Bakıda bəzi yerüstü piyada keçidlərinin yarımçıq saxlanması onlarla insanın həyatına təhlükə mənbəyidir...

img

Paytaxtda bir çox ərazilərdə tikintisi yarıda saxlanılmış piyada keçidləri var. Paytaxtın müxtəlif yerlərində yerüstü piyada keçidlərinin inşası illərdir ki, yekunlaşmır. Bu hal isə həmin ərazilərdən istifadə edən piyadalar üçün təhlükə yaradır.

Bu vəziyyət daha çox  paytaxtın 8 Noyabr prospekti və Koroğlu Rəhimov küçəsində yaşanır. Ərazidə piyada keçidində işlər yekunlaşmadığı üçün insanlar sürətlə şütüyən maşınların arasından həyatlarını təhlükəyə ataraq yolu keçirlər.

Piyadaların avtomobil yolundan nizamsız keçməsi sürücülərin də işini çətinləşdirir. Belə olan halda isə qəzalar qaçılmaz olur.

  • Mayis Əliyev: “Yerüstü keçidin inşa olunmasından söhbət gedirsə, o vaxtında yerinə yetirilməli və insanların ixtiyarına verilməlidir”

Sosial sahə üzrə ekspert Mayis Əliyev bildirdi ki, bu cür mühüm layihələrin tikintisinə başlanılıb sonradan dayandırılması təqdirəlayiq hal deyil: “Təəssüf ki, bəzi hallarda hansısa bir layihəyə start verildiyinin və sonradan məlum olmayan səbəblərə görə həmin layihənin dayandırıldığının şahidi oluruq. Xüsusilə bu layihələrə insan həyatı ilə bağlı məsələlər daxildir. Bu səbəbdən yol hərəkətinin təşkili üçün başlanan layihələrin dayandırılmasını heç də düzgün qəbul etmirəm. Həmin işin müəyyən bir hissəsinin görülüb sonradan dayandırılması sadəcə olaraq məsuliyyətsizlikdir. Aydın məsələdir ki, hər bir işə cavabdeh olan müəyyən qurumlar var. Həmin bu qurumların öhdəliyinə müəyyən olunmuş iş qrafikində üzərlərinə götürdükləri məsələlər daxildir. Əgər yerüstü keçidin inşa olunmasından söhbət gedirsə, o vaxtında yerinə yetirilməli və insanların ixtiyarına verilməlidir”.

  • Azərbaycan Avtomobil Yolları Dövlət Agentliyi: “Piyada keçidlərində tikintinin yarımçıq qalmasının səbəbi büdcə ilə bağlıdır”

Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli bildirdi ki, piyada keçidlərində tikintinin yarımçıq qalmasının səbəbi büdcə ilə bağlıdır: “Agentlik tərəfindən son 3 il ərzində Bakı şəhəri və ətraf ərazilərdə 30-a yaxın yerüstü və yeraltı piyada keçidi istifadəyə verilib. Bu istiqamətdə görülən işlər davam etməkdədir. Paytaxtın 8 Noyabr prospekti və Koroğlu Rəhimov küçəsində olan piyada keçidlərinin tikintisi müvəqqəti olaraq yarımçıq dayandırılıb. Maliyyə vəsaiti ayrılan kimi tikinti prosesi davam etdiriləcək”.

Günel CƏLİLOVA

Son xəbərlər