44 gün davam edən müqəddəs Qarabağın azadlığı uğrunda haqq savaşında şəhidlik zirvəsinə ucalan Lənkəran elinin mərd, igid övladlarının adları qürur, iftixar mənbəyinə dönərək dillərdən düşmür. Hazırda rayonda hər bir şəhidin xatirəsinin əbədiləşməsi üçün olduqca sanballı tədbirlər görülür. Küçələrə, məktəblərə, mədəniyyət ocaqlarına onların dastanlaşmış adları verilir, şərəflərinə guşələr yaradılır, abidə-bulaq kompleksləri tikilir.
Millətin ürəyində özünə əbədi yeri edən şəhid Emil Qurbanov ehtiyatda olan zabit olub. 27 sentyabr Vətən müharibəsi başlanan günü, ailəli olmasına baxmayaraq, çağırış məntəqəsinə gedib döyüş bölgəsində yağı düşmənlə döyüşməyi xahiş edib. İstəyi yerinə yetirilir. O, ağır müharibə meydanında ilk gündən son nəfəsinə qədər düşmənə sarsıdıcı zərbələr vuraraq Vətən torpaqlarının 30 ildən sonra azadlığa qovuşmasında böyük şücaət göstərməklə qəhrəmancasına həlak olur. Emilin adına doğulub boya-başa çatan doğma Girdəni kəndinin ərazisində abidə-bulaq kompleksi ucaldılıb. Onun açılış mərasimi təntənəli şəkildə keçirildi. Mərasimdə çıxış edən Lənkəran ŞİH başçısı Taleh Qaraşov bildirdi ki, 44 günlük Vətən müharibəsindəki qazanılan zəfərimiz Azərbaycan Ordusunun Ali Baş Komandanı, ölkə rəhbəri İlham Əliyevin müdrik siyasətinin tarixi təntənəsidir. Düşmənin məhvi ilə başa çatmış bu tarixi zəfər xalqımıza böyük sevinc bəxş edib. Bu Qələbə sayəsində torpaqlarımız uzunmüddətli düşmən işğalından azad olunub. Beynəlxalq aləmdə ölkəmizin nüfuzu yüksəlib. Bütün bunlara əlbəttə, Ali Baş Komandanın rəhbərli altında rəşadətli Milli Ordumuzun gücü ilə, Vətənini canından üstün tutan şəhidlərin axıtdığı qızıl qanı hesabına nail olmuşuq. Onlar əsl qəhrəmanlardır. Emil Vaqif oğlu Qurbanov da onların içində...
Emilin əsgəri rəşadətini rayon gənclərinə nümunə göstərən İcra başçısı şəhidlərin xatirəsinin xalq tərəfindən daim əziz tutulacağı, adlarının şərəflə çəkiləcəyi xüsusilə vurğuladı.
Lənkəran Şəhər Təhsil Şöbəsinın müdiri Ü.Əliyeva, şəhidin həyat yoldaşı Vüsala xanım və Şəhid Vüsal Kazımovun atası Lənkəran Dövlət Universitetinin prorektoru K.Kazımov çıxış edib şəhidlərin adlarının əbədi yaşamasına, şəhid ailələrinə göstərilən yüksək diqqətə görə ölkə Prezidentinə və Birinci vitse-prezidentə minnətdarlıq etdilər.
Zəfər ORUCOĞLU Azərbaycan Jurnalistlər Birliyinin üzvü
