Bildiyimiz kimi, avqust ayının 20-dən etibarən ali məktəblərə ixtisas seçimi başlayıb. Əksər abituriyenlər hesab edir ki, ötənilki ballarla builki ballar arasında elə də fərq olmayacaq, onlar uyğunluq təşkil edəcək. Amma belə deyil, builki keçid balları ilə keçənilki balların fərqi az deyil.
Qeyd edək ki, I ixtisas qrupu üzrə 9 866 nəfər abituriyent 200-dən, 15 052-si isə 150-dən çox bal toplayıb. Bu il sözügedən qrup üzrə 15 758 plan yeri ayrılıb ki, onun da 10 112-si ödənişsizdir. Bu o deməkdir ki, 200 bal toplayan şəxslər də ödənişsiz təhsildən faydalana biləcək.
II ixtisas qrupunda isə abituriyentlər üçün 13 672 plan yeri ayrılıb ki, onun da 4 230-u ödənişsiz plan yeridir.
III ixtisas qrupunda isə 14 128 abituriyent 200-dən, 16 567-si 150 dən çox bal toplayıb. III qrup üzrə 12 853 plan yeri ayrılıb ki, onun da 4 353-ü ödənişsizdir. Bu da o deməkdir ki, III qrupda müsabiqə şərtlərini ödəyən abituriyentlərin 4 min nəfərdən çoxu ali məktəblərə qəbul ola bilməyəcək.
IV ixtisas qrupu üzrə isə 5005 abituriyent imtahanda iştirak etmək üçün ərizə təqdim edib. Onlardan 182 nəfəri imtahanda iştirak etməyib. Bu imtahanda qrup üzrə ən yüksək nəticəni (400 bal) 2 nəfər məzun göstərib.
Ali məktəblər üçün açıqlanan keçid ballarının yuxarı olması narahatlıq doğurur, xüsusən də III qrupda keçid ballarının yüksək olması diqqəti çəkir. Keçid ballarinin yüksək olması abituriyentləri və onların yaxınlarını çox narahat edir. Ən böyük rəqabət deyilənə görə, III qrupdadır.
Nəzərə alsaq ki bu il 700 bal toplayan da olmadı, bu halda keçid balları niyə aşağı salınmır?
“Dövlət İmtahan Mərkəzinin builki imtahanlarda III qrupla bağlı mövqeyi, münasibəti qənaətbəxş deyil”
Təhsil üzrə ekspert Məzahir Məmmədli də bizimlə söhbətində ən çox rəqabətin III qrupda olduğunu bildirdi. “Keçən il olduğu kimi, bu il də 700 bal toplayan olmadı. Bununla bağlı nə qədər fikir bildirilsə də, ittihamlar səsləndirilsə də, pandemiyanın adına bağlanılacaq. Məsələ burasındadır ki, bu il ən dəhşətli rəqabət III qrup arasındadır. Belə çıxır ki, onlayn tədris müddətində hansı fənnlərin düsturu, riyazi həlli yoxdursa orada böyük rəqabət var. Yəni 400 baldan aşağı toplayanlar normal seçim edə bilməyəcəklər. Bu il üçün yeganə problem bu qrupda yaranıb. Ümumilikdə, çatışmayan çox şey var. Sadalasaq belə, hamısının səbəbi pandemiya olacaq”.
Bu məsələnin valideynlər arasında güclü müzakirəsinin getdiyini deyən M.Məmmədlinin sözlərinə görə, hər kəs keçid ballarının yüksək olmasından narahatdır. “Bu istiqamətdə çətinliyin yaranmasının səbəblərindən biri abituriyentlərin daha çox III qrupa üstünlük verməsi ilə bağlıdır. Bunu mütəxəssislər, xüsusən də Dövlət İmtahan Mərkəzini təmsil edən mütəxəssislər əsaslandırmaq istəyirlər ki, burada onlayn tədrisin təsiri olub, burada yüksək bal nəticələri var. Amma nəzərə alaq ki, keçənilki kimi bu il də 700 bal toplayan yoxdur. Məsələyə hansı şəkildə münasibət bildirilməsindən asılı olmayaraq, artıq bu işə qərəzli yanaşmağa başlayırlar. Məsələn, Dövlət İmtahan Mərkəzinin builki imtahanlarda III qrupla bağlı mövqeyi, münasibəti qənaətbəxş deyil. Qurum 400-dən aşağı bal toplayan abituriyentlərin ixtisas seçə bilməməsini pandemiya ilə əlaqələndirib, buna bu cür haqq qazandırmaq istəyir. Amma bütün hallarda abituriyentlərin, valideynlərin marağından da çıxış etmək, pandemiyanı da nəzərə alıb elə etmək olardı ki, 400-dən az bal toplayan abituryentlər də əziyyət çəkməsinlər. DİM hələ nəticələri elan etməmişdən əvvəl də bir narazılıq var idi ki, builki suallar adekvat deyil, tədrisə uyğun hazırlanmayıb. DİM isə, öz növbəsində, sualların dəyişdirilməsinin mümkün olmadığını, sual sisteminin dəyişdirilməsinin böyük vaxt, vəsait tələb etdiyini əsaslandırmağa çalışdı. Bütün bəlaların hamısı gəlib abituriyentlərin başında çatladı”-deyə ekspert qeyd etdi.
İradə SARIYEVA
