1 saylı Kliniki Tibbi Mərkəz (Semaşko) fəaliyyətini dayandırıb. Bu barədə “Trend”in sorğusuna cavab olaraq xəstəxanadan bildirilib.
Məlumata görə, Kliniki Tibbi Mərkəzdə doğum-ginekologiya şöbəsi tamamilə bağlanıb. Kardiologiya, nevrologiya, terapiya şöbəsi, eyni zamanda ümumi reanimasiya, intensiv terapiya şöbəsinin də fəaliyyəti koronavirusla mübarizə səbəbindən dayandırılıb.
Hazırda Kliniki Tibb Mərkəz olaraq hemodializ xəstələrinə, toksikoloji xəstələrə xidmət göstərilir və yaralanmalar, travmalarla bağlı təxirəsalınmaz əməliyyatlar yerinə yetirilir.
1 saylı Kliniki Tibbi Mərkəz 19 avqustdan COVİD-19 xəstəxanası kimi fəaliyyətə başlayıb. Həmin tarixə qədər xəstəxanada 31 qeyri-koronavirus xəstəsi var idi. Onların bir qismi evə yazılıb, bir qismi isə cərrahi korpusda müalicəsi başa çatanadək saxlanılıb və daha sonra evə göndərilib. Bütün proseslər mərhələli şəkildə, tibbi qaydalara uyğun olaraq həyata keçirilib.
Xəstəxanada fəaliyyət göstən şöbələrin, orada çalışan həkimlərin, tibb işçilərinin taleyi necə olacaq, onlar harada işlə təmin ediləcəklər, işsizmi qalacaqlar? Bu xəstəxananın da COVİD-19 xəstəxanasına çevrilməsi o deməkdir ki, korona təhlükəsi artır?
Məsələ ilə bağlı Səhiyyə Nazirliyi ilə əlaqə saxladıq. Nazirliyin ictimaiyyətlə əlaqələr şöbəsindən bildirdilər ki, 1 saylı Kliniki Tibbi Mərkəz TƏBİB-ə aiddir və onunla bağlı suallara yalnız TƏBİB cavab verə bilər.
TƏBİB-lə əlaqə saxlamaq istəsək də, qurumun mətbuat xidmətinin rəhbərinin telefonu bağlı olduğu səbəbindən cəhdimiz alınmadı ki, 1 saylı Kliniki Tibbi Mərkəzin əməkdaşlarının, tibb personalının bundan sonrakı taleyi haqqında məlumat alaq.
“Xəstələrin sayı həddən artıq çoxalıb, keçən il bir ailədə bir nəfər yoluxurdusa, indi insanlar artıq ailəlikcə xəstəxanaya daxil olurlar”
Azərbaycan Həkimlər Birliyinin İdarə Heyətinin üzvü, professor Ədalət Rüstəm “Bakı-Xəbər”ə bildirdi ki, 1 saylı Kliniki Tibbi Mərkəzdə çalışan tanınmış həkimlərdən biri onunla əlaqə saxlayaraq heç kəsin işsiz qalmadığını deyib. Ə.Rüstəmin sözlərinə görə, 1 saylı Kliniki Tibbi Mərkəz COVİD-19 xəstəxanası kimi fəaliyyətə başlasa da, əməkdaşların hamısı burada saxlanılıb və koronaviruslu xəstələrlə işləməyə yönəldiliblər. “Mən özüm də uzun müddət 1 saylı Kliniki Tibbi Mərkəzdə işləmişəm. Bu xəstəxananın həkimlərindən biri mənə dedi ki, Mərkəz COVİD-19 xəstəxanasına çevirilib. Artıq ora koronovirus xəstələri üçün fəaliyyət göstərir. Təkcə 1 saylı Kliniki Tibbi Mərkəz deyil, onun kimi başqa bir neçə xəstəxana da COVİD-19 xəstələri üçün ayrılıb. Keçən il də bir ilə qədər “Semaşko” COVİD-19 xəstəxanası kimi fəaliyyət göstərdi. İndi də bu məqsədlə fəaliyyət göstərir. “Semaşko”nun həkimlərinin və tibb bacılarının böyük bir qismi hazırda COVİD xəstələri üzərində işləyirlər, onların müalicəsi ilə məşğul olurlar. Bütün şöbələr COVİD xəstləri ilə işləyir, hətta ginekologiya şöbəsi də koronavirusa tutulmuş hamilə qadınların müalicəsi ilə məşğul olur. 1 saylı Kliniki Tibbi Mərkəzin bütün şöbələrində COVİD xəstələrini qəbul edirlər və onların əməkdaşları bu xəstələrlə işləyir. Burada koronaviruslu xəstələri müalicə edən həkimlərin əksəriyyəti də elə 1 saylı Kliniki Tibbi Mərkəzin öz həkimləri olur”.
Bəzi həkimlərin 15 gün işlədiyi, 15 gün isə istirahət etdiyini deyən Ə.Rüstəmin sözlərinə görə, həkimlər, tibb işçiləri maaşlarını bütöv şəkildə alırlar. Bu xəstəxanada fəaliyyət göstərən ginekoloqların, travamatoloqların bir qismi isə özəl klinikalarla müqavilə bağlayıb, gedib orada işləyirlər. “Dövlət qanunları da bunun əleyhinə deyil. Bildiyim qədər, 1 saylı Kliniki Tibbi Mərkəzin heç bir həkimi, tibb işçisi işsiz qalmayıb”.
Ə.Rüstəm qeyd etdi ki, 1 saylı Kliniki Tibbi Mərkəz başda olmaqla, bir neçə xəstəxananın COVİD-19 xəstəxanasına çevrilməsi virusun daha da təhlükəli şəkil aldığından xəbər verir. Professorun sözlərinə görə, indi elə ailələr var ki, bütün üzvləri xəstələnib və hərəsi bir xəstəxanada müalicə alır. Ə.Rüstəm deyir ki, xəstələrin sayı günü-gündən artır, ölüm halları da çoxalır, bu səbəbdən də daha çox xəstəxana COVİD-lə mübarizəyə yönəldilir: “Bilirsiz, “Semaşko”nun COVİD-19 xəstəxanasına çevrilməsi elə yer çatışmazlığı ilə bağlıdır. Tibb Universitetinin iki klinikası var, biri 14, o biri isə 12 mərtəbəli. Onlar keçən il COVİD-ə bağlanmışdı, amma bu il hələ ki, ehtiyac yoxdur. Ehtiyac olsa, o klinikalar da COVİD xəstələri üçün ayrılacaq. Hətta yer problemi daha ciddi şəkil alarsa, dövlət özəl xəstəxanaları da COVİD-ə bağlaya bilər, amma pulunu ödəməklə. Yəni özəl xəstəxananın qazancını dövlət ödəyəcək. Bu keçən il də olub, bu il də ola bilər. Xəstələrin sayı həddən artıq çoxalıb, keçən il bir ailədə bir nəfər yoluxurdusa, indi insanlar artıq ailəlikcə xəstəxanaya daxil olurlar. Ölüm halı da çox artıb”.
İradə SARIYEVA
