Son günlər ölkədə baş verən avtomobil qəzalarının sayında artım müşahidə edilir. Məlumdur ki, yay mövsümündə yollarda hərəkətlilik artır.
Qeyd edək ki, əvvəllər yol qəza hadisələrinin artmasını köhnə model sovet avtomobillərinin çoxluğu ilə izah edirdilər. Amma indi statistika göstərir ki, son ağır qəzalar modern avtomobillərin payına düşür. Piyada ölümlərinin sayının artması da narahatlıq doğurur. Əsas magistral yollarımız xeyli düzəlib, amma qəzaların artma statistikası azalmır.
2021-ci ilin birinci yarısında baş vermiş yol-nəqliyyat hadisələri barədə yayılmış statistikaya görə, ölüm və xəsarətlə nəticələnən 756 yol-nəqliyyat hadisəsi qeydə alınıb ki, bu qəzalarda 290 nəfər həlak olub, 698 nəfər isə müxtəlif dərəcəli bədən xəsarəti alıb.
Müəyyən edilib ki, sürücülər tərəfindən yol hərəkəti qaydalarının pozulması nəticəsində 734 (97%) yol-nəqliyyat hadisəsi (piyadalar tərəfindən 18 - 2,4%) baş verib. Bu qayda pozuntularının 302-si (39,9%) nəqliyyat vasitələrinin yüksək sürətlə idarə edilməsi (142 ölü, 230 yaralı), 241-i (31,8%) qarşıdan gələn nəqliyyatın hərəkət zolağına çıxma və ötmə qaydalarını pozması (73 ölü, 236 yaralı), 72-si (9,5%) yolayrıclarını keçmə qaydalarının pozulması (15 ölü, 93 yaralı), 10-u (1,3%) nəqliyyatın sərxoş vəziyyətdə idarə edilməsi olub (5 ölü, 9 yaralı). Qəzaların növləri içərisində piyadanı vurmaq (304 - 40,2%) və toqquşma (270 - 35,7%), əvvəllər də olduğu kimi, üstünlük təşkil edir (maneəni vurmaq 75 - 9,9%, aşma 66-8,7%). Həlak olan 290 nəfərdən (qadınlar 53 nəfər, 7-16 yaş 26 nəfər,) 123-ü piyada, 87-si sürücü, 68-i sərnişin, 10-u velosipedçi, 2-si isə digər hərəkət iştirakçısı olub. Qəzaların səbəbləri nədir?
“Sürücülərin işıq cihazlarından düzgün istifadə etməməsi, yolun qaranlıq olması, göz qamaşdıran işıqlar ağır qəzalara gətirib çıxaran səbəblərdir”
Nəqliyyat məsələləri üzrə ekspert Elməddin Muradlı bildirdi ki, son vaxtlar baş verən yol nəqliyyat hadisələrinin təhlili göstərir ki, Azərbaycanda, xüsusən səhər saatlarında və günün qaranlıq vaxtlarında daha ağır yol nəqliyyat hadisələri baş verir: “Səhər saatlarında ona görə ağır yol nəqliyyat hadisələri baş verir ki, gecə yola çıxan sürücülər səhərə yaxın artıq yuxusuzluqdan əziyyət çəkirlər. Yorğun-əzgin halda yuxulayıb, idarəetməni itirib ağır qəzalara səbəb olurlar. Çox təəssüf ki, bəzən onların özləri də həlak olur və yaxud da sərnişinlər arasında ölənlər, yaralananlar olur”.
Ekspert onu da vurğuladı ki, yol qəzalarının baş verməsində sürücü yorğunluğu, yuxusuzluğu, sürət həddi və yol şəraiti əsas amillərdir: “Yollarımızda vəziyyət heç də ürəkaçan deyil. Yolların işıqlandırılmaması böyük problem yaradır. Sürücülərin işıq cihazlarından düzgün istifadə etməməsi, yolun qaranlıq olması, göz qamaşdıran işıqlar ağır qəzalara gətirib çıxaran səbəblərdir. Yolların işıqlandırılması ilə bağlı ölkə başçısının göstəriş verməsinin üzərindən illər keçməsinə baxmayaraq, küçələr işıqlandırılmır və ya simvolik işıqlandırılır”.
Günel CƏLİLOVA
