2021-ci ildə qeydiyyatda olan əlil pensiyaçıların sayı açıqlanıb. Bildirək ki, bu say 2021-ci ilin 1 yanvar tarixinə 373,8 min nəfər, 1 iyul tarixinə 358,2 min nəfər olub. Məlumatlara görə, bu ilin 6 ayında əlil pensiyaçıların sayı 15 min 600 nəfər azalıb.
Maraqlıdır, cari ilin 6 ayı ərzində əlil pensiyaçıların sayı nə səbəbdən azalıb?
“Əvvəllər bir böyrəyi olmayanlar, birinci dərəcəli onkoloji xəstələr əlil hesab olunurdu, ancaq indi…”
Iqtisadçı ekspert Kamran Məmmədli bildirdi ki, əmək pensiyaçıları ilə bərabər, əlilliyə görə pensiya alanların sayında da azalmalar var: “Azərbaycanda əlillərin ümumi göstəricisi əhalinin az faizini təşkil edir. Amma əlilliyə görə pensiya alaların payı ümumi pensiya alanların 30 faizidir. İnkişaf etmiş ölkələrdə bu rəqəm 12-20 faiz ətrafında dəyişir. Son illərdə 17 min saxta əlillik təyinatları aşkar olunaraq ləğv edilib. Bu da pensiya alanların sayına təsir göstərib”.
Həmsöhbətimiz onu da əlavə etdi ki, əlillliyin təyin edilməsi ilə bağlı prosedurlar mürəkkəbləşdirilib. Təkrar əlilliyin qiymətləndirilməsi məsələləri zamanı, demək olar ki, əvvəl əlil statusunda pensiya alanların böyük əksəriyyətinin pensiyası kəsilib: “Əlil pensiyaçıların sayının azalmasının müəyyən səbəbləri var. Bunun bir səbəbi bəzi xəstəliklərin əlilliyə görə pensiya hüququ vermə imkanının məhdudlaşdırılması, ikincisi, əvvəlki dövrlərdə qanunsuz şəkildə pensiya hüququ əldə etmiş şəxslərlə bağlı tədbirlərin görülməsi adı altında hökumətin həyata keçirdiyi prosesdir.
Məlumdur ki, orqanizm öz funksiyasını 30 faiz itirirsə, onlar əlil hesab olunur. Əvvəllər bir böyrəyi olmayanlar, birinci dərəcəli onkoloji xəstələr əlil hesab olunurdu. Ancaq indi bu kateqoriyaya aid şəxslər əlil hesab olunmur. Nəticədə həmin şəxslərin əlillik dərəcəsi ləğv edilib”.
Günel CƏLİLOVA
