Şəhidlik zirvəsini fəth edən Cavanşir...

img

Vətən, torpaq sevgisi Cavanşir Namiq oğlu Həmidliyə 23 yaşında əbədiyaşarlıq qazandırdı. Dağlar diyarı Lerik rayonunun Çayrud kəndində dünyaya göz açan Cavanşir İkinci Qarabağ müharibəsində sinəsini müqəddəsliyinə tapındığı doğma Azərbaycana sipər etməyi bacardı. Və haqq savaşımızda torpaq naminə yağı düşmənə matəm libasını biçməklə adını tarixə yazdı. Qısa ömür yaşasa da, bu qəhrəmanlıqla köç etdiyi könüllərdə ölümsüzlüyə qovuşdu. Dövlət isə Cavanşiri ölümündən sonra layiq gördüyü “Vətən uğrunda”, “Füzulinin azad olunmasına görə” medalları ilə daha da xalq gözündə ucaltdı.

Vətənpərvər, xalqın milli-mənəvi dəyərlərinə hörmət ruhunda tərbiyə alan Cavanşir oxuduğu Çayrud kənd məktəbində hamının sevimlisi olur. Həyatının mənasını Vətəninə, xalqına, el-obaya xidmətdə görən yeniyetmə 2015-ci ildə yüksək qiymətlərlə  məktəbi bitirib sənədlərini Lənkəran Dövlət Universitetinə verir. Tələbə adını qazananda ürəkdən sevinir. Millətin gələcəyini  düşünməklə özünü kitablara bağlayır. Və çox keçmir ki, fitri istedadı, dərin zəkası, geniş dünyagörüşü ali məktəbdə Cavanşirə hörmət gətirir. Saf, ülvi dəyərlərlə yaşadığı həyatda narahatçılığı yalnız erməni faşistlərin Vətən torpaqlarına ədalətsiz təcavüzü olur...

2019-cu ildə Cavanşirin mənalı, bir dünya qədər sevdalı tələbəlik illəri başa çatır. Xalqına, Vətəninə sədaqətli gənc Ordu sıralarına gedir. Ürəyindən keçirdiyi birinci arzusu döyüş meydanında, hətta canı, qanı hesabına düşməni əzmək olur. Elə Vətən, torpaq naminə müqəddəs amalın işığında “Həmlə” Əlahiddə Əməliyyat Taborunun xüsusi təyinatlısı kimi təlimlərə qatılır. Hərbi texnikanın, döyüş silahlarının istifadəsini yüksək səviyyədə mənimsəyir, doğma torpağın hər qarışını düşməndən azad etməyə hazır durur.

Vətən müharibəsi başlanan günü Cavanşir xalqın mərd oğlanlarına qoşulub odun-alovun içinə, döyüşə girir. Tərtər-Ağdərə istiqamətində Talış və Suqovuşan yaşayış məntəqələrin alınmasında xüsusi hünər göstərir. Hər an dığaların bağrına çat salan bir qəhrəmana çevrilməklə yüzlərlə canlı qüvvəsini, neçə-neçə hərbi texnikasını məhv edir. Sonra Füzulidə, Cəbrayılda qeyr–bərabər döyüşlərin qalibi olur Cavanşır. Həm də Vətənin qəhrəman oğlu dəfələrlə atəş altında qalan yaralı yoldaşların xilaskarı dönür. Adına can dediyi Azərbaycana olan məhəbbətini hər döyüşündə sübut etməyi bacarır. Torpaqları son nəfəsinədək mərdliklə vuruşub azad etmək arzusunda olan Cavanşir oktyabrın 7-də Cəbrayılın Nüzgar kəndində gedən döyüşdə yağı gülləsinə tuş gələrək şəhidlik zirvəsinə ucalır. Nə yaxşı ki, arzuladığı bu şərəfli yol canından artıq sevdiyi Vətən torpaqların  azadlığı ilə başa çatır.

Qısa ömrünə qəhrəmanlı, mərdlik yazılan bütün Azərbaycan xalqı indi Cavanşiri  tanıyır, bir Vətən sevdalısı kimi onun ölümsüzlüyə qovuşan həyat yolundan nümunə götürürlər.

Zəfər ORUCOĞLU
Azərbaycan Jurnalistlər Birliyinin üzvü

Son xəbərlər