xətt bizim kənddən keçir, bizim kəndi qazlaşdırmayıblar. Qış qapıdadır, ötən il bir maşın odun 400 manata satılırdı, bu il qiyməti 450 -500 manata qaldırılıb”. Bu sözləri Tovuz rayonunun Şamlıq kənd sakinləri deyib.

Sakinlərin bildirdiyinə görə, Tovuzun Şamlıq kəndi Böyük Qışlaq ərazi nümayəndəliyinə aiddir: “Nümayəndəliyə daxil olan kəndlərin bir qismi qazlaşdırılsa da, bir qismində hələ də kəndlilər evlərini odunla isidir. Sovet hakimiyyəti vaxtı həm bizim, həm də qonşu kəndlərdə qaz olub. Ancaq Sovet hakimiyyəti dağılandan sonra, digər sahələrdə olduğu kimi, mavi yanacaqdan da əziyyətlərimiz başladı. 30 ildir ki, evlərimizi odunla qızdırırıq, yeməyi, çayı ocaqda hazırlayırıq. Son illərdə qonşu kəndlərə qaz xətti çəkildi, ana xətt gəlib bizim kəndin aşağı tərəfindən keçir, qonşu kəndlərə uzanır. Ana xətt kəndin aşağı tərəfindən keçdiyinə görə gözdən pərdə asmaq üçün kəndin həmin tərəfindəki 2-3 evə qaz verilib. Kasıb kənddir, dağ kəndidir, qış fəsli tez düşür, çox sərt keçir. Odun çox bahadır, ala bilmirik. Məcbur olub, evlərdə elektrik cihazlarından istifadə edirik, bu isə elektrik naqillərində qısaqapanmalara səbəb olur və hər an yanğın təhlükəsi yaranır”.

  • “Bu işlər növbəli şəkildə görülür, Şamlıq kəndinin də yaxın illərdə qazlaşdırılması plandadır”

Məsələ ilə bağlı Tovuz Rayon İcra Hakimiyyətindən bildirildi ki, Tovuzun kəndlərinin qazlaşdırılması işləri davam edir. Bu yaxınlarda rayonun Əlibəyli və Yuxarı Öysüzlü kəndlərini mavi yanacaqla təmin edən və istismar müddəti başa çatmış borular yenilənib: “Bununla da sərhəd bölgəsində yaşayan 2700 abonentin qaz təchizatı yaxşılaşdırılıb. Buna qədərsə rayonun Hunanlar, Əhmədabad kəndlərinin mavi yanacaq problemi həll olunub. Bu işlər növbəli şəkildə görülür, Böyük Qışlaq Sovetliyinə daxil olan kəndlərin çoxu qazlaşdırılıb, Şamlıq kəndinin də yaxın illərdə qazlaşdırılması plandadır”.

Günel CƏLİLOVA

Son xəbərlər