Qarabağ veteranı və əlil sığorta pulunu ala bilmir - Vüqar Qasımov hətta məhkəməni də udub…

İlkin İbrahimov: “1997-ci ilə kimi hərbi qulluqçuların xəsarəti zamanı onlara dəyən ziyanın ödənilməsi ilə bağlı müəyyən problemlər yaşanır”

img

Torpaqlarımızın işğaldan azad edilməsi uğrunda silahlı qüvvələrimizin qəhrəmancasına döyüşdüyü və tarixi zəfər qazandığı 44 günlük Vətən müharibəsində, həmçinin I Qarabağ müharibəsi dövründə şəhid olmuş və müxtəlif dərəcəli xəsarətlər almış hərbi qulluqçularımıza birdəfəlik sığorta ödənişlərinin operativ qaydada təmin edilməsi və bu istiqamətdə işlərin effektiv və səmərəli təşkili məqsədilə Azərbaycan Respublikasının Mərkəzi Bankında rəhbər işçilərdən ibarət İşçi Qrup yaradıldı.

İşçi Qrup tərəfindən əlaqədar dövlət qurumları ilə, o cümlədən Azərbaycan Respublikasının Ədliyyə Nazirliyi, Səfərbərlik və Hərbi Xidmətə Çağırış üzrə Dövlət Xidməti, Əmək və Əhalinin Sosial Müdafiəsi Nazirliyi ilə birgə hərbi qulluqçulara və ya onların vərəsələrinə sığorta ödənişlərinin operativ həyata keçirilməsi, bu məqsədlə lazımı təsdiqedici sənədlərin qısa zamanda hazırlanması üçün mütəşşəkkil qaydada iş aparılıb. Müharibə iştirakçılarına sığorta pulu verilir. Sığorta pulu tək İkinci Qarabağ müharibəsi iştirakçılarına deyil, birinci Qarabağ müharibəsində iştirak edənlərə də şamil edilir. Lakin birinci Qarabağ müharibəsi veteranı və ikinci qrup əlili Vüqar Qasımov sığorta pulunu ala bilmir.1991-1992-ci illərdə Qazax cəbhəsində döyüşərək, elə orada da yaralanıb. Ayağından güllə yarası alan Vüqar Qasımov hələ də həmin yaranın izlərini daşıyır. V.Qasımovun sözlərinə görə, müharibədə səhhətinə dəyən ziyana görə ona sığorta verilməli olduğunu çox gec öyrənib: “Elə öyrənəndən sonra da bununla bağlı əlaqədar təşkilata – Dövlət Sığorta Kommersiya Şirkətinə, daha sonra isə məhkəməyə müraciət edib. Məhkəmədə qalib də gəlib. Bu gün Vüqar müəllim təkcə öz adından yox, məhkəmədə xeyrinə qətnamə qəbul edilmiş bir neçə veteran dostunun adından çıxış edir. Yeri gəlmişkən, bu veteranlar həm də qonşudurlar. Hökumət tərəfindən onlara eyni binadan mənzillər verilib”.

  • “1997-ci ilə qədər müharibə zamanı xəsarət almış şəxslərə ödənişin verilməsi üçün sərəncam imzalanmalı, Maliyyə Nazirliyi vəsait ayırmalıdır, bunlar olandan sonra…”

Məsələ ilə bağlı fikir bildirən sığorta üzrə ekspert İlkin İbrahimov bildirdi ki, “Hərbi qulluqçuların dövlət icbari şəxsi sığortası” haqqında qanun 1997-ci ildə qüvvəyə minib: “1997-ci ilə kimi olan hərbi qulluqçuların  xəsarəti zamanı onlara dəyən ziyanın ödənilməsi ilə bağlı müəyyən problemlər yaşanır. 2021-ci ilin aprel ayında ölkə başçısının sərəncamına əsasən sığorta yığımları və sığorta ödənişlərinin verilməsi Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondununa həvalə edilib. 1997-ci ilə qədər müharibə zamanı xəsarət almış şəxslərə ödənişin verilməsi üçün sərəncam imzalanmalı, Maliyyə Nazirliyi vəsait ayırmalıdır. Bunlar olandan sonra aidiyyəti qurumlar kompensasiyaların verilməsi ilə bağlı qərar qəbul edə bilər”.

Günel CƏLİLOVA

Son xəbərlər