“Son 1 həftə ərzində 4 qadın uşaqlarını evdə qoyaraq ailəsini tərk edib”. Bu barədə Azərbaycan Uşaqlar Birliyinin sədri Kəmalə Ağazadə öz facebook səhfəsində məlumat paylaşıb. O qeyd edib ki, atalar uşağa baxa bilmədiklərini deyirlər: “Onlar uşaqların sığınacağa qəbul edilmələrini xahiş edir”.
Qeyd edək ki, son zamanlar bu kimi hadisələrinin sayının artmasının şahidi oluruq. Mütəmadi olaraq mediada və ya sosial şəbəkədə qadının öz uşağını, ailəsini tərk etməsi haqqında məlumatlar yayılır.
Maraqlıdır, ailəli qadınların belə bir addım atmasının səbəbi nə ilə bağlıdır?
“Kişilərin öz ailələrinə kifayət qədər biganəliyi, diqqətsizliyi sonda arvadın evi tərk etməsi ilə nəticələnir”
“Vəfa” Sosial İctimai Birliyinin sədri Fatimə Hacıbəyli qeyd etdi ki, gəlinlərin evi tərk etməsinin səbəbi kişilərlə bağlıdır: “Kişilərin öz ailələrinə kifayət qədər biganəliyi, diqqətsizliyi sonda avradın evi tərk etməsi ilə nəticələnir. Qadın ona lazım olan diqqəti ərindən görməyəndə həmin qayğını başqa kişidə axtarır. Kişilər qadınları ilə oturub söhbət etmək, onların ehtiyaclarını bilmək istəmirlər. Ailə başçısının evə kənar şəxslər gətirməsi, təbii ki, müəyyən hadisələrlə nəticələnir. Bir sözlə, ənənəvi Azərbaycan ailəsində kişi öz həyat yoldaşına kifayət qədər xoş söz demək, onunla vaxt keçirməyi həmişə ikinci plana saxlayır. Hamıya, hər şeyə vaxt tapır, başqaları ilə vaxt keçirməyi daha rəngarəng hesab edirlər, nəinki öz həyat yoldaşları ilə. Kim ki iradəlidir dayanır, kimin ki iradəsi zəifdir, qarmağa düşür. Onu da deyim ki, əvvəllər ailə quranların hamısı əmin idi ki, ömürlərinin sonuna kimi birlikdə yaşayacaqlar. Amma indi gənclər sığortalanmamış ailə qururlar, hər dəqiqə boşanmağa hazırdırlar. Mən demirəm ki, yalnız kişilər günahkardır. Qadınlar da təmkinli olmalıdır. Hamı rahatlığını istəyir. Əvvəllər ana deyirdi ki, mən həyatı boyu evi övladsız tərk etmərəm. Amma indi bunu edirlər. Bir sözlə, indiki ailələrdə nə yoldaşına, nə övladına sevgi var”.
Həmsöhbətimiz hesab edir ki, seriallar da ailələrə güclü təsir edir: “Qadınların da kişiləri aldatması ilə bağlı faktlar az deyil. Hətta qadın xəyanətinə görə ailəsini tərk edən kişilər də olub. Elə ailələr var ki, həyat yoldaşını psixoloji durumu normal olmadığı üçün psioxoloqa gətirib, lakin məlum olub ki, onun kənarda sevgilisi var. Beləcə, ailə dağılıb”.
Günel CƏLİLOVA
