Təhsil Nazirliyi yeni tədris ilinin ənənəvi qaydada bərpa edilməsinə qərar verib. Belə ki, ibtidai siniflər sentyabrın 22-də, V-XI sinif şagirdləri isə sentyabrın 29-da əyani tədrisə başalayacaqlar. Ali və orta ixtisas məktəblərinin tələbələri üçün də tədris sentyabrın 29-da olacaq.
Azərbaycanın ali və orta məktəblərində tədrisin başlanmasına qısa vaxt qalıb. Bu arada artıq payız aylarında yoluxmanın daha kəskin artacağı, buna da ali və orta məktəblərdə əyani tədrisin bərpasının səbəb olacağı deyilir. Səhiyyə Nazirliyinin Baş İnfeksionisti də həyacan təbili çalır ki, yoluxma arta biər. “Payız və qış aylarında yoluxma hallarında yenidən artım ola bilər”.
Yoluxmanın artması proqnozlaşdırılırsa, o halda orta məktəblər, üniversitetlər niyə açılır? Yoluxma artacaqsa buna nə zərurət var?
Bəzi ekspertlər hesab edir ki, ali və orta məktəblərdə tədrisin əyani formada bərpası ilə bağlı qərarda tələskənliyə yol verilib. Bizi təhlükə gözləyirsə, ən yaxşı halda, tədrisin onlayn davam etdirilməsinin, karantin qaydalarının sərtləşdirilməsinin daha məqsədəuyğun olduğunu deyən bəzi ekspertlərin sözlərinə görə, əyani tədris zamanı şagirdlər, tələbələr və müəllimlər arasında yoluxmanın sürətlə yayılacağı istisna deyil.
Elçin Əfəndi: “Baş infeksionist də bu amilləri nəzərə alaraq...”
Təhsil eksperti Elçin Əfəndinin sözlərinə görə, müvafiq izolyasiya qaydalarına və vaksinasiyaya əməl olunarsa, bir qədər yoluxmanın qarşısını almaq olar. “ Bəli, belə bir fikir var və bu fikrin dayandığı 2 əsas predmet var: 1) Payız və qış aylarında respirator və digər xəstəliklərin (qrip, soyuqdəymə və s.) artımı; 2) 2021/2022-ci tədris ilinin ənənəvi, yəni əyani şəkildə tədris olunması. Bu iki fakt mövcud pandemiya şəraitində virusa yoluxma hallarının daha da artımı ilə nəticələnə biləcək ehtimalını önə çıxarır. Baş infeksionist də bu amilləri nəzərə alaraq indidən həyəcan təbilini səsləndirməyə başlayıb. Qeyd edim ki, müvafiq izolyasiya qaydalarına və vaksinasiyaya əməl olunarsa, bir qədər qarşısını almaq olar və dərslər də ənənəvi qaydada davam edər”-deyə E.Əfəndi bizimlə söhbətində bildirdi.
Pərvanə Vəliyeva: “Belə hallar çoxluqda baş verərsə, ölkədə əyani tədrisin dayandırılmasına gətirib çıxara bilər”
Sağlamlığa Xidmət İctimai Birliyinin icraçı direktoru Pərvanə Vəliyeva “Bakı-Xəbər”ə bildirdi ki, yoluxma artarsa əyani tədris onlayn tədrislə əvəzlənəcək: “Bəli, ötən ildə olduğu kimi, bu il də payız mövsümündə xəstəliyin artması müşahidə oluna bilər. Əsas da tədrisin başlaması, uşaq və yeniyetmələrin bir-biri ilə, valideynlərin digər şəxslərlə təması hallarını artırır. Yenə də COVİD-19 yoluxma halı aşkar ediləcək məktəb və siniflərdə tədrisin dayandırılıb distant formata keçiriləcəyi gözlənilir. Əgər belə hallar çoxluqda baş verərsə, ölkədə əyani tədrisin dayandırılmasına gətirib çıxara bilər”.
P.Vəliyeva hesab edir ki, yoluxmaya yol açan amillərdən biri də saxta COVID-19 pasportu daşıyanlardır, müəllimlər peyvənd olunmalıdır. “Tövsiyyə edərdim ki, saxta peyvənd pasportu ilə vətəndaşlarımız özlərini aldatmasınlar, indiki ştamm çox daha sürətli yoluxdurur, bu səbəbdən kiminsə həyatını itirməsinə səbəb ola bilərlər. Əsasən də tibb işçiləri kimi, təhsil işçilərinin də peyvənd olunması çox vacibdir”-deyə müsahibimiz vurğuladı.
İradə SARIYEVA
