Bələdiyyələrin fəaliyyətindəki nöqsanlar tez-tez qınaq obyektinə çevrilsə də, yerli özünüidarəetmə orqanlarının vəzifəli şəxslərinin qanunsuz əməlləri davam edir.
Məlumdur ki, Azərbaycanda bir neçə bələdiyyənin vəzifəli şəxsləri barədə cinayət işi açılıb. “Torpaq satan” imici formalaşdıran bələdiyyələrin indi də qanunsuz əməllərini davam etdirməsi, sözsüz ki, cəmiyyətdə bu institutlara inamı daha da azaldır.
Bu günlərdə Ucar rayon Alpout kənd sakinləri Bələdiyyə sədri Maarif İsmayılovun ümumi istifadədə olan su kanallarının ətrafındakı əraziləri qanunsuz satması və kənd sakinlərinin sudan istifadə edə bilməməsi ilə bağlı məlumat yayılıb. Bildirilir ki, kənd sakinləri Tofiq Abdullayev, Sabir Cəlilov və Məhəmməd Məmmədov məlum məsələ ilə bağlı tez-tez ərazidə mübahisələr edir: “Pul alıb su kanalının mühafizə zolağını satdığı üçün vətəndaşların yanında gözükölgəli olan bələdiyyə sədri hadisə yerində olan zaman çərçivənin sökülməsini tələb edənlərin üstünə qışqırıb onları təhqir edir. Biz sakinlər xahiş və tələb edirik ki, Ucar rayon Alpout bələdiyyəsinin sədri Maarif İsmayılovun qanunsuz fəaliyyəti təftiş edilsin və onun barəsində ciddi tədbirlər görülsün”.
Alpout bələdiyyəsi - Maarif İsmayılov: “Çəpərlər mən vəzifədə olmayan ərəfədə quraşdırılıb”
Məlum məsələ ilə bağlı Alpout bələdiyyəsinin sədri Maarif İsmayılov bildirdi ki, çəpərlər o bu vəzifədə olmayan vaxt quraşdırılıb: “15 ildir bu vəzifədəyəm. O hasarlar 30 ildən çoxdur ki, orada var. Hazırda çəpərlər sakinlərin tələbi ilə sökülüb”.
Vüqar Tofiqli: “Bələdiyyələrlə bağlı problemin yaşanmasının əsas səbəbi elektron xəritənin hələ də onlara verilməməsidir”
Bələdiyyə sahəsi üzrə ekspert Vüqar Tofiqli bildirdi ki, bələdiyyələrlə bağlı problemin yaşanmasının əsas səbəbi elektron xəritənin hələ də onlara verilməməsidir: “Bələdiyyənin mülkiyyətinə əmlak, torpaq verilməlidir. Təəssüf ki, bugünə kimi bələdiyyənin mülkiyyətinə nə əmlak, nə də torpaq verilib. Nəticədə isə bu cür anlaşılmazlıqlar yaşanır. Bələdiyyələrlə bağlı problemin yaranmasının əsas səbəbi xəritələrin onlara verilməməsidir”.
Günel CƏLİLOVA
