Bələdiyyələr tərəfindən qanunsuz torpaq satılması ilə bağlı məlumatlar yetərincədir. Növbəti belə bir faktın Quba rayonu Alekseyevka bələdiyyəsi tərəfindən həyata keçirildiyi iddia edilir. Belə ki, deyilənə görə, adıçəkilən bələdiyyə Prezidentin göstərişi ilə Qarabağ qazisinə verilmiş torpağı satıb.
Quba rayon Qacar-Zeyd kənd sakini Əliyarov Beybala Bibiqulu oğlu bildirir ki, Prezident İlham Əliyevə müraciət edəndən sonra ona Qacar-Zeyd kəndindən 2014-cü ildə 50 sot bələdiyyə torpağı verilib: “13 il bələdiyyə torpağındakı bağa baxdım. O torpaqda 400 məhsuldar ağac olmalı idi, ancaq bağ bizə veriləndə 100 ədəd məhsuldar ağac var idi. Dəfələrlə bələdiyyə sədrlərinə müraciət etdim ki, bağa yeni ağaclar əkim. Bələdiyyədən bildirdilər ki, müqavilə şərtləri gəlsin, ondan sonra bağı uzun müddətə sizə verəcəyik. 13 il bağa xərc qoymadan baxdım. 2021-ci ilin may ayında Elçin Manfov adlı bələdiyyə sədri bağı bizim icazəmiz olmadan başqa bir vətəndaşa 49 illik müqavilə ilə verib. Niyə şəhid ailəsinə, Qarabağ qazisinə yox, başqa bir vətəndaşa 400 manata satıb?! Əlimdə çeklərim var. Qanunla həmin bağ satışa çıxarılacaqdısa, birinci bizə təklif olunmalı idi. Prezidentin şəxsi göstərişi ilə verilən torpağı bələdiyyə nəyə görə əlimdən alıb başqa bir adama satır? Üstümə şər atırlar ki, bağa baxmamısınız. Dəfələrlə keçmiş bələdiyyələrə müraciət etmişdim ki, bağı inkişaf etdirmək üçün icazə versinlər, o icazəni vermirdilər. İkinci qrup Qarabağ əlili, 4 uşaq atasıyam. Ailə vəziyyətim də yaxşı deyil. Bir tək qazanc yerimiz ora idi, onu da əlimizdən aldılar. Məlumat üçün bildirim ki, mənimlə yanaşı, şəhid ailəsi Sinəgül xanımın da torpağını əlindən alıb satıblar. Bizə o torpağı Prezident verib. Prezidentin verdiyi torpağı bələdiyyə niyə əlimizdən alır? Rayondakı bütün dövlət qurumlarına müraciət etmişəm, hamısı deyir ki, məhkəməyə ver. Prezidentin verdiyi torpağı məhkəmə ilə geri qaytaraq? Bu absurddur”.
Mövzu ilə bağlı Quba rayonu Alekseyevka bələdiyyəsi ilə əlaqə saxlamağa çalışdıq. Lakin bələdiyyədən heç kim telefon zənginə cavab vermədi.
“Yerli bələdiyyə torpağı satır, sənədi isə icra hakimiyyəti verir, bax belə hallarla bağlı məsələ rüşvət mexanizminə yol açır”
Məsələ ilə bağlı fikir bildirən sosial sahə üzrə ekspert Mayis Əliyev qeyd etdi ki, bələdiyyələr tərəfindən qanunsuz torpaq satılması halları tez-tez baş verir: “Hətta bir neçə bələdiyyə sədri qanunsuz əməlləri ilə bağlı həbs edilib.
Danılmaz faktdır ki, yerli bələdiyyə torpağı satır, sənədi isə icra hakimiyyəti verir. Bax belə hallarla bağlı məsələ rüşvət mexanizminə yol açır. Bələdiyyə seçkilərinin keçirilməsində şəffaflıq, nəzarət bir az da artırılmalıdır ki, orda təmsil olunanlar icra hakimiyyətlərinin istəyinə uyğun formalaşmasınlar. Bu da həmin bələdiyyələrin icra başçılarından asılılığına şərait yaradır”.
Günel CƏLİLOVA
