Azərbaycanda sərnişinləri narazı salan məsələlərdən biri də ictimai nəqliyyatda, xüsusən də taksilərdə sürücülərin siqaret çəkməsidir. Məlumat üçün bildirək ki, ölkəmizdə ictimai nəqliyyatda siqaret çəkilməsini qadağan edən “Tütün məmulatlarının istifadəsinin məhdudlaşdırılması haqqında” qanun qəbul edilsə də, sürücülər bu qaydaya əməl etmir.
Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovnik-leytenantı Namidan Piriyev media nümayəndələrinə açıqlamasında qeyd edib ki, yol polisi əməkdaşları bu məsələ ilə bağlı tədbirlər görür: “İnzibati Xətalar Məcəlləsinin 322-ci maddəsinə əsasən, sərnişindaşımalar üzrə ümumi istifadədə olan avtomobil nəqliyyatı vasitəsində və taksi minik avtomobilində tütün məmulatı çəkilməsinə görə qırx manatdan əlli manatadək məbləğdə cərimə tətbiq edilir. Adətən sərnişinlər özləri də sürücünün siqaret çəkməsinə etiraz edir və bu etiraz da taksidə siqaret çəkilməsi hallarını azaldır. Yəni bu qayda pozuntusu kütləvi xarakter daşımır, digər qayda pozuntuları ilə müqayisədə daha azdır”.
“Xüsusən uzun məsafəli yollarda bəzi sürücülər sükan arxasında siqaret çəkirlər, bu da haqlı olaraq narazılıqlara səbəb olur”
Qeyd etdiyimiz kimi, taksidə siqaret çəkən sürücü və sərnişinlərlə bağlı monitorinq keçiriləcək. Monitorinqin əhəmiyyəti haqqında danışan sosial sahə üzrə ekspert Mayis Əliyev bildirdi ki, bu sahəyə nəzarət Dövlət Yol Polisi əməkdaşları tərəfindən həyata keçirilir: “3-5 il bundan öncəyə qədər sürücülər rahat şəkildə sükan arxasında tütündən istifadə edirdilər. Onunla bərabər hərəkət edən sərnişinlər də bu tütünün tüstüsünü udmağa məcbur idilər. Qanunla bu istiqamətdə qadağa yox idi. Son zamanlar tütündən istifadənin məhdudlaşdırılması ilə bağlı işlər görülüb. Bu işlər çərçivəsində sürücülərə də qadağalar tətbiq edilib. Sürücünün diqqəti yolda olmalı, siqaretdən və telefondan istifadə etməməlidir. Bu istiqamətdə görülən tədbirlər qənaətbəxşdir”.
Həmsöhbətimiz onu da əlavə etdi ki, bu qadağalardan kənara çıxanlar da olur: “Xüsusən uzun məsafəli yollarda bəzi sürücülər sükan arxasında siqaret çəkirlər. Bu da haqlı olaraq narazılıqlara səbəb olur. Siqaret çəkməyən sərnişinlər siqaret tüstüsü ilə zəhərlənmək istəmirlər. Sürücülər isə siqaretə vərdiş etdikləri üçün bunun fərqində olmur və qarşı tərəfi narahat etdiyini düşünmür. Odur ki, tütündən istifadə daha da sərt tədbirlərlə məhdudlaşdırılmalıdır. Vətəndaşlar tərəfindən şikayət edildikdə əlaqədar qurum da məsələyə daha tez reaksiya verər və həmin sürücünü cəzalandırar. Bir neçə dəfə bu cür cəzalanma olsa, sürücülər də sükan arxasında siqaret çəkməkdən çəkinər. Bəzən görürsən ki, taksidə qadın və ya uşaq var, sürücü isə siqaret çəkir. Bu xoşagələn hal deyil”.
Günel CƏLİLOVA
