Vəkillər Kollegiyasının üzvü Elçin Sadıqov hüquq-mühafizə orqanlarının rəhbərlərinə müraciət edərək, məhkəmədə hazırda həbsdə olan general-leytenant Rövşən Əkbərovun oğlunun ona hücum etdiyini bildirib.
E.Sadıqov qeyd edib ki, general Rövşən Əkbərovun təqsirləndirildiyi cinayət işi üzrə öldürülmüş Əliyev Elçin Fəday oğlunun hüquqi varisi Əliyev Fədayın hüquqlarını müdafiə edir: “Məhkəmə prosesində Rövşən Əkbərovun əməlinin ifşa olunması üçün fəaliyyət göstərdiyimə görə, məhkəmə iclasından çıxarkən Bakı Hərbi Məhkəməsinin ikinci mərtəbəsində pilləkənin qarşısında Rövşən Əkbərovun oğlu (mətbuatdan öyrəndim ki, adı Telmandır) mənə hücum etdi. Onun qarşısını digər şəxslər aldı. Bununla bağlı məhkəmənin kamera yazısından başqa məndə də sübut var. Xahiş edirəm ki, bu faktı xüsusi nəzarətə götürərək, Rövşən Əkbərovun oğlunun məsuliyyətə cəlb edilməsinə göstəriş verəsiniz”.
Adam öldürməkdə ittiham olunan Rövşən Əkbərovun oğlunun bu addımını necə dəyərləndirmək olar və onu hansı cəza gözləyə bilər?
Azərbaycan Vəkillər Kollegiyasının üzvü Mehman Muradlı “Bakı-Xəbər”ə açıqlamasında bildirdi ki, ümumiyyətlə, yalnız vəkilə deyil, istənilən şəxsə qarşı edilən qanunzusluq, cinayət yolverilməzdir: “Məhz buna görə də məcəllələr , qanunvericilik aktları mövcuddur. Hər bir cinayət əməlinə onun ağırlıq dərəcəsinə görə qiymət verilir. Ancaq dediyiniz məsələ ilə bağlı biz əvvəl sübut etməliyik ki, orada kiməsə qarşı cinayət olub, yoxsa yox. Şəxsən mənim həmin hadisə barədə ətraflı məlumatım yoxdur. Bu səbəbdən də deyə bilmərəm ki, orada kiməsə qarşı cinayət olub, yoxsa yox. Əgər belə bir hadisə olubsa, vəkil status yazmaqdan qabaq hüquq-mühafizə orqanlarına müraciət etməlidir. Son vaxtlar biz yazılan sosial şəbəkə statuslarının sonrakı aqibətini görürük. Biri tez yazdığını silir, digəri yazıb, sonra üzr istəyir və s. Yəni yalnız bir statusa əsaslanıb fikir yürütmək də doğru deyil. Elə vəkillər var ki, balaca bir insidenti də şişirdib təqdim edirlər. Məqsədləri reklam edilmək olur. Tam səmimi etiraf edim ki, bəzən məhkəmələrdə biz də analoji hallarla rastlaşırıq. Ağır işlərdə tərəflər arasında mübahisə olur, hətta söz atışmaları zaldan kənarda da davam edir. Əlbəttə ki, yaxşı hal deyil. Ancaq biz hər belə detalın dalınca getsək, onda öz işlərimizlə məşğul olmağımıza vaxt qalmaz. Bu məsələyə ən doğru qiyməti hüquq-mühafizə oraqanları verməlidir. İstənilən halda, vəkilə kiminsə hücum etməsi, onu təhqir etməsi yolverilməzdir. Çünki tərəflər bilməlidir ki, vəkil ən qatı cinayətkarı belə müdafiə etmək hüququna malikdir. Bəzən vəkil qarşı tərəfin hüququnu müdafiə edir və qati cinayətkara onun əməlini sübut etməyə çalışır. Bütün bunlara normal yanaşmaq lazımdır. Rovşən Əkbərovun oğlunun da bircudur ki, qanunlara riayət eləsin və ədəbli davransın”.
Qeyd edək ki, general oğlunun vəkilə hücumu ilə bağlı DİN açıqlama verib. Bildirilib ki, Daxili İşlər Nazirliyi Vəkillər Kollegiyasının üzvü Elçin Sadıqovun müraciəti əsasında general-leytenant Rövşən Əkbərovun oğlunun ona hücum etməsini araşdıracaq. Bu barədə DİN-in mətbuat xidmətinin rəisi, polis polkovniki Ehsan Zahidov danışıb: "Vəkil Elçin Sadıqovun mətbuat vasitəsilə etdiyi müraciətlə tanışıq. Müraciət, sözsüz ki, araşdırılacaq və məsələyə hüquqi qiymət veriləcək”.
Məhəmmədəli QƏRİBLİ
