Bildiyimiz kimi, pandemiya səbəbindən orta ümumtəhsil məktəblərində dərslər ibtidai siniflər üçün sentyabrın 22-də, yuxarı siniflər üçünsə sentyabrın 29-da başlandı. Mətbuatda yayılan iddialara görə, üç həftəyə yaxındır orta məktəblərdə dərslərə başlanılsa da, hələ də kitabların paylanmadığı siniflər var.
İddialara görə, bəzi ibtidai siniflərində pilot layihə kimi tədris olunan (“Creative Commons Attribution-NonCommercial-ShareAlike 4.0 İnternational” lisenziyası əsasında) Azərbaycan dili və riyaziyyat dərslikləri və onların iş dəftərləri verilməyib. Valideynlər isə deyib ki, həmin dərsliklərin elektron variantının surətini çıxarmaq məcburiyyətində qalıblar. Bundan başqa, müəyyən siniflərdə digər dərsliklərin də çatışmazlığı haqda söhbətlər mövcuddur, şikayətlər var.
Məsələ ilə bağlı Təhsil İnstitutundan mətbuata bildirilib ki, 2020-ci ildə COVID-19 pandemiyası ilə əlaqədar olaraq bir çox məhsul istehsalı və xidmət sahələrində durğunluq dövrü yaşanıb. Bu, digər xammal istehsalları kimi kağız istehsalına və çap xidmətlərinə də öz təsirini göstərib: “Təəssüflə qeyd etmək istərdik ki, xammal çatışmazlığı və sifarişlərin qeyri-müəyyən vaxt ərzində istehsalı dərsliklərin və iş dəftərlərinin çapındakı gecikmələrə səbəb olub. Pandemiyaya bağlı olaraq dünya bazarında istifadə ehtiyacı olmadığı üçün xammal (kağız) qıtlığı, 1 ildən çox fasilədən sonra həm təhsil sahəsinin, həm də digər sahələrin əyani fəaliyyəti ilə əlaqədar olaraq mətbəələrin yenidən aktiv işə başlaması, onların iş yükünün və həcminin həddindən artıq çox olması, çap materiallarının sifarişi zamanı qiymət razılaşdırma prosedurunun bazarda dəyişən qiymətlərə bağlı olaraq uzanması, təşkilati məsələlər, həmçinin dərslik çapı üçün tələb olunan kağız növünün tapılmasının çətinliyi sözügedən gecikmənin əsas səbəblərindəndir. İlk növbədə kütləvi istifadəyə verilən vəsaitlər çap olunaraq təmin edilib. Yalnız 3-cü siniflər üçün pilot tətbiq olunan vəsaitlərin çapı ilə bağlı problem də artıq öz həllini tapıb”.
Nəzərə alaq ki, dövlət hər il dərslik nəşrinə xüsusi diqqət yetirir və hər tədris ilində bütün fənlər üzrə dərsliklər yenidən nəşr edilərək ümumtəhsil məktəblərinə paylanıb.
Bəzi siniflərdə dərslik probleminin yaranma səbəbini öyrənmək üçün Təhsil Nazirliyi ilə əlaqə saxladıq.
Necə ola bilər ki, indiyə qədər bütün siniflər üzrə dəsrliklər tam olaraq paylanmasın?
“Nazirliyin 146 saylı qaynar xətti aktivdir…”
Təhsil Nazirliyinin ictimaiyyətlə əlaqələr sektorunun rəhbəri Cəsarət Valehov bildirdi ki, bütün orta ümümtəhsil məktəblərinə dərsliklər paylanılıb: “Hansı məktəblərdə siniflərə bəzi dəsrliklər çatmayıb, konkret olaraq məktəbin adı çəkilsin. Amma bütövlükdə bütün məktəblər dərsliklə təmin olunub. Bəlkə də hansısa siniflərdə gecikmələr olub, olubsa bunu bizə bildirsinlər. Nazirliyin 146 saylı qaynar xətti aktivdir, hansı siniflərdə bu problem varsa konkret olaraq ad qeyd etməklə bildirsinlər. Amma yenə deyirəm, ölkə üzrə bütün məktəblər dəsrliklərlə təmin olunub”-deyə C.Valehov qeyd etdi.
İradə SARIYEVA
