Məlum olduğu kimi, sentyabrın 29-da yuxarı sinif şagirdləri və tələbələr üçün əyani tədris bərpa olunub. Amma əyani dərslərin başlaması bir sıra problemlərə də yol açıb. Belə ki, Nazirlər Kabineti yanında Operativ Qərargahın müvafiq qərarına əsasən, yaşı 18-dən yuxarı olan tələbələrdən tədris binalarına daxil olmaq üçün COVID-19 pasportu tələb olunur.
Yeni tələb isə ali məktəblərin qarşısında böyük izdihama səbəb olub. İzdiham əsasən tələbə sayı daha çox olan ali məktəblərin önündə qeydə alınıb. Kütləvi toplaşma isə pandemiya qaydalarına ziddir. Bu da o deməkdir ki, bu qədər insanın kütləvi toplaşması koronavirusun yayılması üçün real təhlükə mənbəyi ola bilər. Maraqlıdır, universitetlərdə yaranan sıxlıq necə aradan qaldırılacaq? Bu problemin həll olunması üçün ali təhsil müəssisələri nə kimi tədbirlər görəcək?
Bakı Dövlət Universiteti - Günel Orucəliyeva: “Tələbələrin vaksin pasportunun olub-olmaması fərdi qaydada yoxlanılır, sosial məsafənin gözlənilməsinə riayət edilir”
Bakı Dövlət Universitetinin (BDU) ictimaiyyətlə əlaqələr və informasiya şöbəsinin müdiri Günel Orucəliyeva bildirdi ki, universitetdə tələbələrin sayının çoxluğu, həmçinin birinci kursların ilk dərs gününə valideynləri və yaxınları ilə gəlmələri binanın qarşısında izdihamın yaranmasına səbəb olub: “Mühafizəçilərin universitet ərazisindən kənara nəzarət etməyi mümkün deyil. Amma hər bir korpusda və fakültələrdə tələbələrin vaksin pasportunun olub-olmaması fərdi qaydada yoxlanılır, sosial məsafənin gözlənilməsinə riayət edilir”.
Azərbaycan Dövlət Pedaqoji Universiteti - Cavid Hüseynov: “Giriş-çıxışlarda sosial məsafə, maska və digər qaydalara tam riayət olunur”
Azərbaycan Dövlət Pedaqoji Universitetinin (ADPU) mətbuat katibi Cavid Hüseynovun sözlərinə görə, universitetin 4 tədris binası və 5 bölgə filiallarında ənənəvi tədris bərpa olunub: “Qaydalara uyğun olaraq 18 yaşı tamam olan tələbələrdən və əməkdaşlardan vaksin pasportu, immunitet pasportu və ya əks göstəriş sənədi tələb olunur. Nazirlər Kabinetinin qaydalarına tam ciddi riayət olunması üçün fakültələrdə dərslər tələbə sayı və auditoriya tutumundan asılı olaraq 2 və ya 3 növbədə təşkil olunur. Universitetin fakültələrində də eyni qaydada tələbə sayından və auditoriya tutumundan asılı olaraq müxtəlif kurslar və ixtisaslarda mühazirələr onlayn qaydada təşkil olunacaq. Bu baxımdan dərslərin üst-üstə düşməməsi üçün müxtəlif fakültələrdə müxtəlif günlərdə dərslər onlayn təşkil olunur. Bəzi hallarda şənbə günləri də onlayn dərslər təşkil olunacaq. Bu gün dərslərin ilk günü olsa da, izdiham qeydə alınmayıb. Giriş-çıxışlarda sosial məsafə, maska və digər qaydalara tam riayət olunub”.
Kamran Əsədov: “Ali təhsil müəssisələrinin girişində üztanıma proqramı tətbiq edilməli, bu cihaza temperaturu yoxlamaq üçün də funskiya əlavə olunmalı idi”
Təhsil eksperti Kamran Əsədov bildirdi ki, 250 mindən çox tələbənin təhsil müəssisəsinə daxil olacağı nəzərə alınarsa, bunun üçün tədris müəssisəsi əvvəlcədən tədbirlər görməli idi: “Təəssüflər olsun ki, bəzi ali təhsil müəssisələri prosesi axarına buraxaraq, qabaqlayıcı tədbirlər görməyib. Nazirlər Kabineti və digər təhsil idarəetmə qurumları tədrisin əyani olması ilə bağlı əvvələcədən məlumat vermişdi və vəziyyəti öncədən müəyyən etmək çətin deyildi. Ali təhsil müəssisələrinin 20 mindən yuxarı tələbə qəbul edərkən pasportu yoxlamaq üçün avadanlığı yoxdur. Problemi həll etmək üçün dünya təcrübəsinə istinad etmək lazım idi”.
Ekspertin sözlərinə görə, ali və orta ixtisas təhsili müəssisələrinin girişində xüsusi kameralar yerləşdirilməli və dərslər fərqli saatlarda təşkil edilməli idi: “Bunun üçün xüsusi proqram təminatlı avadanlıqlar quraşdırılmalıdır. Sıxlıq problemi tək bir gün yox, hər gün olacaq. Bu baxımdan biz ali təhsil müəssisələrinə təklif etmişdik ki, fakültə və ixtisaslar üzrə tələbələr təhsil müəssisələrinə fərqli girişlərdən daxil olsunlar. Yəni bir girişdən istifadə etmək ən böyük yanlışdır. Bundan başqa, fakültələr üzrə dərs fərqli saatlarda, 20 dəqiqə aralıqla başlamalı idi. Eyni zamanda ali təhsil müəssisələrinin girişində üztanıma proqramı tətbiq edilməli, bu cihaza temperaturu yoxlamaq üçün də funskiya əlavə olunmalı idi. Belə olsaydı, hər gün tələbəni yoxlamağa ehtiyac qalmazdı. Lakin təəssüf ki, indi təhsil müəssisələrinin girişində nəzarətçilər əllərində telefon vaksin pasportu yoxlayır. Halbuki, TƏBİB üçün proqram bazası var və vaksin olunanların siyahısını bu şəkildə əldə etmək olardı. Təhsil müəssisələrinin girişində xüsusi kamera yerləşdirilsəydi, üztanıma ilə kimin vaksin edildiyi bəlli olardı”.
Günel CƏLİLOVA
