Ölkə prezidenti İlham Əliyevin “Azərbaycan Respublikasında mənzil fondunun özəlləşdirilməsi haqqında” Qanuna etdiyi dəyişikliyə əsasən, mənzillərdən yığılan xidmət haqlarına tətbiq edilən vahid tarif ləğv edilib. Bu o deməkdir ki, MİS-lər əhalidən mənzil pulu yığa bilməzlər. Amma bəzi MİS-lər hələ də Sovet dövründən qalmış sistemlə çalışaraq, fəaliyyətlərini mənzil idarəçiliyi ilə bağlı müxtəlif istiqamətlərdə davam etdirirlər.
Təəssüf ki, hələ də bəzi “JEK”lər köhnə yaşayış binalarında yaşayan vətəndaşlardan mənzil pulu alırlar. Ancaq onların bu istəyi qanunsuzdur.
Elnur Fərzəliyev: “JEK”in ev sahibindən kommunal haqq tələb etməsi qeyri-qanunidir”
Əmlak məsələləri üzrə ekspert Elnur Fərzəliyev bildirdi ki, bu gün “JEK”lər fəaliyyət göstərsə də, əsas fəaliyyət növləri ləğv edilib: “Nəticədə “JEK”lərin kommunal pulu yığması da qadağan olunub. Bu baxımdan “JEK”in ev sahibindən kommunal pulu tələb etməsi qeyri-qanunidir. Köhnə yaşayış binalarında “JEK”in ev sahibindən mətbəx, hamam otağı və eyvana görə pul tələb etməsi qanunvericilikdə yoxdur. “JEK”lər qeyri-qanuni mənzil pulu tələb edirlər, bu da illik 18 manat təşkil edir. Əgər binada mərkəzi istilik sistemi varsa, bu halda əlavə olaraq 5-6 aylıq üçün təxmini 20 manat pul ödənir”.
Hüseyn Axundov: “Köhnə binalarda “JEK”-lər fəaliyyət göstərir, ancaq onların fəaliyyəti sual altındadır”
Hüquqşunas Hüseyn Axundovun sözlərinə görə, göstərilən xidmətlərlə bağlı vətəndaşlardan pul tələb etmək qanuna ziddir: “Çünki qanuna əsasən, onların gördüyü işi bələdiyyələr həyata keçirməlidir. Yeni tikilən binalarda mənzil istismar idarələri müqavilə bağlayır. Köhnə binalarda isə “JEK”-lər fəaliyyət göstərir. Təəssüflər olsun ki, onların fəaliyyəti də sual altındadır. Bu sahədə konkret tənzimlənmə yoxdur. Yəqin ki, yaxın vaxtlarda bu idarələr ləğv olunacaq. Sakinlərdən yığılan pul heç bir qanuni əsasla tənzimlənmir və nəyə xərcləndiyi məlum deyil. Əslində, bu idarələr icra hakimiyyətlərinin tərkibində fəaliyyət göstərdiklərinə görə pul onların balansına köçürülməlidir. Bu ödəmələri elektron şəkildə etmək mümkün deyil. Çünki onlar elektron qaydada ödəniş qəbul etmirlər. Nağd şəkildə ödənilən məbləğin rəsmi ödəniş sənədi təqdim edilməlidir. Əgər bu ödəniş qanunidirsə, onun elektron forması da mövcud olmalıdır”.
Günel CƏLİLOVA
