Məlum olduğu kimi, sentyabrın 1-dən Azərbaycanda koronavirusa qarşı vaksinasiyadan keçməyənlər və COVID pasportu olmayanlar üçün sərt məhdudiyyətlər qüvvəyə minib. Bu səbəbdən artıq iki həftəyə yaxındır ki, vaksinasiya həyata keçirən poliklinikaların və tibb müəssisələrinin qarşısında böyük növbələr düzülür.
Azərbaycanda “COVID-19 xəstəliyi əleyhinə 2021-2022-ci illər üçün Vaksinasiya Strategiyası”na uyğun olaraq ölkə üzrə peyvəndlənmə prosesi davam edir. Vətəndaşlar https://randevu.its.gov.az/ saytına daxil olaraq, “COVID-19 vaksin randevu” elektron xidmətindən istifadə etməklə koronavirus xəstəliyi əleyhinə vaksinasiya üçün onlayn qaydada növbə götürməlidir. Növbə götürən şəxs onun üçün təyin edilən vaxtda poliknikaya yollanır. Lakin poliklinikanın qarşısında yaşanan insan izdihamı narazılıqlara səbəb olur.
Günlərdir ki, sosial şəbəkələrdə poliklinikalardakı peyvənd növbələri haqda foto-videolar paylaşılır. Qeyd edilir ki, yoluxma sayının 3000-4000 arasında olduğu vaxtda belə növbələr daha da təhlükə yaradır. Hətta sağlam vətəndaşların belə bu sıxlıqda koronavirusa yoluxma ehtimalı artır. Rəsmi qurumlar isə açıqlamalarında növbələrə səbəbi vətəndaşların növbə götürmədən poliklinikaya gəlməklərində, vaksin olunmağı son günə saxlamaqlarında görürlər.
Səhiyyə Nazirliyi hələ avqustun 24-də açıqladığı rəsmi məlumatda sıxlıqların tənzimlənə bilməməsini belə izah edib: “Tibbi personalın əsasən qadınlardan ibarət olmasını nəzərə alsaq, poliklinikaların həyətində yaranan növbənin onlar tərəfindən tənzimlənməsi çox çətindir. Bu işdə yardım üçün tibb müəssisələri yerli icra orqanlarına müraciət edəcək”.
Məlumatlara görə, poliklinikalarda vaksin növbəsinin yaranmasının səbəbi həkim sayının az olmasıdır. Yəni poliklinikalarda vaksin vuran tibbi personal bir və ya iki nəfər olur. Gün ərzində vaksin vurdurmaq üçün bir poliknikaya azı 200-dən çox şəxs müraciət edir. Belə olan halda bir nəfərin 200 şəxsə vaksin vurması onun üçün çətin olur. Həmçinin, poliklinikalarda qeydiyyat sisteminin tez-tez donması da yubanmalara, sıxlığın yaranmasına səbəb olur.
Aydın Əliyev: “Peyvənd məntəqələrindəki növbələr, basabas, sıxlıq yoluxma sayını artırır”
Həkim-radioloq Aydın Əliyev bildirdi ki, yeni peyvənd olunan şəxslərin virusa yoluxma səbəbi poliklinikalarda olan sıxlıqdır: “Son günlər çox eşidirik ki, insanlar peyvənddən sonra yoluxur. İddia edirlər ki, peyvənd adamı yoluxdurur. Əslində insanlar peyvənddən yox, peyvənd məntəqələrindəki növbələrdə, basabasda, sıxlıqda yoluxurlar".
Adil Qeybulla: “Qapalı məkanda vaksinasiya olunmaq daha risqlidir, ona görə də açıq guşələrin yaradılması lazımdır”
Professor, həkim ekspert Adil Qeybullanın sözlərinə görə, sıxlığın aradan qaldırılması üçün kiçik guşələrin yaradılması da kifayət edir: “Qapalı məkanda vaksinasiya olunmaq daha risqlidir. Ona görə də açıq guşələrin yaradılması lazımdır. Təbii, yerli əhalinin tələbinə uyğun olaraq tibb məntəqələrinin də sayı azdır və sıxlıq da buna görə yaranır. Ancaq açıq hava şəraitində, müxtəlif ticarət mərkəzlərinin ətrafında vaksinasiya guşələri yaradılarsa, sıxlıqlar aradan qaldırıla bilər”.
Günel CƏLİLOVA
