Bir neçə gündür sosial şəbəkələrdə müzakirə edilən əsas mövzulardan biri də şəhidlərin fotolarının su qablarının üzərində əks olunmasıdır. Bu qablar birdəfəlik olduğundan, istifadədən sonra zibil qablarına atılır. Şəhidlərin fotolarının zibil qablarına atılması isə böyük narazılığa səbəb olur. İstənilən halda, şəhidlərimizin şəkillərinin su qablarının üzərinə vurulması bir vətəndaş olaraq hər kəsi narahat edir.
Zibillikdə aşkar edilən su butulkalarının üstündə, şəhid general Polad Həşimov da daxil olmaqla, 44 günlük Vətən müharibəsində torpaqlarımızın azadlığı uğrunda rəşadətlə döyüşərək canından keçən qəhrəman şəhidlərimizin şəkilləri əks olunub. Məlum olub ki, bu su qabları Kərbəlada öldürülən imamlara ehsan olaraq insanlara paylanıb. Beləliklə də, bu insanlar şəhidlərimizin şəkli olan plastik butulkaların zibiliyə atılmasına səbəb olmaqla onların xatirəsini təhqir ediblər.
Xatırlayırsınızsa, sentyabrın 27-də - Anım Günündə ölkə başçısı İlham Əliyev və Birinci vitse-prezident Mehriban Əliyeva şəhidlərə hörmət əlaməti olaraq onların fotoları həkk olunmuş lövhəni daşıdı. Ölkənin birinci şəxslərinin şəhidin şəklinə yüksək hörmət göstərdiyi ərəfədə bəzilərinin onların fotosunu su butulkasının üzərinə qoymaqla zibilliyə atılmasına səbəb olması nə dərəcədə düzgündür?
Ceyhun Məmmədov: “Şəhidlərimizi su butulkalarının üstündə deyil, ürəyimizdə yaşatmalıyıq”
Millət vəkili Ceyhun Məmmədov bildirdi ki, ümumiyyətlə, əşyaların üstünə şəhidlərin şəkillərinin yapışdırılması düzgün deyil: “Şəhidlərimizi su butulkalarının üstündə deyil, ürəyimizdə yaşatmalıyıq. Ümumiyyətlə, son dövrdə şəhidlərimizin şəkillərinin bir çox əşyaların üzərinə yapışdırılmasını müşahidə edirik. Şagirdlərin istifadə etdikləri dəftərlərdən tutmuş bloknotlaradək. Bu gün də butulkaların üzərinə şəkillərini yapışdırmaqla onlara hörmətsizliyi müşahidə edirik. Bundan sonra insanlarımız bu prinsiplərə əməl etsinlər. Çünki şəhidlərimiz Bayraq, Himn və Gerb kimi bizim milli dəyərlərimizdir. Milliyətindən, dinindən və irqindən asılı olmayaraq bütün şəhidlərimiz bizim üçün əziz və müqəddəsdir”.
Aytəkin Kamranqızı: “Bunu edən şirkətin yaxasından yapışmaq lazımdır ki, şəhidlərimizin fotoları nə gəzir su qablarının üzərində?”
Sosioloq Aytəkin Kamranqızı da şəhidlərin fotolarının su qablarının üzərində əks olunmasını düzgün saymadı: “Su içiləndən sonra o qablar zibiliyyə atılır. Kimsə öpüb o fotoları gözünün üstünə qoyan deyil. Şəhidlərin fotoları su qablarının üstündə nə gəzir? Bunu edən şirkətin yaxasından yapışmaq lazımdır ki, şəhidlərimizin fotoları nə gəzir su qablarının üzərində?
Prezident İlham Əliyev və Birinci vitse-prezident Mehriban xanım Əliyeva şəhidlərin fotolarını başının üstünə qaldıraraq daşıyır. Onlar yorulmadan uzun yolu həmin fotoları daşıdılar. İndi hansısa şirkət şəhidin fotosunu su butulkasına yapışdırıb qazanc əldə etmək istəyir. Bu işlə məşğul olanlara sərt cəzalar verilməlidir”.
Günel CƏLİLOVA
