Bəli, sovet dağılandan heç bir ay ötməmiş rayon əhalisi bu problemlə üz-üzə qaldı. Kəndlərə olan avtobus xətləri bağlandı. O gündən rayon mərkəzinə, eləcə də ətraf kəndlərə gedib-gəlmək çətinləşdi. Ən əsası isə, marşrut avtobusların yoxluğunu görən qanunsuz taksi fəaliyyəti göstərən sürücülər yola çıxan hər sərnişindən bir manat əvəzinə on manat aldılar. Bu özbaşınalıq indiyə kimi davam edir. Dövlət Lerikin ucqar dağ kəndlərinə belə rahat yollar çəksə də, ara sürücülər öz naqis əməllərdən qalmırlar. İnsanların maddi rifah halının yüksəlməsi üçün olan yeni yollarda sözün əsl mənasında özlərini, elə onların dili ilə desək, “ağa” kimi aparırlar.
Lerik əhalisinin problemlə bağlı dedikləri:
Hüseynağa Hüseynov(Daster kəndi): - Mən uzun müddət kəndimdə müəllim işləmişəm. Əvvəllər ərazimizə avtobus işləyirdi. Camaat rahat şəkildə istədiyi yerə gedə bilirdi. İndi 30 ilə yaxındır həmin xidmətdən mərhum olmuşuq. Bu səbəbdən də əziyyət çəkirik. Ən dəhşətlisi də odur ki, hər yerindən duran köhnə bir “UAZ” alıb başımıza oyun açır.
Əlikram Rəhimov(Vənədi kəndi): - Avtobus xətlərinin ləğvi bizi çətin günə salıb. İndi bir yerə çıxanda günümüzün çox hissəsi yollarda keçir. Ətraf rayonlarda 1manata gedən yol bizə 15 manata başa gəlir. Qiymət məhdud maddi imkanlı adamlara sərf etmir. Yollarımız rahatdır, əhali avtobus xətlərinin bərpasını istəyir. 30 il bundan əvvəl rayonun bütün ərazilərinə ictimai nəqliyyat işləyib.
Məhərrəm Talıbov(Ləkər kəndi): - Lerikdə kəndlərə ictimai nəqliyyat işləmir. Odur ki, vacib bir işdən savayı rayon mərkəzinə gedə bilmirik. Doğrudur, fərdi maşınlar fəaliyyət göstərir. Amma onların təyin etdiyi qiymət on beşqat yüksək olduğuna görə sərnişinlərə münasib deyil.
Rəfayel İsmayılov(Qılqılov kəndi): - Addımbaşı tənqid etdiyimiz sovet vaxtı bizim camaat da ictimai nəqliyyatın xidmətindən razi idi. İndi 30 ilə yaxındır ki, avtobus üzünə həsrətik. Yola çıxanda da ara sürücülər başımıza oyun açır. Mən öz müstəqil respublikamla fəxr edirəm. Qaldı ki, 15 kilometr yolu düşüb bankomatdan pensiya pulumu çıxarda bilmirəm. Marşrut avtobusları fəaliyyət göstərsə, çox problemimiz həllini tapar...
İsfəndiyar Əşrəfov(Dzdipok kəndi): - Heç bir səbəb olmadan kəndlərə işləyən avtobuslar yoxa çıxdı. Hazırda çoxdandır bunun ağrılarını çəkirik. Avtobus olan vaxtlarda şəhərdən gündəlik tələb olunan ərzaqları ucuz qiymətə ala bilərdik. İndi bu işi bəzi işbazlar görür, hər şeydə camaatı aldadırlar. Qısaca deyim ki, avtobus xətlərin bərpası biz dağ adamları üçün yeni, rahat həyat deməkdir.
Əli Sultanov(Hamarat kəndi): - Uzun müddətdir ictimai nəqliyyatın yoxluğu bizi narahat edir. Ara sürücülər də ki, insafı çoxdan unudublar. Çarə doğma kənddən baş götürüb qaçmağa qalır. Artıq yollarda olan özbaşınalıq camaatı boğaza yığıb.
Hidayət Qurbanov(Bradi kəndi): - Dövlətdən pensiya alıram. Pensiya günü gələndə ara sürücülər 70 qəpiklik yolda gediş-gəliş haqqını qaldırırlar 20 manata. Lerikdən başqa, respublikamızın hər yerində ictimai nəqliyyat vardır. Bradililər də inkişaf etmiş bir ölkənin vətəndaşı olmaqla kəndin içindən keçən marşrut avtobusun bərpasını istəyirlər.
Zəfər ORUCOĞLU Azərbaycan Jurnalistlər Birliyinin üzvü
