Hövsan qəsəbəsində yerləşən Duzlu gölün ətrafında antisanitar vəziyyətin hökm sürməsi ilə bağlı mətbuatda dəfələrlə yazılar dərc edilib. Vəziyyətin bir o qədər ürəkaçan olmamasına rəğmən, bura şəfa tapmaq üçün gələnlərin sayı kifayət qədərdir.
Duzlaşma, revmatizm, sinir, oynaq ağrıları, nefrit və başqa bir çox xəstəliklərin müalicəsində məsləhət görülən Duzlu göldə abadlıq işləri aparılmayıb. Heç buraya müalicəyə, dincəlməyə gələnlərin zəruri ehtiyacları üçün də şərait yoxdur. Duzlu gölə gələnlər ilk olaraq giriş üçün 1 manat ödəməlidirlər. Daha sonra müalicəvi hesab olunan palçıq 50 qəpiyə satılır. Buna baxmayaraq, göldə təmizlik üçün heç bir şərait yaradılmayıb. Şəfa üçün həmin yerə üz tutanlar antisanitar vəziyyətdən narazılıq edir.
Məlumat üçün bildirək ki, 2006-cı ildən məhz sanitar qaydalara görə bu göldən istifadə etmək qadağan olunub. Lakin qadağanın olmasına baxmayaraq, istəyən Duzlu gölə gedə bilər.
“Orda paslı vannalardakı palçığa girmək üçün hər zaman növbə olur, bilmirlər, bəlkə birinin ağır dəri xəstəliyi var”
Dermatoloq Gültac Seyidova bildirdi ki, Duzlu gölün suyu və palçığı yüksək avadanlıqla təchiz olunmuş laboratoriyalarda yoxlanılmalıdır: “Həmin gölə gedib dərd tapanlar da var, şəfa tapanlar da. Orda paslı vannalardakı palçığa girmək üçün hər zaman növbə olur. Bilmirlər, bəlkə birinin ağır dəri xəstəliyi var. O xəstəlik keçici də ola bilər. İnsanlar bu barədə qətiyyən düşünmürlər. Kor-koranə palçıq vannası qəbul edib, göldə çimirlər. Belə yerlərə getməmişdən mütləq həkimlə məsləhətləşmələr aparmaq lazımdır”.
G.Seyidova onu da əlavə etdi ki, bu gölün suyu və palçığı duzlaşma, revmatizm, sinir ağrıları, podaqra, yəni oynaq ağrıları, artrid və nefrit kimi xəstəliklərin dərmanıdır: “Yaxşı olardı ki, nəzarət edən qurumlar gölün sanitar vəziyyətini yaxşılaşdıraydılar və onun müalicəvi əhəmiyyətini ictimaiyyətə, eləcə də xalqa bəyan edəydilər. Duzlu göldə sanitar qaydalara əməl edilərsə, bura xarici turistlər də maraq göstərər. Danılmaz faktdır ki, xaricilər sağlamlıq turizminə böyük maraq göstərir”.
Həkimin sözlərinə görə, gölün ətrafında tibb məntəqəsinin olması daha məqsədəuyğundur.
Günel CƏLİLOVA
