44 günlük İkinci Qarabağ müharibəsində qanı-canı bahasına qəhrəmanlıq dastanı yazan igid Vətən övladlardan biri də baş leytenant Həsənağa Şakir oğlu Abdillazadə olub. Həyatı dərk edən gündən doğma Azərbaycanına ürəkdən bağlanan Həsənağa 30 il yağı tapdağında olan əzəli yurd yerlərin azadlığı uğrunda göstərdiyi hünərlə böyük keçmişə malik xalqın qürur yerinə dönüb. Onun ağır müharibə zamanı Kəlbəcər, Murov və Ağdərə istiqamətində gedən döyüşlərdə misilsiz qəhrəmanlıq nümunəsi heç vaxt unudulmur. Və qərinələr keçəcək, gələcək nəsillər Həsənağanın Vətən sevgisindən özlərinə pay götürəcək.
Öz şərəfli ölümü ilə Vətəninə, millətinə baş ucalığı gətirən igid zabit indi Bakıda II Fəxri Xiyabanda uyuyur. Müharibə meydanında göstərdiyi şücaətə görə dövlət tərəfindən isə “Vətən uğrunda”, “Kəlbəcərin azad olunması uğrunda” medallarına, “Rəşadət” ordeninə layiq görülüb.
Lənkəranlılar öz Vətən sevdalı oğlunu ürəyində yaşadır, uşaqlı-böyüklü onun xatirəsini daim əziz tuturlar. Qəhrəman zabitin adına şəhərin ən gözə dəyən yerində bulağın açılışı da buna canlı nümunədir. Açılış mərasiminə, demək olar ki, şəhərin əksər hissəsi qatılmışdı. Tədbirdə Milli Məclisin deputatı Rüfət Quliyev, Müdafiə Nazirliyinin nümayəndəsi polkovnik-leytenant Rüfət Məmmədov da iştirak edirdilər. Müdafiə Nazirliyinin nümunəvi orkestrının ifasında dövlət himninin səslənməsi ilə başlanan mərasimdə birinci bulağın qarşısına Müdafiə Nazirliyi, şəhər İcra hakimiyyəti adından əklil və gül-çiçək dəstələri düzdülər. Məktəblilərin ifasında “Həsənağa imzası var” mövzusunda ədəbi-bədii kompozisiya tədbir iştirakçıların ürəyini ilahi bir sevgidən yaranan qürurla coşdurdu.
Müdafiə Nazirliyinin nümayəndəsi, polkovnik-leytenant Rüfət Məmmədov 44 günlük Vətən Müharibəsində Müzəffər Azərbaycan Ordusunun əsgər və zabitlərinin Prezident, Ali Baş Komandan İlham Əliyevin rəhbərliyi altında misilsiz şücaətindən iftixarla söz açdı. Lənkəran Şəhər İcra Hakimiyyətinin başçısı Taleh Qaraşov isə belə dedi: “Lənkəranlılar Vətən torpaqlarının azad olmasında övladlarının, qardaşlarının, atalarının, doğmalarının göstərdikləri əvəzsiz xidmətləri ilə qürur duyurlar. Rayonda şəhid ailələrinə və qazi olanlara həmişə, hər yerdə yüksək ehtiram vardır. Qarabağ müharibəsində qüdrətli Azərbaycanımızın tarixinə şanlı səhifələr yazmış şəhidlər xalq tərəfindən heç vaxt unudulmur, bundan sonra da xatirələri daim əziz tutulacaq. Dünya ölkələri arasında nüfuzlu yeri olan dövlətimiz də Vətən, torpaq yolunda şəhid və qazi olanlara olduqca yüksək dəyər verir”.
Mərasimdə çıxış edən şəhid valideynləri övladlarının xatirəsini əziz tutan, şəhid ailələrinə daimi qayğı və diqqət göstərən ölkə rəhbəri İlham Əliyevə, Birinci vitse-prezident Mehriban xanım Əliyevaya dərin təşəkkürlərini bildirdilər.
Zəfər ORUCOĞLU Azərbaycan Jurnalistlər Birliyinin üzvü
