Azərbaycandan fərqli olaraq, inkişaf etmiş Avropa ölkələrində binalar penoplast materialla üzlənmir. Çünki 2011-ci ildən Avropa İttifaqında (Aİ) yüksək yanğın risqi olduğuna görə penoplastın tikinti işlərində istifadəsinə qadağa qoyulub. Buna səbəb tikintidə təhlükəsizlik, davamlılıq və s. meyarlar üzrə standartlar hazırlayan “İnternational Code Council” təşkilatının belə materialların məktəblərin, evlərin, iş yerlərinin tikintisində istifadəsini təhlükəli hesab etməsi olub.
Paytaxtda binaların “penoplast”la üzlənməsinə təxminən 2010-ci ildən başlanıb. O zaman materialı Azərbaycanda bir çox şirkət, o cümlədən TİVİ MMC şirkəti təklif edib. Klassik fasad üçün yüngül, ucuz və tez başa gələn bu material hamıya tanışdır.
Xatırladaq ki, 2015-ci ildə paytaxt Bakıda “penoplast”la üzlənmiş binanın yanması divarlarına analoji üzlüklər çəkilmiş digər binaların da yaşayış üçün təhlükəli olduğunu bir daha gündəmə gətirdi. Həmin ərəfədə paytaxt Bakı və bir sıra bölgələrdə binalarda olan penoplast üzlüklər söküldü. Məqsəd yanğının geniş miqyas almaması idi.
Avqustun 24-də penoplast üzlük yenidən yanğına səbəb oldu. Hadisə paytaxtın Heydər Əliyev prospektində yolun Koroğlu metrostansiyasına gedən hissəsində yol kənarındaki hasarda baş verdi. Bu günlərdə baş vermis növbəti yanğın hadisəsinə də adıçəkilən üzlük səbəb oldu.
Məlumat üçün bildirək ki, əksər xarici ölkələrdə “penoplast”la üzlənmiş binalar sığortalanmır. Bizdə isə fərqlidir. Belə ki, belə binalardakı evlərin yanğın risqinin yüksək olması nəzərə alınaraq onlar ya sığortalanmır, ya da yüksək tariflə sığorta edilir. Sığorta şirkətləri bildirir ki, onlar penoplast üzlüklü evləri 100 manat baha sığortalayır.
Elmin Zeynalov: “Sığorta şirkətləri penoplast üzlüklü binalardakı evləri baha sığortalamaqda və ya sığortalamamaqda haqlıdır”
Sığorta sahəsi üzrə ekspert Elmin Zeynalov bildirdi ki, sığorta şirkətləri penoplast üzlüklü binalardakı evləri baha sığortalamaqda və ya ümumiyyətlə sığortalamamaqda haqlıdır: “Ola bilər ki, sığorta şirkəti evi tam və ya qismən sığorta edər. Ola bilər ki, ev sığortalanarkən üzlüklə bağlı yanğın risqi istisnaya aid edilər. Və yaxud nisbətən baha sığortalaya bilər. Hər bir halda risq yüksək olduğundan, sığorta şirkətləri haqlıdır”.
Azər Əliyev: “Bütün inkişaf etmiş ölkələrdə, demək olar ki, yanan materialdan inşaat işlərində istifadə etmək qəti qadağan edilib, analoji qayda bizdə də tətbiq edilməlidir”
Memar Azər Əliyev bildirdi ki, televizor alınanda küncləri qoruyucu ağ baloncuqlardan ibarət olan materialla bərkidilmiş olur: “Penoplast həmin materialdır. Artıq tikinti sektoruna da girən bu material həm fasad örtükləri, həm mərtəbəarası örtüklər, həm də dam örtüyü kimi istifadə olunur. Bu materialın zərəri haqqında danışmaqla bitməz. Çünki bu materialın tez yanması hələ dərdin yarısıdır. Penoplast yanan zaman elə dəhşətli dərəcədə tüstü verir ki, insan yanğından deyil, o tüstüdən boğulub ölə bilər. Bütün inkişaf etmiş ölkələrdə, demək olar ki, yanan materialdan inşaat işlərində istifadə etmək qəti qadağan edilib. Yaxşı olar ki, bizdə də bu cür təhlükəli üzlükdən, materiallardan istifadə qadağan olunsun. Xoşagəlməz faciələrin yaşanmaması üçün penoplast kimi materiallardan istifadə qadağan olunmalıdır”.
Günel CƏLİLOVA
