Goranboy rayonu Qızılhacılı qəsəbə sakini, sabiq müəllim Eminov Neman Bayram oğlu Goranboy rayon Təhsil Şöbəsindəki qanunsuzuqlarla bağlı Prezident İlham Əliyevə, (surəti) Azərbaycan Respublikasının 1-ci vitse prezidenti Mehriban Əliyevaya, (surəti)Təhsil naziri Emin Əmrullayevə və (surəti) KİV rəhbərlərinə müraciət edib, müraciətin bir surətini də redaksiyamıza göndərib.
“16.09.2021-ci il tarixində Goranboy Rayon İcra Hakimiyyətinin icra başçısı Məhərrəm Quliyevin qəbulunda oldum. İşlə təmin olunmağım üçün RTŞ-nin müdiri Seymur Nazarova tapşırıq verəcəyini dedi və işə qəbul məsələmin həll edilməsinə nəzarəti RİH-nin şöbə müdiri Sərdar Sadıqova tapşırdı. O gündən bu günə nə mənim işlə təmin olunmaq məsələmə baxılır, nə də Sərdar Sadıqov mənimlə əlaqə yaradır, zənglərimə cavab verir. Bir sözlə, süründürməçilik edilir, hüquqlarım pozulur. İki ali təhsilim var, işsiz qalmışam”. Bunu müraciətində N.Eminov qeyd edib.
N.Eminov yazır ki, Goranboy rayon təhsili “yağışdan” çıxıb “yağmura” düşüb. Şikayətçi qeyd edir ki, bu rayonda təhsil qanunları deyil, “bazar qanunları” hökm sürür. “Ulu öndər, dahi şəxsiyyət, mərhum prezidentimiz Heydər Əliyev “Təhsil millətin gələcəyidir” demişdi. Millətin gələcəyi olan təhsilə Goranboy rayonunda 05.08.2021-ci il tarixindən Seymur Fazil oğlu Nazarov rəhbərlik edir. Seymur Nazarov kimdir? Seymur Nazarov Goranboy rayonu Qızılhacılı qəsəbə 2 saylı tam orta məktəbində fransız-dili müəllimi kimi pedaqoji fəaliyyətə başlayıb, müəyyən səbəblərə görə müəllim vəzifəsindən azad olunaraq, Rusiya Federasiyasının bazarlarının birində ticarətlə məşğul olmağa başlayıb, deyilənə görə “kələm” alverçisi olub. Seymur Nazarov RF-dan qayıtdıqdan sonra Goranboy rayonunun hansısa kənd məktəblərinin birində PSİXOLOQ vəzifəsinə təyin edilib, Goran stansiyasında yerləşən mağazaların birində isə ticarətlə məşğul olmağa davam edib, sonra Goranboy rayonu Hazırəhmədli kənd tam orta məktəbində direktorun təşkilatçı müavini vəzifəsində və Ballıqaya kənd ümumi orta məktəbində direktor vəzifəsində çalışıb. Təəssüf hissi ilə deyirəm ki, Goranboy RTŞ-nə müdür vəzifəsinə təyin edilən Seymur Nazarov özünə xəsarət yetirərək, qollarındakı şah damarlarını kəsib. Özünə xəsarət yetirən, damarlarını kəsən necə ola bilir ki, bu gün Goranboy RTŞ-nə müdir vəzifəsinə təyin edilib?
Bu müdir müəllim təhsillə qəssabxananı səhv salıb. Normal insan özünə xəsarət yetirərmi? Nə səbəblərdən insan özünə xəsarət yetirir?”
“Sizdən xahiş edirəm, yuxarıda qeyd etdiklərimi nəzarətinizə götürəsiniz, obyektiv araşdırma aparılması üçün tapşırıq verəsiniz”
Prezident İlham Əliyevə, 1-ci vitse-prezident Mehriban Əliyevaya, Təhsil naziri Emin Əmrullayevə və KİV rəhbərlərinə ünvandığı müraciətində N.Eminov bir sıra ilginc məqamlara toxunuraq bildirir: “Nəzərinizə çatdırım ki, yuxarıda qeyd etdiyim məsələlərlə bağlı 16.08.2021-ci il tarixində Goranboy Rayon İcra Hakimiyyətinin başçısı Məhərrəm Quliyevin qəbulunda oldum və aşağıdakı məsələləri də bu rayonun icra başçısının diqqətinə çatdırdım. Bildirdim ki, ixtisası texnologiya müəllimliyi olan informatika fənni üzrə lobarant, ixtisası ibtidai sinif müəllimliyi olan kimya fənni üzrə lobarant vəzifələrində çalışır. Baza təhsili texnoloq olan, yenidən hazırlanma təhsili ilə ibtidai sinif müəllimliyi ixtisasına yiyələnən müəlliməyə 65 yaşını bitirən ibtidai sinif müəlliməsinin sinfini müdirin göstərişi ilə alıb. Həmin bu texnoloq ibtidai sinif müəlliməsi Seymur Nazarovun qohumudu. Goranboy rayonu Qızılhacılı qəsəbə 1 saylı tam orta məktəbinin 2018-ci ildən direktoru vəzifəsində çalışan Qabil Həsənov 2019-cu ilin fevral ayında mənim etdiyim şikayət əsasında aparılan yoxlamaların nəticəsinə görə “xəbərdarlıq”, təşkilatçı müavini Həvayət Həsənova “töhmət” cəzası alıb. Qabil Həsənov bu məktəbin pedaqoji və texniki heyətinin bir qismindən müəyyən adlarla pul aldığı, vəzifə səlahiyyətlərindən sui-istifadə edərək saxtakarlıqlar etdiyi üçün 2021-ci ilin avqust ayında barəsində Goranboy Rayon Prokurorluğunda araşdırma aparılır, direktor vəzifəsindən azad olunması ilə bağlı Təhsil Nazirliyinə təqdimat göndərilib. Töhməti olanı, məktəb direktoru Qabil Həsənovun etdiyi saxtakarlıqlara şərait yaradan təşkilatçı müavin Həvayət Həsənovanı Seymur Nazarov öz şəxsi maraqları üçün Qabil Həsənovun yerinə direktor təyin edib.
Goranboy rayonu Qızılhacılı qəsəbə 2 saylı tam orta məktəbinin direktoru İradə Həsənova kimdi? İradə Həsənova bu məktəbdə uzun müddət direktorun tədris işləri üzrə müavini vəzifəsində çalışıb. Yol verdiyi ciddi nöqsanlarına, saxtakarlıqlarına, xüsusilə saxta sinif komplektləşdirilməsi yaratdığına görə xüsusi qərarla tədris işləri üzrə direktor müavini vəzifəsindən azad olunub, məktəbin əmr və pedaqoji şura kitablarında var. Barəsində olan xüsusi qərar gizlədilib, Goranboy RTŞ-nin sabiq müdürü tərəfindən TN-nin təşkil etdiyi “Direktorların İşə Qəbulu” müsabiqə, müsahibə mərhələsinə göndərilib, sabiq müdirin şəxsi maraqları əsasında İradə Həsənova Qızılhacılı qəsəbə 2 saylı tam orta məktəbinə direktor vəzifəsinə təyin olunub. Yeni müdir Seymur Nazarov bu qanunsuzluqları bilərək "kadr islahatı" aparmaq əvəzinə, vəzifə öhdəliklərini yerinə yetirə bilməyənlərə yüksək vəzifə verir.
Seymur Nazarov TN-nin şöbə müdiri və Goranboy RTŞ-nin müdiri vəzifəsində çalışmış obyektiv, ədalətli, peşəkar pedaqoq Ağababa İbrahimovun təhsildən dövlət sənədlərinin saxta olduğunu müəyyənləşdirdikdən sonra uzaqlaşdırdığı kadrları Təhsil Şurasına üzv seçir, bəzisini özünə müşavir, bəzisini özünə agent vəzifələrinə təyin edərək ətrafına toplayır. Cənab başçı Məhərrəm Quliyev mənə qəbulunda olanda bildirdi ki, mən Seymur Nazarovu tanımıram, sadəcə mənə təklif etdilər, mən də təqdimatını TN-ə göndərdim, RTŞ-nə müdür təyin etdim. Sual olunur, ay cənab başçı, tanımadığınız kadrı nə səbəbə millətin gələcəyi olan təhsilə müdir təyin edirsiniz? Sizdən xahiş edirəm, yuxarıda qeyd etdiklərimi nəzarətinizə götürəsiniz, obyektiv araşdırma aparılması üçün tapşırıq verəsiniz. İnanıram ki, tezliklə Goranboy rayon təhsili Seymur Nazarov kimi kadrın əlindən alınacaq, bu rayonun təhsilinə peşəkarlığı və qayğıkeşliyi ilə seçilən bir ziyalı rəhbərlik edəcək”-deyə N.Eminov Prezident İlham Əliyevə, 1-ci vitse-prezident Mehriban Əliyevaya, Təhsil naziri Emin Əmrullayevə və KİV rəhbərlərinə ünvandığı müraciətində qeyd edib.
Şikayət məktubunda, müraciətdə adları keçən şəxslərin də mövqeyini dərc edə bilərik.
Əli TURABOV
