Artıq yeni tədris ilinə iki həftədən az vaxt qalsa da, orta və ali məktəblərdə dərslərin hansı formada başlanacağı barədə rəsmi qərar yoxdur. Xatırladaq ki, ötən ilin martında koronavirus pandemiyasına görə distant tədris formasına keçən təhsil müəssisələri sonradan hibrid (həm əyani, həm onlayn) tədris formasından da faydalanmışdı.
Məlumdur ki, son bir neçə həftədə Azərbaycanda koronavirus xəstələrinin sayı artıb və gündəlik yoluxma 3 minin, ölüm halları isə 40 nəfərin üzərindədir. Bu vəziyyət valideynləri ciddi narahat edir. Çünki hazırda sürətlə yayılan “Delta” ştammı uşaqları da yoluxdurur. Eyni zamanda, təhsil müəssisələrində kütləvi yoluxma ölkədəki epidemoloji vəziyyəti kəskin ağırlaşdıra bilər.
Məlumat üçün bildirək ki, qonşu ölkələrdə artıq tədrisin necə başlayacağı ilə bağlı qərar verilib. Belə ki, İran, Gürcüstan, Ermənistanda distant, Rusiya və Türkiyədə təhsil ənənəvi formada olacaq. Ancaq Azərbaycanda isə bu barədə hər hansı bir məlumat verilmir. Nəzərə almaq lazımdır ki, sentyabrın 15-i dərslər başlayır, bu zaman dərslərin ənənəvi formada keçirilməsi ilə bağlı qərar verilsə, valideynlərin işi çətin olacaq. Və ən əsası, dərslər ənənəvi formada olarsa, məktəblər və universitetlər hələ dezinfeksiya olunmayıb.
Ekspertlər epidemioloji vəziyyəti nəzərə alaraq məktəblərdə ənənəvi qaydada tədrisin bərpa olunmasının tərəfdarı deyil. O da məlumdur ki, “Delta” ştammının sürətli yayılması davam edir və yoluxma pik həddədir. Həmin ştamm uşaqlar arasında daha çox yayılır. Azərbaycanda uşaqların vaksinasiyası aparılmır. Bu səbəbdən də mütəxəssislər təhsilin distant formada keçirilməsinin tərəfdarıdır.
Nizami Hüseynov: “Ali təhsil müəssisələrinin hansı formada təhsilə başlayacağı ilə bağlı qərarın qəbul edilməsi gecikir”
Təhsil eksperti Nizami Hüseynov bildirdi ki, ali təhsil müəssisələrinin hansı formada təhsilə başlayacağı ilə bağlı qərarın qəbul edilməsi gecikir. Çünki tələbələr ənənəvi təhsilə başlayacaqlarsa, indidən kirayə məsələsini, digər iqtisadi məsələləri həll etməlidirlər: “Məlumdur ki, son həftələr yoluxmanın sayı artıb, koronavirusun “Delta” ştammına uşaqlar da yoluxur. Bu səbəbdən valideynlər tədrisin distant formada keçirilməsinin tərəfdarıdır. Onlar övladlarının səhhəti ilə bağlı narahatlıq hissi keçirirlər. Həssas məsələ ilə bağlı valideynləri başa düşmək lazımdır”.
Ağalar Ağayev: “Son zamanlar uşaqlar arasında da koronavirusun yayılması nəzərə alınaraq, təhlükəsizlik tədbirlərinə ciddi əməl olunmalıdır”
Həkim infeksionist Ağalar Ağayev də bildirir ki, son zamanlar uşaqlar arasında da koronovirusun yayılması nəzərə alınaraq, təhlükəsizlik tədbirlərinə ciddi əməl olunmalıdır: “Dünya təcrübəsinə nəzər salsaq, bəzi ölkələrdə yoluxmanın yüksək göstəriciləri olmasına baxmayaraq, görürük ki, tədris ənənəvi formatda keçirilir. Lakin bu zaman bütün karantin qaydalarına əməl edilməlidir. Bunun üçün maskadan düzgün istifadə, sosial məsəfənin qorunması və gigiyenik qaydala riayət edilməsinə ciddi şəkildə fikir verilməlidir. Əgər məktəblərdə bu tədbirlərə ciddi şəkildə diqqət göstərilsə, bu mümkün olar. Biz artıq koronavirusdan qorxmamalı, onunla yaşamağı bacarmalıyıq. Bu zaman virusa qarşı ümumi immunitet yarana bilər”.
Günel CƏLİLOVA
