Məlum olduğu kimi, koronavirusa yoluxma hallarının qarşısının alınması məqsədilə polis mülki geyimdə ictimai nəqliyyatda və qapalı yerlərdə yoxlama-nəzarət tədbirləri həyata keçirir.
DİN-in Mətbuat Xidmətinin yaydığı məlumata görə, xidməti formada və mülki geyimdə keçirilən tədbirlərdə tibbi maskadan istifadə etməyən, müəyyən olunan norma və qaydalara əməl etməyən şəxslər barəsində inzibati tənbeh tədbirləri tətbiq olunur, hərəkət iştirakçıları və sürücülərlə profilaktik söhbətlər aparılır.
Polis əməkdaşları tərəfindən virus risqinin yüksək olduğu Bakı Metropoliteninin stansiyalarında, ictimai nəqliyyatda, taksilərdə, eləcə də digər qapalı məkanlarda sosial məsafənin gözlənilməsi, tənəffüs yollarını qoruyan fərdi vasitələrdən istifadənin vacibliyi, yaxud düzgün istifadənin zəruriliyi barədə vətəndaşlara tövsiyələr verilir.
Nazirlər Kabinetinin qərarı ilə təsdiq edilmiş koronavirusun profilaktikasına dair metodiki göstərişlərə uyğun olaraq paytaxt, eləcə də digər rayon və şəhərlərdə karantin rejimi qaydalarına əməl olunmasını təmin etmək məqsədilə daxili işlər orqanlarının əməkdaşları tərəfindən gücləndirilmiş nəzarət-profilaktik tədbirlər davam etdirilir.
Polisin mülki geyimdə bu şəkildə yoxlama-nəzarət tədbirləri həyata keçirməsi çox müsbətdir. Çünki sentyabr ayının 1-dən etibarən COVID-19 pasportu olmayanlar ali təhsil müəssisələrinə, idarə və qurumlara, digər yerlərə buraxılmayacaq. Digər tərəfdən də, xəstəxanalarda növbələr yaranmasın deyə, insanların “randevü” almadan xəstəxanalara getməməsini də nəzarətdə saxlayırlar. Çünki insanların bir qismi randevü almadan vaksinasiya üçün xəstəxanalara gedir və nəticədə də sıxlıq yaranır, bu amilin özü də virusun yayılmasına şərait yarada bilir. Bütün bu halların baş verməməsi üçün polis mülki geyimdə aidiyyəti yerlərdə yoxlama-nəzarət həyata keçirir.
“Burada əsla güzəştə gedilə bilməz, polis bu missiyanı güzəştsiz, sərt, obyektiv, məsuliyyətli şəkildə həyata keçirməlidir, keçirəcək də”
“Polisə Dəstək” İctimai Birliyinin rəhbəri Şəmsəddin Əliyev bizimlə söhbətində bildirdi ki, polisin mülki geyimdə ictimai nəqliyyatda, qapalı məkanlarda, o cümlədən də randevü ilə bağlı yoxlama-nəzarət tədbirləri həyata keçirməsi çox müsbətdir və bunun müsbət nəticəsini vətəndaşlar yaxından öz həyatlarında hiss edəcəklər. Ş.Əliyevin sözlərinə görə, bu, polisin vəzifəsidir: “Bu, polisin fəaliyyətinə xas olan bir haldır. Çünki “Əməliyyat axtarış fəaliyyəti haqqında” Qanuna əsasən, Azərbaycan polisi cinayətkarlıqla mübarizə, asayişin təmin olunması, vətəndaşın həyat və sağlamlığına yarana biləcək digər təhlükələrin qarşısının alınması üçün fəaliyyət göstərir. Polisin mülki, ya da uniformada olması elə də əhəmiyyət daşımır, əsas odur ki, o öz işini yüksək səviyyədə həyata keçirir. Polis mülki geyimdə də, uniformada da öz üzərinə düşən işi, missiyanı layiqincə yerinə yetirir. Koronavirusla mübarizə sahəsində polisin fəaliyyəti yüksək qiymətləndirilməlidir. Bu gün vəziyyət elədir ki, polisin ictimai nəqliyyatda, qapalı yerlərdə mülki geyimdə yoxlama-nəzarət həyata keçirməsinə zərurət var. Polis artıq mülki geyimdə qəfil ictimai nəqliyyata, qapalı məkanlara daxil olur, insanların peyvənd üçün randevü alıb-almadığını yoxlayır, prosesə nəzarət edir. Heç şübhəsiz bu, koronavirusla mübarizə sahəsində irəliyə atılan daha bir uğurlu addım deməkdir. Polisin bu yoxlamalarının bu sahədə müsbət nəticələri olacaq. Hesab edirəm ki, vətəndaşlar da qapalı yerlərdə, ictimai nəqliyyatda tələb olunan bütün qaydalara əməl etməlidirlər”.
Ş.Əliyevin sözlərinə görə, polisin mülki geyimdə yoxlama-nəzarət həyata keçirməsini bəzən qaralamaq istəyənlər də tapılır, belələri isə həmişə səhv yolda olanlardır. Ş.Əliyevin bildirdiyinə görə, polisin pandemiya ilə mübarizə qaydalarının hansı şəkildə icra edilməsinə, habelə virusa yoluxmaya yol aça biləcək amillərin aradan qaldırılmasına nəzarət etməsi bütövlükdə cəmiyyətin sağlamlığına xidmət edir. “Bu gün yoluxma o səviyyədir ki, bu bizim hamımızı narahat edir. Artıq görürsüz ki, vaksinin 2 dozasını vurduran insanlar da koronavirusa yoluxur. Bu da o deməkdir ki, heç kəs virusa yoluxmaqdan sığortalanmayıb. Ona görə də, polisin bu şəkildə davranması çox vacib tələblərdən biridir. Burada əsla güzəştə gedilə bilməz, polis bu missiyanı güzəştsiz, sərt, obyektiv, məsuliyyətli şəkildə həyata keçirməlidir, keçirəcək də”-deyən Ş.Əliyevin sözlərinə görə, insanlar da özlərinin və ətraflarının qeydinə qalmalıdır. Ş.Əliyev deyir ki, vətəndaş yoluxduğunu bildikdə heç yerə getməməli, qapanmalı və müalicəsi ilə məşğul olmalıdır. Ş.Əliyev həmçinin vurğuladı ki, insanların növbəli şəkildə vaksinasiyaya getməsi də çox vacib məsələdir. O hesab edir ki, insanlar randevü almalı, sonra isə təyin olunmuş saatda, gündə vaksin olunmağa getməlidir. Polisin bu məsələyə də nəzarət etməsinin böyük əhəmiyyəti olduğunu deyən Ş.Əliyev hesab edir ki, sentyabrın 1-nə qədər vətəndaşlar növbə ilə vaksinasiyadan keçməli və tələb olunan COVID-19 pasportuna sahib olmalıdır. Bütün vətəndaşları COVID-19-dan daha tez xilas olmaq məsələsinin düşündürməli olduğunu deyən ekspert hesab edir ki, hər kəs öz üzərinə düşən işi böyük məsuliyyətlə yerinə yetirməlidir.
İradə SARIYEVA
