“Zühür edən” yalançı imam ölkədə insanların dini bilgilərinin, dini məlumatlarının zəifliyindən sui-istifadə edərək külli miqdarda vəsait ələ keçirib. Özünü “İmam Mehdi” adlandıran paytaxt sakini Babayev Aqil Zalış oğlu saxlanılıb.
Bir qrup şəxs Daxili İşlər Nazirliyinə müraciət edərək, paytaxt sakini olan Babayev Aqil Zalış oğlunun 2000-2021-ci illər ərzində dələduzluq, yəni etibardan sui-istifadə etmə və ya aldatma yolu ilə onların külli miqdarda pullarını ələ keçirdiyini bildirib.
DİN-dən verilən məlumata görə, nazirliyin Baş Mütəşəkkil Cinayətkarlıqla Mübarizə İdarəsində aparılan araşdırmalar zamanı müəyyən edilib ki, Aqil Babayev bu illər ərzində inanclı insanlar arasında özünü zühur etmiş 12-ci İmam Mehdi kimi təqdim edib.
Çox təəssüf ki, XXI əsrdə özünü “İmam Mehdi” kimi təqdim edərək vətəndaşlara qarşı dələduzluq edən şəxslər də tapılır. Bu cür şarlatanlara bizim əsrdə rast gəlinməsi sözün həqiqi mənasında insanda təəccüb doğurur. Bu o anlama gələ bilir ki, bizim cəmiyyətdə dini maarifləndirmə çox zəifdi, din adamları, QMİ öz işinin öhdəsindən lazımı səviyyədə gələ bilmir, xurafat, cəhalət baş alıb gedir. Əgər cahillik bu şəkildə güclü olmasaydı, bir nəfər “zühur edən imam” insanların başına bu qədər oyun açmazdı. Heç şübhəsiz, buna səbəb o insanların özünün cahilliyi olub. XXI əsrdə cahil insanların cəmiyyətimizdə görünməsi doğrudan da acı mənzərədir. Hər dövrün öz Şeyx Nəsrullahı var, bizim zəmanənin Şeyx Nəsrullahı da A.Babayevdir ki, xeyli müddətdir avamları barmağına dolayaraq “qaz vurub qazan doldurub”.
Bəzi ekspertlər deyir ki, islami maarifləndirmə işinə, cəhalətlə mübarizəyə din adamlarını yox, sosioloqları, tarixçiləri, filosofları, yazıçı-şairləri, alimləri cəlb etmək lazımdır, əks halda daha çox Şeyx Nəsurullahların, “İmam Mehdi”lərin “zühur”unun şahidi olacağıq.
“Bu adamın ümumiyyətlə dinlə, islamla əlaqəsi yoxdur, o dələduzdur və cahil insanları dolandırıb...”
“Müasir İnkişaf” Birliyinin sədri Mübariz Göyüşlü bizimlə söhbətində bildirdi ki, baş verənlər doğrudan da bu çox narahatverici faktdır. M.Göyüşlü hesab edir ki, dini maarifçiliklə məşğul olmalı olan təşkilatlar, din xadimləri, başlıcası QMİ bu sahədə lazımı işlər görsəydi, bu acı mənzərə ilə üzləşməzdik, XXI əsrdə baş verən belə cəhalətin utancverici səhnələri ilə qarşılaşmazdıq. “Əlbəttə, QMİ-nin islam dininin təbliğatı ilə bağlı gördüyü işlərin yetərli olduğunu sanmıram. Dini maarifçilik sahəsində daha çox işlər görülməlidir düşüncəsindəyəm. “İmam Mehdi” adı ilə dələduzluq edənin birinin tapılmasına görə də nə QMİ-nin, nə də din adamlarının suçlanmasının tərəfdarı deyiləm. Belə şarlatanların, dələduzların meydana çıxıb xalqı dolandırması, külli miqdarda vəsait mənimsəməsi kimi neqativ hallara görə bütün dini cameənin hədəfə alınmasını düzgün saymıram. Bu adamın ümumiyyətlə dinlə, islamla əlaqəsi yoxdur, o dələduzdur və cahil insanları dolandırıb, pullarını alıb. Xurafat savadsızlığın, oxu mədəniyyətinin, bilgisizliyin geniş yayıldığı yerlərdə daha çox ayaq açıb yeriyə bilir. Ola bilsin, o adamın ətrafında beş-üç cahil adam əvvəlcə ona inanıb, sonra onun “kəramətini” başqa inancı zəif olanlara, savadı, dini bilgisi olmayanlara təbliğ ediblər. Mənə qəribə gələn odur ki, XXI əsrdə yaşayırıq və internet vasitəsilə istədiyimiz bilgini əldə etmək imkanımız olduğu halda dələduz tərəfindən aldanılırıq. XXI əsrdə belə "12-ci İmam Mehdi" varsa 100 il, 200 il əvvəlki durumu təsəvvür edirəm...”
M.Göyüşlü hesab edir ki, sanki insanlar nəyəsə, mistik, qeyri-adi bir şeylərə inanmaq istəyir. “Bəlkə də cəmiyyətdə gördüklərindən, problemlərdən, haqsızlıqlardan bezərək öz inanclarını, inamlarını hansısa “şeyx”ə, “imam Mehdi”yə inanaraq təmin etmək istəyirlər. Əlbəttə, bu da düzgün seçim deyil, nəticədə insanların aldanmağına gətirib çıxarır. Hesab edirəm ki, maarifləndirmə işi gücləndirilməli, təhsilin, elmin səviyyəsi qaldırılmalıdır. Dini maarifləndirmə gücləndirilməlidir. Özünü “İmam Mehdi” kimi qələmə verib xalqı aldadanların cavabını elmlə, savadla, güclü dini maarifləndirmə ilə verə bilərik. Mən bu kimi halların baş verməsini milli-ideoloji məsələlərin zəif təbliğ edilməsi ilə də bağlayıram. Sağlam milli, dini ideoloji düşüncə olarsa bu cür problemlərlə üzləşmərik”-deyə M.Göyüşlü qeyd etdi.
İradə SARIYEVA
